五年前嘅「未來熱」，成材了嗎？ 精選 推薦

不經不覺，李斯特城奪冠已經係5季前嘅事。當年嘅李城固然係主角，當季傳統強隊齊齊失準下，同李城咬得最緊嘅就係普捷天奴執教嘅熱刺。雖然佢哋最終失落冠軍，更加被球嘲笑喺雙頭馬車嘅情況下跑第三(Finished Third in a Two-Horse Race)。但係當時以年青陣容為主嘅熱刺的確值得嘉許，而且之後兩季都有唔錯表現，有一次第二丶 一次第三。時至今日，當年「十八廿二」嘅小將已經踏入當打之年，「肥普」亦早已離隊。到底佢哋之中有幾多個人成到材呢？呢篇文章會同大家講下15/16球季熱刺主力嘅近況。

門將5年前28歲嘅洛里斯，係隊中較年長嘅一位。呢幾年一直係熱刺隊長。雖然近年試過因為傷患，缺席部份比賽，但係只要佢健健康康，基本上冇人可以動搖佢嘅位置。對上兩季，佢嘅預計失球比實際失波多超過七球，意味主洛里斯成功救出好多有威脅嘅射門，表現係英超門將之中較為出色嘅一位，而喺出產大量好球員嘅法國隊入面，佢嘅正選位置亦穩如泰山。近兩年睇佢都少咗派膠，更加係2018年FIFA最佳門將。雖然佢而家已經三十有三，但係門將職業壽命普遍較長，相信仲可以踢多一段時間。
後衛
當年嘅左閘人選係丹尼路斯同賓戴維斯。雖然前者出場時間較多，但係我認為兩人能力唔係相差太遠，只係打法有唔同。仲記得以前打機，丹尼路斯同基爾獲加兩者閘跑得快，又好好用，現實中兩人都曾經為國家隊上陣，而家獲加去到曼城有穩定發揮，但係丹尼路斯呢幾年嘅進步唔大。喺普捷天奴被炒後，上陣機會少之又少。上年下半季更加被借走，如今甚至冇被列入熱刺25人名單。
至於一對中堅，當年熱刺最佳球員，現今31歲嘅艾達維列特仍然在陣，係上年上陣時間最多嘅熱刺球員。喺後場組織，向前傳等有好大貢獻；而33歲華湯根去到生涯晚年，免費轉會到賓菲加。

中場
以往艾歷迪亞打防中比較多，所以將佢放喺呢度。五年前佢仲係21歲，身型係佢一個幾大嘅優勢，所以當時認為佢只要累積多啲經驗，將會係一個唔錯嘅防守球員。雖然佢喺高空波方面係更進一步，呢兩年嘅爭頂成功率超過六成，但係下三路欄截等，就唔見有咩特別進步，表現同預期有出入。

當年23歲嘅艾歷臣係當年期望較高嘅球員之一，五年前已經交出13個長攻，長傳，遠射，死球都好標青，更加曾經同皇馬拉上關係。對上兩年佢的確係世界一線中場，但係隨住普捷天奴落台，佢嘅高峰期亦同時結束。佢同樣唔受摩連奴重用，被投閒置散下，好快就轉會到國際米蘭，但係睇嚟唔太適合干地踢法，都係後備上陣居多。28歲本應係足球員當打嘅年紀，現今佢嘅情況卻相當尷尬，實在可惜。

至於另一位攻中阿里，表現更加令人失望，喺摩連奴執教初期，阿里一度受到重用，第一場摩連奴領軍嘅比賽，阿里更加有一個助攻，但係之後，佢亦都無法受到重用。喺熱刺嘅紀錄片入面，摩連奴講到阿里好懶，應該要對自己要求高啲，相信阿里失寵嘅原因都呼之欲出。如果要用一句說話形容佢，我會話「一剎那光輝唔代表永恆」。

順便講下後備球員賴恩美臣(Ryan Mason)，踢完15/16球季後，佢就轉會到侯城，但係喺2017年初，佢同車路士嘅卡希爾相撞後重傷，最終被逼退役，佢唔係熱刺小將中最好波嗰個，但真係最不幸嘅一位。

前鋒
講完幾位令人失望嘅球員，當然都有成材嘅例子。而講到成材例子，就一定要講到哈利簡尼，一個射術出色嘅球員，喺邊個領隊下都可以有貨交，無論係肥普定摩佬，甚至係英格蘭領隊修夫基，佢嘅表現都會受外界肯定：18年世盃金靴丶兩屆英超神射手，為熱刺攻入超過200球，相信數字已經為佢說明一切。今季佢嘅助攻數字更加有所上升，可見踢法越嚟越全能。

當時另一位正選球員拉美拿，喺五年後仍然喺熱刺，但係隨住幾位高質素翼鋒加盟，佢凹經失去正選。即使係咁，摩連奴都幾器重拉艾拿，因為佢甘願做好多Dirty work，而且好肯回防，附合摩佬口味，暫時喺熱刺嘅定位係一個配角，未算成材，但係本來外界對佢嘅期望都唔高。另外，孫興民當年已經踢熱刺，但係名氣，上陣時間都冇而家咁高。時至今日，佢已經係最好波嘅亞洲球員，亦係熱刺不可或缺嘅球員之一，相信最有驚喜嘅球員非佢莫屬。