馬國腳向葡超外闖 相比下香港足球被趕過

黃足坑 於 08/10/2020 發表 收藏文章
香港人未必會關注東南亞國家嘅足球新聞,不過馬來西亞向來係港足嘅對手,無論係球會定係國家隊層面都經常對壘,對上兩年,傑志同大埔曾經作客馬來西亞,進行亞冠盃外圍賽,不過都係輸波而回;而喺2017年,香港對馬來西亞兩度交手,當時香港取得一勝一和。而今日想講嘅球員,當年亦有喺香港大球場上陣。

嗰位球員就係柔佛右翼Safawi Rasid,佢日前就外借到葡超嘅樸迪莫倫斯一季,並設有買斷條款,踢得好嘅就可以留低。Safawi Rasid 係而家馬來西亞國家隊入面,唯一一位喺歐洲外流嘅球員。

樸迪莫倫斯近年經常喺亞洲搵球員,出名嘅包括喺廣州恆大簽入積遜馬天尼斯,喺FC東京簽入中島翔哉等。而家效力港超理文嘅中村佑人都曾經踢過樸迪莫倫斯。佢哋今年除咗Safawi Rasid外,亦喺浦和紅鑽借入前鋒法比斯奧同後衛安東尼奧。不過,樸迪莫倫斯當然唔會因為某個球員同亞洲足球有關,就將佢收歸旗下,最重要都係球員質素同能力。

馬來西亞嘅足球水平日漸提升,國家隊方面,佢哋由幾年前輸俾香港,到去年11月贏到泰國,喺世盃外圍賽G組暫時排第二,成績好過泰國同阿聯酋。球會嚟講,Safawi Rasid 前球會,馬超班霸柔佛上年亞冠分組賽攞到四分,今年停賽前都贏過水原藍翼。而Safawi Rasid 作為當時柔佛主力之一,又喺亞冠入過波,同時係國家隊常客,更加係馬來西亞兩屆足球先生,而佢只係得23歲。筆者甚少睇馬超比賽,但有喺亞冠留意柔佛,佢嘅表現的確係好搶眼。下面就有佢嘅球王片:

其他東南亞國家嘅風光,正正反襯出香港足球嘅下滑,香港外流球員唔多,「俾盡」都只有戴偉浚喺歐洲上陣過,如果大家唔計佢做香港人,我哋香港嘅球員,最多只能夠喺中超同中甲立足。人哋喺亞冠嘅表現每年進步,而我哋仲係講緊鄭展龍兩年半前嘅金球。作為香港球迷,雖然點都會支持香港球員,但又好清楚我哋越嚟越被鄰國比下去。見到人哋有球員成功外流,總會不禁想問:點解人哋做到,我哋香港唔得?

如果喜歡我們的文章,請即分享到︰

標籤: 馬來西亞  樸迪莫倫斯  葡超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→