以不變應曼變 (車路士對曼聯賽後分析)

黑仔講波 於 29/11/2021 發表 收藏文章
圖片來源:英超官方網站 (https://www.premierleague.com/match/66466)
今輪英超尾場賽事有車路士主場迎戰曼聯。目前車路士已經各項賽事十場不敗,而且今季聯賽只失 4 球,防守力冠絕英超,同時攻力亦十分強橫,30 個入球數亦只僅次於利物浦;反觀曼聯今季成績強差人意,現時只位列第 9,蘇斯克查亦因而被辭退,今場聯賽將會係卡域克作為代任領隊嘅第一場聯賽。

車路士照舊排出三中堅,右翼衛繼續由列斯占士擔任正選,左翼衛則有馬高斯阿朗素復任正選頂替喺歐聯賽事受傷嘅捷維爾 (Ben Chilwell);中場方面由於簡迪 (N’Golo Kanté) 受傷,今仗改由路夫斯捷克與佐真奴拍檔;三箭頭就由添姆雲拿喺最前,赫臣奧度爾、薛耶治喺進攻中場位置上協助組織並伺機入楔攻門。

車路士正選陣容
GK 16文迪 Edouard Mendy
CB 2 魯迪加 Antonio Rüdiger
CB 6 泰亞高施華 Thiago Silva
CB 14查洛巴 Trevoh Chalobah
LWB3馬高斯阿朗素 Marcos Alonso (78’ 由蒙特 Mason Mount 入替)
CM 5 佐真奴 Jorginho
CM12路夫斯捷克 Ruben Loftus-Cheek
RWB24列斯占士 Reece James
CAM20赫臣奧度爾 Callum Hudson-Odoi (78’ 由普列錫 Christian Pulisic 入替)
CAM22薛耶治 Hakim Ziyech
ST 11 添姆雲拿 (82‘ 由盧卡古 Romelu Lukaku 入替)

曼聯正選陣容
曼聯則排出 4-3-1-2 應戰,令人感到意外嘅係 C 朗拿度今場先任後備,由拉舒福特、辛祖擔任雙箭頭;進攻中場位置繼續有般奴費蘭迪斯,三中場就係費特、馬迪、麥湯文尼;後防有泰利斯、拜利代替分別因受傷及停賽嘅梳爾 (Luke Shaw)、麥佳亞 (Harry Maguire) 出任正選。

GK 1 迪基亞 David de Gea
LB 27泰利斯 Alex Telles
CB 3 拜利 Eric Bailly
CB 2 連迪洛夫 Victor Lindelöf
RB 29雲比沙卡 Aaron Wan-Bissaka
CM17費特 Fred
CM31馬迪 Nemanja Matić
CM39麥湯文尼 Scott McTominay
CAM18般奴費蘭迪斯 Bruno Fernandes (89’ 由雲迪碧克 Donny van de Beek 入替)
FW 10拉舒福特 Marcus Rashford (77’ 由連加特 Jesse Lingard 入替)
FW 25辛祖 Jadon Sancho (64’ 由 C 朗拿度 Cristiano Ronaldo 入替)

車路士 – 進攻啞火
雖然車路士今場有高達 24 腳射門,但只有 6 腳中龍,連扳平一球都係靠 12 碼,可見今場車仔埋門質素並唔高。車路士今屆聯賽一共攻入 31 球,隊中入球最多嘅反而係右翼衛列斯占士,而捷維爾、蒙特、盧卡古則以 3 個入球並列第二。雖然入球分佈平均係好事,而且今屆亦再次引證咗車路士「帶刀侍衛」嘅優良傳統,但同時反映出隊中尤其是進攻球員之中冇一個可靠、穩定嘅入球點,今場正選前鋒添姆雲拿更只係喺聯賽中入咗一球。

再者,車仔今場前線球員之間配合度不足,攻入對手心臟地帶或製造嘅攻勢唔夠入肉。例如赫臣奧度爾偏向自己持球突破或從左路 cut in 射門,有時即使添姆雲拿走到個靚位前者都唔會交或者見唔到;而後者雖然把握到好嘅走位時機,但埋門質素實在係差,走到個靚位都未必射得中龍。

圖片來源:英超官方網站 (https://www.premierleague.com/match/66466)

另一方面,杜曹今場作出調動嘅時間令人意外地慢,喺 50 分鐘失球後,筆者原本預計踢到 60 分鐘左右佢就會作出人腳甚至戰術調動,結果到 78 分鐘先換入蒙特、普列錫,並喺 82 分鐘以盧卡古入替添姆雲拿。呢三位球員落場後作用立竿見影,前兩者為車仔中場注入新血,佢哋嘅技術、活力重新帶起車仔進攻嘅節奏,而盧卡古作為支點可以牽制曼聯中堅之外,進攻時佢會企喺禁區內中鋒位嘅習慣亦令隊友搵到傳中目標,相比添姆雲拿偏愛喺 half space 接應更為有效。

曼聯 – 快速反擊
今場曼聯雖然收起咗 C 朗犧牲咗一位前線支點及埋門有質素嘅 finisher,但就換取到前場逼搶及更快速嘅反擊,以有系統及高強度嘅逼搶令車路士唔能夠輕易喺中後場組織攻勢。

圖片來源:曼聯官方 YouTube (https://www.youtube.com/watch?v=g1V3OFwUCrA)

曼聯嘅入球正正就係憑藉一次反擊取得:當時車路士角球攻勢完結,曼聯球員喺後場大腳解圍,從上圖可見辛祖、拉舒福特本身位置比車路士球員更後,但二人全速向前跑車路士球員只能食塵,辛祖把握佐真奴控失搶去皮球繼續推進並射破文迪十指關。從呢個攻勢可以見到今場曼聯就係要以速度壓制車路士,以反擊製造入球,雖然呢個入球都係多得佐真奴失誤加上車路士後防意外地空虛先會出現,但起碼今場嘅曼聯係見到有部署、有隊形。

總結
車路士雖然繼續保持近期不敗嘅走勢,但今場都見到唔少隱憂,例如係筆者喺上文提及到進攻球員唔夠可靠,同埋今場睇得出車仔球員開始因為比賽頻密而出現少少疲態,今個星期英超更有週中快車,且看杜曹能否調整好隊波嘅進攻同狀態;曼聯代任領隊卡域克總算喺執教嘅頭兩場比賽保持不敗,而且能夠令人有種耳目一新嘅感覺,但佢嘅考驗尚未完結,皆因周中佢哋將會喺主場迎戰阿仙奴,相信又會係一場惡戰。

大家嘅支持就係對我嘅鼓勵,如果大家想支持下我或者一齊講下波嘅,歡迎 like 我嘅 Facebook Page 同 Instagram!
https://www.facebook.com/blacksontalkball/
https://www.instagram.com/blacksontalkball/

如果喜歡我們的文章,請即分享到︰

標籤: 英超  車路士  曼聯  辛祖  佐真奴  

留言


請按此登錄後留言。未成為會員? 立即註冊
    快捷鍵:←
    快捷鍵:→