[全場終] 車路士 3-1 列斯聯--踩油踩到盡嘅藍色跑車

車迷Z 於 06/12/2020 發表 收藏文章
英超自武肺疫情以嚟第一次開放球迷入場,對喺史丹福橋嘅2000名球迷嚟講,今場大概係最完美嘅比賽。場面緊湊,全取三分兼聯賽登頂(我唔理俾我J到今晚),live action嘅久別重逢。就算係對電視機前嘅我哋嚟講,貨真價實嘅噓聲同歌聲,始終比後製加上去嘅artificial fan noises有血有肉得多。

loading

1️⃣ 跑動與跑動的對決

比爾沙麾下嘅列斯聯好撚跑得已經唔係咩新聞。球員走動配合嘅意識,隨時按照戰術需求換位嘅彈性,以及被操兩季幾後好到可以輕鬆跑足90分鐘嘅體能,呢隊波絕對能令任何一個對手嘅領隊頭痛。

車仔嘅戰術某程度上同列斯聯有啲類似。球員同球員之間嘅換位冇咁頻繁(認真,列斯聯嘅球員一場之內打三、四個位都好閒,凡人表示睇唔明),但同樣重視球員以跑動製造空位,以及前場逼搶反搶嘅重要性。既然車仔強項唔在於穩守突擊(雖然唔係唔得),冇得學水晶宮用low block然後4-1收死列斯聯,就只能正面對決地同列斯聯鬥跑。更有效地製造空位同攻勢,更有效地逼搶爭奪球權,實牙實齒地踢得好過對方就有得贏。

2️⃣ 簡迪、泰亞高施華——how we tipped the scale

位置同時間點唔同,但簡迪同泰亞高施華兩個都喺今場勝仗中扮演好重要嘅角色。一係防守嘅本職工作,二係靠帶波助攻去傾斜球權爭奪嘅平衡。

先講防守。面對列斯聯頻繁嘅換位同無止境嘅跑動反搶,泰亞高施華嘅指揮保持到車仔防線冇變形,而兩人喺防守嘅企位同攔截都非常穩固。泰亞高施華保持到此前嘅世界級水準,同埋簡迪轉型防中後嘅漸入佳境,都係令人振奮嘅消息。

再講進攻。車仔中前場同列斯聯中後喺相互鬥跑嘅較量中基本上人盯人或球員對位地對死哂,撇除對方犯錯同己方靈光一閃嘅傳波或走位配合之外,好難拉到太大嘅破綻出嚟。而簡迪同泰亞高施華喺比賽唔同階段嘅輪番助攻,一個小小+1嘅人數優勢可能就會打破平衡,解放到一個進攻球員有空位可以走可以出波。

當然,有利有弊,進攻不力然後被截波打反擊後防就少一個人。所以防守球員助攻時機嘅選擇,以及持球對皮球處理嘅decision making,就變得至關重要。而簡迪同泰亞高施華喺各自助攻期間都冇犯過任何錯誤,泰亞高施華帶波同傳波嘅波底甚至出色過英超唔少中場球員。

3️⃣ 左軚轉右軚嘅雲拿

講講進攻吧。今場正選陣容基本上full team,唯一差別係上場狀態大勇嘅基奧特取代艾巴咸正選,排陣上冇值得詬病嘅地方。跑動、變速、突破、傳波,都係正路嘅進攻模式,戰術上冇出咩奇招。有幾名球員嘅表現值得點評一下。

先講雲拿。薛耶治傷出後,普利錫入替,雲拿活動嘅範圍由左路移去右路。呢個臨時嘅變動換嚟嘅可能係今季我見過佢最活躍嘅表現。車仔左路嘅進攻模式比較著重進攻三人組嘅小組配合,留俾左翼嘅空間相對較少,對傳控同短距離盤扭嘅要求較高。喺球員能力嘅配置上,腳法出眾嘅普利錫比雲拿更適合踢左翼。

相對地,右路嘅進攻係薛耶治同占士嘅two man show,一個內線一個外線,進攻方式更簡單粗暴,而內線可供右翼活動嘅空間亦更多。雲拿其中一個技術特點在於其帶波速度甚快,而右路內線留俾佢嘅空位更適合佢嘅直路快放。雖然近幾場雲拿都有啲腳頭無靈(佢自己都可能解釋唔到嗰球角球遠柱佢補刀點解會失敗),但喺右路嘅進攻貢獻有目共睹,亦都好彩有個助攻落袋坐實佢嘅表現。

會唔會再喺右路見到佢?我覺得會,呢個位絕對仲有潛力可以挖。
4️⃣ 本季最大驚喜——列斯占士

好耐冇見過一個球員係,好似你每睇佢踢一場,佢就進步多少少,仲要睇唔到進步嘅盡頭喺邊度。季前大家最期待嘅閘位球員毫無疑問係捷維爾,右閘都仲係預期緊艾斯柏古達同占士會輪換。然而自從占士搶到右閘正選一席之後,就幾乎場場都有80分以上嘅演出,令林伯完全冇理由要擺佢去後備席。

第一球嘅助攻睇得出佢同薛耶治嘅默契。薛耶治帶波帶到某個位之後cup停,占士就用cup停嗰下列斯聯防線未反應到嘅時間差起跑落底,接應薛耶治恰到好處嘅直線落底傳中,再準確地捕捉到前柱嘅空位,然後預判基奧特可以走到前柱入楔。

防守表現更加唔使多講。身體質素上乘,回追速度同身位兼備,班福特自從先開紀錄之後全場俾占士食死,亦都唔係嗰種容易失位但勉強靠屈速彌補嘅後衛。如果占士可以保持呢個進步嘅進度,英軍最佳右閘嘅寶座好快就要換人。

5️⃣ MOTM: Reece James

人選太多。基奧特搶點同射術都寶刀未老,泰亞高施華同簡迪嘅表現令人放心,莫特每場都穩定地交出85分嘅表現已經唔係咩新聞。但以一己之力打通一條邊路,再拉扯到大量空位俾雲拿,占士嘅演出可謂完美。

(P.S. 送上最愛嘅藍色跑車俾大家)

請支持Facebook專頁「車迷Z」!

如果喜歡我們的文章,請即分享到︰

標籤: 英超  賽評  車路士  列斯聯  

留言


請按此登錄後留言。未成為會員? 立即註冊
    快捷鍵:←
    快捷鍵:→