【賽後短評。羅賓漢-精準扶貧】

琴晚捱眼瞓睇呢90分鐘真係受罪。

幾樣嘢,首先,整體球隊表現。
第一,公道講句,史雲斯守得真係好好。對位上面,基本上史雲斯球員冇乜點甩個位,我哋完全冇機會係中間攞到波轉身;另外兩邊用翼衛,完全限制我哋文尼同沙拉。中間攞唔到波轉身、兩邊打唔到突破,基本上就係今場我哋進攻啞火嘅原因。

第二,無創造力。雖然對面係守得好,但係我哋作為要爭前四嘅球隊,對住榜尾球隊真係冇可能進攻打成咁。中間三個中場冇一個箍到波,攞到波轉身做波;兩邊閘完全冇突破能力,攞到波,連突破都無試過就會傳。。

係,人哋係擺到明大巴,但係作為前四球隊,我哋上半場連一球似樣嘅組織都冇,真係完全唔能夠接受。贏完曼城之後,大家都話冇古天奴冇問題;的而且確,對強隊、對面肯同我哋鬥攻嘅話,我哋前面有空位,進攻就自動波;但係對住鐵桶,我哋中間冇咗古天奴真係差好遠。


第三,部署唔夠針對性。好明顯史雲斯就係死守博攞一分,11個人堆晒係後面,我哋除咗最尾10分鐘,其餘80分鐘就係橫傳橫傳再橫傳;打到下半場費明奴甚至要落到防中個位做駁腳。如果問我,今場問題出係邊,我會覺得係排錯陣。

中場排三個CM,冇人做波係意料中事。對強隊同對弱隊真係唔好同一個陣,其實下半場換咗拉蘭拿入黎,對波好明顯生番好多,當然同Robertson終於肯試下突破同埋費明奴落嚟幫手做波有關。但係,就算拉蘭拿,都好明顯同古天奴腳下功夫唔係同一個level。

講完整體球隊戰術同部署,到個別球員表現。
第一,Karius,你真係可以番屋企食屎。全場,對面有威脅攻門就係得兩個(射中龍應該都係得兩次?印象中),兩球都唔知做緊乜。【第一球係高美斯走甩咗個球詐胡,連邊都扑錯】。上場對曼城又係咁,成場一球都無救個,有時我懷疑我哋係唔係真係有人守龍,同對面Fabianski真係差天共地。所以題外話,Fabianski有冇得諗?雖然最尾唔知做咩虛脫。

第二,Joe Gomez真係唔好再擺佢打右閘啦,唔該。除咗助攻能力係零之外,仲係防守定時炸彈。上場對曼城,第一球對Sane真係唔知點解可以頂漏,之後俾人追番1:1。今場個球由係,無啦啦落地鏟波,一唔中成條防線穿晒;如果唔係球證見到個波出咗丁丁底線,晨早輸緊一粒。唔明點解唔出TAA,助攻、走位、對位、後上傳中個腳都被高美斯好。

第三,Van Dijk高空波係殺晒,但冇可能要佢指揮埋中場進攻,今場三個中場好似隱咗形咁,完全唔合格。另外,Robertson上場打起左之後,有人話摩蘭奴可以放;我覺得絕對唔得。摩蘭奴同Robertson係完全唔同嘅兩種球員,一個攻強守弱,另一個調轉。對住鐵桶或者唔強嘅右翼,摩蘭奴同文尼啲疊瓦式同埋佢啲出波一定可以幫到手。而Robertson就留返對強隊快翼出。

最後,如果買唔到人,可以考慮費明奴墮後,Ings打最前,佢今場後備上嚟係打得唔錯,而且打法fit高普個系統,可以諗諗。你哋點睇?有冇睇到眼火爆?



啱咀形嘅,一齊入黎FB一齊吹兩咀啦。
loading

留言


請按此登錄後留言。未成為會員? 立即註冊
  • Mazda Chui 於 24/01/2018 評論 NO. 1

    分析得好!但點解高普諗唔到?

  • joesiu 於 24/01/2018 評論 NO. 2

    G12要雪一排,上兩場都出現問題
    加埋今場,實在要佢抖下
    如果M18+R26係一個輪換配合
    C2+A66亦可以考慮,而G12就可以收埋
    中場方面,冇左C10變左冇遠射去破大巴
    希望L20/C21或W5可以嘗試遠射打破僵局
    至於GK…老實講,話好講唔上,話差未至於
    主要係後防累死佢地比較多

  • wombat 於 24/01/2018 評論 NO. 3

    鬧得好! 成隊波踢到好似尋晚玩通頂咁。
    反而輸果球我覺得又唔怪得邊個,已經掙頂到,人馬疊疊入咗都冇得好講。 但整體發揮唔對版。

    利記巴禾機會真係夠喇,上面位師兄講佢中中挺挺, 但係利記嘅一號門神唔應該只係中中挺挺。 唔買籠點都應該畀丹尼禾特試吓啦啩

快捷鍵:←
快捷鍵:→