【專題文章】1718球季 車路士轉會市場總結及陣容分析(下) - 險簽及輸出篇 文字

藍獅於 09/09/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

請先睇上篇【專題文章】1718球季 車路士轉會市場總結及陣容分析(上) - 收購篇

講完收購之後,就係時候講番一啲潛在而失敗既收購,以及一啲球迷覺得可惜既放售球員。車路士高層一連串「有計劃」既排山倒海式輸出球員,明顯配合近年量入為出政策以及為來年興建新球場籌集資金而鋪路,先放後買當然係存在唔少風險,尤其係對於人手不足既車路士黎講絕對係令球迷提心吊膽。事不宜遲,即刻開始險簽及輸出篇。
.圖片來源 : Metro

都係由後場講起,放走艾基絕對係令球迷感到無比可惜,球員在上季外借般尼茅夫時經已証明自己能夠在英超立足,無論速度同位置感都比到人穩重既感覺,至少整體表現及能力都比起傷癒復出既蘇馬更好,但為何會選擇讓佢以破般尼茅夫轉會費記錄加盟而不是外借,反而法國人能夠續約外借到史篤城。小弟並唔係話應該賣走蘇馬,只係認為佢倆與及已回收既基斯甸臣都係車路士未來既後防三子,難得艾基有潛能也是青訓之一為何會得到賣走收場?
.圖片來源 : Daily Express

翼衛上既補充其實喺上季中段已經見到,而車路士亦都好快跟祖雲達斯既阿歷士辛度拉上關係,球會一次報價比一次高亦無阻老婦人既堅定之心,相信球迷亦唔希望球隊用一個天價收購佢番黎,始於實力上雖然馬高斯阿朗素與辛度之間存在距離,但直接將前者放到冷板凳又實在不公。反而要講既係張伯倫,其實佢唔選擇續約阿仙奴既傳聞已經唔係一時三刻既事,何解球會要去到轉會窗關閉前數天至提出報價?
.圖片來源 : Skysports.com

收購張伯倫失敗表示出兩個重要要素,首先証明左即使球會送上既合約條件豐厚,球員亦可以因為考慮其他因素而選擇他投,哩一點無疑係狠狠地摑了藍軍高層「一巴掌」。另一方面既係貴為上屆英超冠軍車路士,為何吸引力會比到外界以至目標球員都唔係首選或者夢想加盟球會?係主帥干地既魅力上拍不上一眾列強領隊?還是欠缺變換既陣式長期使用「勝利十一人」導致目標球員卻步既地方?沒有絕對答案,只係比個機會球迷反思想一想。

去到中場方面,集中於查路巴同馬迪既離隊,先講前者,好大程度係由於球員需要上陣機會,所以即使球隊開出高薪合約亦遭到推拒,而干地及後亦有表示年青人欠缺耐性,同時潛力上未有當年帶領祖雲達斯時普巴既級數,明顯指出即使車路士青年軍在過往歐洲賽上表現不俗,當中個別球員亦未達到干地心目中既上陣標準,既然佢地覺得等唔到機會,咁就只好放行離隊他投。雙刃劍下年青球員不斷外借對球會既忠心究竟有幾多,大家亦知道的。
.圖片來源 : 90Min

到後者馬迪,外界唔少聲音見到佢轉投曼聯後表現十分理想,更指出摩連奴至擁有「使用說明書」,車路士放走佢絕對係損失。理性討論下,論點都季中所講既一樣,球員只係活在簡迪既陰霾下被迫半改造,一直都唔能夠打番自己最好既位置同職務,尤其喺同鄉兼當時副隊長伊雲奴域離開後狀態更每況愈下,以一個唔錯既價錢離開其實對雙方都係好事。反而哩單交易另有重點,就係連干地都唔知道自己既「首席十一人」其中一員會離開,更直接落入競爭對手曼聯當中,相信決策權好大程度係由油王艾巴莫域治主宰,但連主帥都唔知情究竟又係咩玩法?
.圖片來源 : Goal.com

而中場潛在收購方面就不得不說愛華頓既巴克里,轉會窗結束前經已傳出球員進行體檢,相信唔少球迷認為佢會同真禾特一齊加盟,估唔到最後竟然會以失敗告終。事後巴克里自己出黎解話指出並沒有同任何球會接觸,好讓一切留待自己傷癒及一月轉會窗重開再續,可以話令不少「跟車太貼」既球迷一地眼鏡碎。預測巴克里喺一月會否加盟好大程度取決於球隊上半季中場人手既表現,如果經已出現傷兵或者真禾特既發揮過於惡劣,相信即使與熱刺競爭,車路士亦在所不惜。
.圖片來源 : ESPN FC

其實如果一早已經知道巴克里拒絕接受報價及體檢,為何車路士不向已外借轉投到史雲斯既連拿度山齊士埋手?葡萄牙人特性上正正係藍軍所缺少的,同時具備優厚既身體質素、速度爆炸力以及用不完氣力,既然球員亦想外借到英超,而原屬球會拜仁亦有意放行,雖然史雲斯領隊基利文與拜仁領隊安察洛堤什有交情,但唔相信車路士比起史雲斯既吸引力低。
.圖片來源 : Swansea City

至於攻擊線上,盧卡古被曼聯截劫相信唔會覺得可惜,反而最令人氣憤既係洛蘭迪唔能夠加盟,可能有球迷會認為不應花在一名三十有二歲既中鋒身上過多金錢,但其實一隊球隊擁有三名前鋒是基本的,如果賽季當中莫拉達受傷患所困,同時巴舒亞伊仍未能適應戰術,車路士付出既代價將會更大,而且洛蘭迪在祖雲達斯已經與干地合作過,如果意大利主帥真係需要的話一定係岩用先買,最終被熱刺搶得「心頭好」實在難掩氣憤。
.圖片來源 : Metro

雖然整個轉會窗車路士喺收購上其實表現合格有餘,但承諾干地再有三人加盟既目標其實未有達成,再者下季轉會窗將會在開咧前關閉,如果高層繼續維持哩種作風,就只會有更加多目標球員比其它球會捷足先登。

文章最後更新時間 : 10/09/2017 22:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言

會員
我要評論
請按此登錄後留言。未成為會員? 立即註冊
  • Darren C.
    Darren C. 於 09/09/2017 評論 NO. 1

    筆者幾中point 不過我認為唔追Sanchez係好事 因為Sanchez被借好主要原因係需要上陣時間 望望車仔條中場線 其實球員自己都唔會想同4個人爭位

  • Darren C.
    Darren C. 於 09/09/2017 評論 NO. 2

    反而今季最失望既係放走Ake 同埋買唔到獅王 其次就係Ox想踢中場 個人認為應該全力追Ox而唔係Drinkwater 始終Ox比較上更全方位 雖然傳送上無drinkwater咁好 但係隨時可以補埋翼衛/翼鋒位 買黎做sub係一個唔錯既選擇

  • 葉家灝
    葉家灝 於 10/09/2017 評論 NO. 3

    差個前鋒同左邊衛

  • Ryo Ng
    Ryo Ng 於 10/09/2017 評論 NO. 4

    每況愈下

快捷鍵:←
快捷鍵:→