【賽後簡評: 利物浦5 -1阿仙奴】大屠殺方程式 = S23+GW5解放三叉戟 x 無敵鐵三角全面回勇


屌!好彩有開data睇!真係超級好睇,第一次覺得90分鐘咁快過!完全撳住阿仙奴泥踢,上半場失1球反cup 4球?!下半場好明顯收咗好多力,但係攻勢都係咁流暢。

極速入局、逼迫對手
今仗我哋之所以能夠屠殺對手,中前場嘅緊迫真係好大功勞。一開波已經chur到阿記有氣冇碇唞,頭兩分鐘已經逼到對面回傳失誤,輸個角球;阿仙奴後面一攞到波,我哋前場球員已經迫到上去,逼到對面完全做唔到波。

季初,我哋對阿仙奴個場,前面三叉戟完全啞火,把握力極低;中場亦都完全組織唔到攻勢,中間一俾對面迫就甩波。而今場我哋之所以能夠5:1屠殺對手,就係因為前面三叉戟全面回勇,同埋中場中場組織流暢咗好多。

S23+GW中場配搭,成功解放前場三叉戟
季初我哋一直話隊波中場,冇創造力同埋箍唔到波。而今場用沙基尼夾韋拿杜姆嘅組合,可能係我哋中場線嘅答案。沙基利完全解放咗前面嘅鐵三角,比啲波真係毒到:

46分鐘進場被文尼個球、
47分鐘放俾沙拿個球直線、
54分鐘同沙拿個幾腳one two...任你點樣去演繹,都係妙到絕嘅passing!


今場我哋進攻之所以咁流暢,另一個幕後功臣肯定係老母;覆蓋範圍大到,前面又見到佢做波,後面又見到佢做低對手,勁到好似食咗藥咁!我哋反擊可以打得咁流暢,好大程度因為老母 (Georginio Wijnaldum- GW)箍個波箍得好好,幾個人逼都護到個波;引咗對面幾個球員;製造到好多空間比前面沙基利、文尼、沙拿同費明奴做波。所以經常見到前面多打少,好似放題咁;左右前後都有選擇,變相提高咗前面嘅把握力。

前線三叉戟全面回勇
然後不得不提嘅肯定係我哋前面返晒嚟嘅、著晒火嘅三叉戟:文尼、費明奴同埋沙拿。三個今場集體回勇,而每一個嘅表現都超級抵讚!!!

首先文尼,除咗保持一貫銳利嘅持球突破,今場最抵讚係終於冇再係咁斷纜!交啲波終於到位,同埋踢得有冷靜左好多;該去嘅波去,唔該去嘅波回後、走位、拉闊進攻空間。

然後沙拿,感覺好似克服咗上季整親膊頭嘅陰影。終於敢用身體擔住對手,護到個波;冇再好似季初咁,一被對面拍埋嚟就失波。係前面用速度,反擊時俾到一個好明確嘅支點隊友俾交波。而且,真係個波真係黐腳咗好多。
(差啲吾記得提,沙拿除咗好波,肯定都係一個超級好嘅人同埋隊友。自己爭緊神射手,但係主動讓個十二碼俾bobby!呢個舉動真係Classy到爆!而半場番更衣室沙拿俾Sokratis推撞時,VVD、GW、軒神三個衝埋去幫沙拿,GW一嘢推開Sokratis個下真係好撚型!)

而今場前線最搶眼嘅,肯定係費明奴。一係唔入,一係一場入你3球。第二球一個扭跌三個,完全展現今場剃咗鬚嘅費明奴有幾fit!Fit嘅bobby,完全冇人可以取代,講完。

後防VVD配AB13依舊穩健可信
雖然阿仙奴今場中場線輸晒,但係其實防反做得好好;幾下已經錦到上呢。Iwobe前場支點做得好好,TAA有少少失位、而老虎雲轉身真係慢咗少少;對住有快馬嘅球隊,其實出老虎會有少少隱憂。假如Joe Gomez傷癒的話,肯定係拍V4嘅首選。

左邊後防,啫喱仔唔知係攰,定係俾對面踢到有少少傷;步頭同反應都冇之前咁Sharp,希望下場對曼城之前休息夠。至於VVD,真係無乜嘢好講;話佢係現時英超甚至世界第一中堅,都無有為過。59分鐘淡定叼住快馬奧巴美揚,食完身位、底線撈勻個波、再出俾啫喱仔;整套動作一氣呵成、瀟灑流暢到!直接由後場轉守為攻,亦都係點解我哋反擊會咁快嘅原因。

最後,艾利神。我再翻睇精華都係數唔到佢救助幾多球,啲判斷同反應好到!9分鐘雙手撲出Iwobe球柱邊、26分鐘神救唔知邊個個球越位頭槌、30幾分鐘球頭鎚解圍...我唔數啦,你哋自己補充啦!

總結
總括而言,今場利物浦整體表現真係超晒班;係球證Michael Oliver可能今場有少少主場雞,55波都有少少偏幫咗我哋。但係,就算沙拿個球比人踢咗3腳、都幾明顯係12碼嘅12碼唔判、文尼差頸俾番黃牌、沙基利下半場51分鐘禁區鏟跌對手,俾返十二碼阿仙奴;我哋依然贏得非常有說服力。

今場以兩隊嘅表現,完全唔似係聯賽4強對碰。完全係一面倒嘅比賽,睇住對面Leno都覺得慘...成班後防荒失失奇兵咁,煮重佢米...真係幾慘,硬食90分鐘;我無睇數據,麻煩師兄們補充我哋幾多次中龍嘅埋門(笑)。

題外話,琴晚係泰國南部嘅清真寺過夜嘅經歷真係好正!同一班回教徒一齊食飯、一齊係教堂入面打地舖。然後夜麻麻12點幾,睇住落後1球後3分鐘連cup5球大炒對手;想大嗌入唔敢嗌果種感覺真係好過癮!

然後中間用data睇到20幾分鐘,手機突然load唔到個下嚇撚死;以為用晒啲data,猶疑咗兩秒之後,即刻開data Hotspot用電腦睇,好彩load到 lol。唔撚理啦,用撚晒啲Data都要睇!!!真係好撚正!!!

BTW,多謝狼隊!領先熱刺9分,就算曼城今晚作客贏修咸頓,我哋都最少可以有7分嘅榜首優勢。但係,但係!飛機唔撚能夠打上腦,7分嘅差距,話蒸發就可以一下子蒸發。
下場4/1對完曼城,我哋仲要8/1對近期非常惡嘅狼隊(Sorry,7咗;8/1對狼隊為FA Cup第三輪賽事...😂)。如果呢兩場都頂到,先攞定紙巾都唔遲。哈哈,如果趕到我哋歷史性奪冠果時,踩到去利物浦;就真係有今生冇來世啦!!!Come On, Reds!!! Go Go Go!!!

諗起都好撚興奮,成晚興奮到瞓唔著 lol 今朝起身隻眼腫撚晒(笑,真係腫撚晒;好似俾人喎咗一錘咁)

但,值得嘅!真係,好撚正!Sor,今次篇文有小小長;因為太興奮,哈哈!!!鍾意利記嘅朋友兄弟姊妹,快啲like我個page啦。夜麻麻有人陪睇波吹水,真係好正。想睇我踩單車嘅遊記,都可以like我連一個Page:Steelpedaling;目前會keep住每天圖文更新,冇data另計。


最後最後,我認為每一個利迷都應該要like『利物浦 Liverpool Kop End』呢個Page。呢個Page同我冇任何關係,但係我真係好佩服做呢個page嘅利迷師兄(or姐?)。啲update快之餘,仲要足;睇佢肯花時間譯懷斯對比拿美個3part長文,就知佢哋真係好俾心機做個page。 (我用咗兩張呢個page嘅相,希望Kop End版主唔好介意)

Anyway,To 利迷 and Non利迷,Merry Christmas and Happy New Year !!! (就係佢搞到我對眼腫晒!!! lol)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Steve.J.Lam
    Steve.J.Lam 於 30/12/2018 評論 NO. 1

    飛機打得太撚早,好撚傷身架...

  • kinfung
    kinfung 於 30/12/2018 評論 NO. 2

    好過獌狗打都冇得打,上返前四再搵我地利迷講經啦廢柴

  • Steve.J.Lam
    Steve.J.Lam 於 30/12/2018 評論 NO. 3

    我諗要講聲我捧左28年利物浦既廢柴,kinfung仲有18場係咪太早下定論呢

  • Steve.J.Lam
    Steve.J.Lam 於 30/12/2018 評論 NO. 4

    我諗我1990年睇波,講經唔會唔夠講呀,奪冠太早下定論,未到4,5月我

  • kinfung
    kinfung 於 01/01/2019 評論 NO. 5

    sorry囉,感贏5比1人地寫文開心下啫,唔算打飛機啦(師兄有任何冒犯請包容,自膠;打錯自己人)

快捷鍵:←
快捷鍵:→