出奇制勝馬德里打比戰

最近五次作客卡達朗球場,皇馬只取得2和3負的戰績。一面倒嘅往積,再加上眾多主力近期遇上傷患困擾,令皇馬於本場馬德里打比戰於賽前蒙上陰霾。一場乾淨利落嘅0:3,意義比3分更大。

過去兩周的國際賽時間,皇馬秘密練兵,賽後伊斯高表示球隊於過往這個星期一直為這套陣容作準備。初見正選陣容時,以為只係普通的433戰術,誰不知施丹祭出442(甚或是4411)作賽,神來之筆用伊斯高打輔鋒,切底激活最佳表現、用華斯基斯和巴利打兩翼成功協防及牽制對手,加上極為專注的高昂士氣,令皇馬最後一次作賽卡達朗球場留下勝利戰績。

伊斯高的最佳表現
於這場6分波比賽裡,伊斯高交出堪稱皇馬身涯中的最佳表現,不單為球隊拉開積分榜距離(與巴塞相距4分、馬體會9分),亦令施丹和球迷投注更大信任。

此役伊斯高擔任C朗拿度身後的男人,潛伏於前鋒身後,換來極大自由度。賽後的heat map顯示,伊斯高嘅走位範圍遍及全場,四處可見伊斯高現位接球。是役皇馬第一個攻勢,就來自伊斯高於中線五五波之爭拼搶而來,然後挑過對手再分邊比馬拉路傳中予C朗頂頭槌,惜被神勇的奧巴勒救出。重有一球喺中場起步接應長傳,癡實皮球雖然最終one-on-one射飛(被判越位),但可見本場伊斯高的跑動範圍之大。

施丹亦認為埋伏於前鋒身位係伊斯高嘅最佳位置,能夠發揮技術優勢和精妙傳球,例如上半場就有一球就接應巴利頂波橫帶中路,於禁區頂放直線僅僅穿過沙域,可惜接應嘅C朗射太正被接實。下半場77’ 伊斯高於中圈力度剛好的分球,造就巴利快放桑法蘭傳中予C朗射入第3球。

本場伊斯高的表現實在無愧於魔術師之名,每每於皮球飛來飛去之時為球隊提供一個穩定的控球點,幾難控嘅波都可以控得到,甚有大將之風。正如施丹所講「伊斯高於上半場嘅控球做得非常好,沒有一球於佢腳下失去」。

除左進攻端有上乘表現,防守端亦見伊斯高拼盡全力,前手控球就立作緊迫,即使被扭過亦會回追搶截,甚至追到角球旗。例如下半場有球於中場盤帶後摔倒失去球權,伊斯高亦毫不猶豫回追到禁區頂,與隊友包夾成功。

毫無疑問,輔鋒位置使伊斯高發揮更好,但正如施丹於賽後所講,呢套陣容未必會長久使用,伊斯高唔一定能夠每場都於自己嘅最佳位置比賽。今晚能夠有如此出色表現,相信更重要係伊斯高心態嘅改變,變得相信自己、唔再猶豫。佢嘅表現令筆者想起兩年前嘅迪馬利亞,亦曾處於邊緣位置,但把握時間於攻守兩端展現自己的影響力,最終成為正選奪冠而回。希望伊斯高真係如自己所講「這是我感到最舒服的位置,但我唔想用黎做借口,我會盡我所能去參與每場比賽」。
兩翼的防守意義
馬體會非常擅長於邊線用疊瓦助攻、交叉走位等戰術打亂守方部署,於左右兩路輪流發難。由其馬體會兩閘的助攻力度好強,上屆歐聯決賽馬體會嘅入球就來自右閘桑法蘭傳中予左翼卡拉斯高射入。

以往皇馬打433,馬些路和卡華積往往要面對2打1嘅疊瓦進攻,但本場皇馬使用442陣式,摩迪和高華錫嚴格站住中場中路,絕少離開位置,提供球隊所需的平衡。專注從兩翼製造攻勢,同時牽制對手閘位的助攻。

本場馬體會大部份攻勢都於左路發起,菲臘比和卡拉斯高頻頻發難,但勤力的華斯基斯積極協防,時不時與卡華積和摩迪2人甚至3人夾擊。即使本場華斯基斯於攻擊端表現受制,但其於防守端的貢獻巨大,不容忽視,全場走動距離領先全隊,足見華斯基斯的勤奮。

至於馬體會右閘桑法蘭基本上未見過佢成功助攻。下半場馬體會壓前打算助攻就被巴利放甩助攻C朗射入第三球。巴利的身型和速度毫無疑問令桑法蘭處於進退兩難嘅局面:「究竟攻定唔攻好?如果攻唔入,點追得到巴利?」相信呢個dilemma整晚都浮現於桑法蘭和施蒙尼的腦海中。

Where are my haters
本場射入3球後,C朗回到西甲射手榜的熟悉位置——榜首(8球)。連同先前的國際賽,一下子連入5球。射入十二碼後一到攝影機前凝視鏡頭,仿佛想問「where are my haters?」

事實上C朗此前表現有失水準。9場5個入球5個助攻,數據唔差,但細看比賽狀態就略顯有心無力。昨晚打9號位嘅C朗,縱使鋒線無左賓斯馬和巴利,但換來極大嘅自由度。一開波就見C朗神采奕奕的表現,中場頻頻盤球加速,常見於左、中路配合協助保持球權,走位範圍靈活,甚至積極協防搶斷。開場頭頂就差點收死奧巴勒、及後罰球射中人牆入球、加速避開沙域博得十二碼、全速跟進巴利把握機會射入第三球,全面表現成功令Haters消失。也許最能激活C朗嘅,始終係Haters嘅關照。

今場的帽子戲法亦令C朗超越迪史堤芬奴,以18球成為皇馬史上於馬德里打比戰射入最多入球的皇馬球員。賽後施丹亦好識做咁講到:
「今晚結束了討論,足球先生將會係C朗拿度的」
「對此我從未有過疑問,我並非因為佢所入嘅三個入球而改變諗法」
「我地對佢期望好大,但佢永遠於所有人之上」

必需的士氣
本場皇馬打出本季為止最佳的表現,同時展現出一隊冠軍球隊必須要有嘅元素:節奏調控、自信、士氣和運氣。

自開場起皇馬就把持住比賽的節奏,哨聲一起即可見球隊傳球走位動作更快更爽,快得黎亦唔會盲目打快攻,控球時會見到好快有隊友前來做三角短傳協助保持球權。

帶幸運成份嘅入球造就馬體會早早進入全民進攻的戰術,基本上形成424陣式。被圍攻之下皇馬依然保持高昂士氣,車身解圍屢見不鮮;頂高空波扯到行哂,跳得最高都係華拉尼、拿祖、C朗同巴利;五五波去盡無縮,即使伊斯高同高華錫呢類「斯文」球員亦無鍚身地每球爭頂;中堅不斷壓前,縮窄防線與中場線的距離,令基沙文和托利斯好少舒服掂波;下半場基沙文頻頻於中路發難,亦好快有兩至三位皇馬球員組成血肉城牆夾擊防守。

鐵血的表現讓皇馬嬴得球迷的掌聲和尊重,賽果出乎意料之外,但令人心服口服。西甲征途進行了12場,本場士氣波相信會大大增加皇馬的信心和決心。

最後亦有幾點係今後皇馬需要留意的地方。例如中堅貼實前鋒壓前時,未有防中填補空位,8:00’ 華拉尼為緊迫托利斯被拉到邊線,薩爾隨即利用該空位前插,接應高基直傳車身窩利形成馬體會第一個攻門。非正防中嘅球員要於比賽時極短時間內有意識補位,仍然係好困難,但於卡斯米路復出前都需要考慮這一點。同樣地,本場卡拉斯高掂波時往往有2至3位皇馬球員招呼,咁表示馬體會當時有2至3位球員無人看管。

本場過後皇馬的戰術優劣定必被放於顯微鏡下分析,遲早會有球隊利用呢點攻擊。所以本季要駛得萬年船,仍然要專心一致、小心部署。


伊斯高 本場個人精華
https://www.youtube.com/watch?v=0Zjt2WQ5nRI

C朗拿度 本場個人精華
https://www.youtube.com/watch?v=c-1vJ5Ksup4

留言


請按此登錄後留言。未成為會員? 立即註冊
  • Hola Konichiwa 於 21/11/2016 評論 NO. 1

    Bale 的無私奉獻

  • hoyin ting 於 21/11/2016 評論 NO. 2

    本來我就覺得皇馬應該踢442或4411,因為c朗放正前,基本全能,輔鋒位人選一大堆, 巴利放後一格,食回老本行,能攻助守更方便,雙前鋒更拉到空間比邊路突破,但自己要中場中2人作就犧牲,他們就不會像3中場般插來插去,只能固守中路,作輔助之用,防守為主

快捷鍵:←
快捷鍵:→