阿積士已經搵到新一個薛耶治?

黃足坑 於 26/10/2020 發表 收藏文章
之前嘅轉會窗,阿積士放走兩大中場主力:雲迪碧克同薛耶治。為咗填補前者嘅空缺,荷甲班霸搵咗27歲嘅卡拿臣回巢。不過呢位踢過愛華頓同雲達不萊梅嘅中場,外流之旅表現唔算出眾,所以佢嘅加盟唔太令人驚喜。反之,佢哋喺巴甲聖保羅簽入右翼安東尼(Antony Matheus dos Santos),喺荷甲幾場嘅表現越嚟越搶眼,可以話成功取代離隊嘅薛耶治。

上季薛耶治打右翼嘅殺著,係左腳內彎傳中。上季歐聯分組賽對住車路士時,呢一招令藍軍後防受到好大威脅,相信佢哋唔多唔少因此決定將薛耶治簽入。而同樣係左腳打右翼嘅安東尼,一樣擅長左腳內彎傳中。上週末大炒芬洛13球嘅比賽入面,安東尼取收獲兩個助攻,其中一個就係嚟自左腳傳中。安東尼嘅傳中,落點恰到好處,造就入波之外,都有其他為數不少嘅傳中,創造大大小小嘅機會,睇波嗰陣覺得好有前輩薜耶治嘅身影。
https://i.imgur.com/THpALz9.gif

作為巴西球員,佢嘅控球技術都有返咁上下,雖然較少見到佢一個扭幾個,場均只係有1.8次成功過人,但係從場上舉動所見,佢嘅技術細膩,基本功比場上其他球員好。有時甚至見到佢一啲花巧動作,甚有巴西球員嘅味道。雖然頭先講到佢過人次數唔算高,但係過人成功率卻唔差,有73%,比占士洛迪古斯丶沙拿丶列貝利好,亦比薛耶治上季踢荷甲時踲數據高。有趣嘅係,今季尼馬同美斯嘅過人成功率分別只有62.5%同58.6%。當然佢哋身處唔同聯賽,對手有強弱之分,唔可以直接比較。但係呢項數據或多或少顯示安東尼都係一個擅扭之人。
https://i.imgur.com/AMAEskO.gif

安東尼嘅入波能力都唔錯,荷甲6場比賽入咗4球,喺隊內射手榜為列次席。安東尼射門以中遠距離為主,用左腳擺大位射波。我認為安東尼射波都算幾大力,試過射到龍門甩手,令前面隊友執雞。另一方面,佢射門角度亦都唔差,好似前一場荷甲,佢對住海倫芬所入嘅一球,射門盪到最遠,令龍門鞭長莫及。
https://i.imgur.com/VmAttSW.gif

總結
安東尼同上季嘅薛耶治踢法相似,長傳遠射乜都有啲。但係安東尼喺球阿積士時間尚短,又未喺歐賽上陣過,要評論佢有冇薛耶治咁高嘅水準,仲係言之尚早。不過佢比薛耶治優勝嘅係速度更快丶年紀更輕。而家佢只係20歲,能力上仲有好大上升安間。上場睇阿積士對芬洛場波,見到阿積士好多攻勢都係嚟自右邊,安東尼已經係隊中其中一個攻擊泉源。接住嚟嘅歐聯比賽,如果佢獲派上陣,不妨多啲留意佢。
標籤: 阿積士  荷甲  歐聯  安東尼  

留言


請按此登錄後留言。未成為會員? 立即註冊
    快捷鍵:←
    快捷鍵:→