八發八中！拆解般奴十二碼招數 精選

般奴費南迪斯(Bruno Fernandes)雖然只係效力曼聯半季，但叫佢做紅魔今季最佳球員都唔會有太大異議。葡萄牙中場唔單止成位球隊核心，為前線提供彈藥，更加能夠激活普巴，令呢位麻煩友嘅表現提升不少。唔講唔覺，原來般奴對上五個入波都係嚟自十二碼。而總結成魔半季，般奴十二個入波之中，有八球都係十二碼，而且無一射失。今日我哋就研究下佢嘅十二碼射法。

筆者劣作，希望唔好介意設計咁差

首先講下般奴嘅射門位置分佈，八球入面，有七球係射龍門右邊。主要係射地波。就咁睇般奴射波唔算去得好盡，角度，力度都唔算刁鑽。其實有留意開都知道，般奴射十二碼唔係靠大力，而係靠跳住嚟射嘅“特別技巧”。

一般門將救十二碼習慣喺攻方射之前撲，希望可以伸到盡撲到角度刁鑽嘅射門，平時睇新聞話門將收埋紙仔，記住主射球員射門習慣等，就較易估中對方射碼方向。但般奴並唔係以傳統踢法操刀，而係透過窒步等減慢射門流暢性，等到最後關頭，龍門郁咗，再去射另一邊，由於門將已經落咗地，般奴唔需要射得好盡或者好大力都可以入波。https://i.imgur.com/5B7d0sq.gif
https://i.imgur.com/SDlZl72.gif

咁咪同佐真奴(Jorginho)射法好似？
https://i.imgur.com/aqiHCaS.gif

的確，佐真奴同般奴嘅射門方法好相似，大家都會等到最後一刻，但係我認為般奴嘅十二碼甚至比佐真奴多變。如果大家記得18/19球季，聯賽盃決賽對曼城 (Kepa 拒絕換出嗰場)，互射十二碼階段，佐真奴對艾達臣。佐真奴希望重施故技，但艾達臣亦做足功課，喺佐真奴射波前未有任何動作。最終佐真奴不知所措，細力射個地波，被艾達臣輕鬆擋出。另一邊，睇咗般奴踢半季曼聯。我發覺佢冇呢個問題。https://i.imgur.com/W6mvz9e.gif

般奴一樣面對過“敵不動我不動”嘅門將，就好似最近對西維天嗰場，門將等到最後一刻先起步飛撲，般奴根本唔可以根據守門員反應而射去另一方向。呢個情況下，般奴即使跳起，都仍然可以大腳將個波抽埋去。就好似一般球員嘅射法，雖然有機會被守門員捉到路，但兩招加埋，般奴已經將門將撲救機會大大減低。而佐真奴似乎學唔到般奴嘅第二步。https://i.imgur.com/oJdH.gif

以我踢過多年衛生波經驗，跳起後射波好考球感同腳力。如果唔係長年練習，相信般奴好難做到例無虛法。真係估唔到射十二碼都咁有學問。