里昂雖有備而來,始終技不如仁

黃足坑 於 20/08/2020 發表 收藏文章
嚟到歐聯第二場四強比賽,由里昂對拜仁。兩軍正選陣容同戰術都冇明顯變動。按人腳同牌面當然係拜仁佔優,但拜仁同曼城有著相似之處:兩者都以高位防守,中堅都會企到中場線附近。上場里昂就係成功靠反擊同速度打贏曼城,所以我對佢哋能照辦煮碗抱有期望。


果然,主攻嘅拜仁兩閘如常壓前,中場線後只得龍門同兩名中堅。拜仁兩翼企位較窄,令兩閘有成條邊路發揮。加上利雲度夫斯基同梅拿,拜仁可以有六名球員企喺進攻前線。主守嘅里昂排出3-5-2陣式,今場兩名翼衛當然守多過攻。當拜仁大軍壓上時,里昂只好放棄防守遠邊,或者靠中場負責其中一員,就算拜仁冇六個上晒,人腳質素有別之下,里昂面對5打5防守都較為辛苦。慶幸嘅係,初段戰術都叫奏效,力保不失,仲有反擊機會。
圖中見到拜仁六名球員壓上前線,進攻球員之間經常走位同互換為置。里昂球員已經叫盡量跟住,嚴格嚟講係跟唔實最右邊嘅利雲。不過呢球拜仁冇傳上去,選擇中場睇定啲先。


里昂幾次攻勢都係長傳反擊,迪比射門唔中目標,托高伊甘比更加只係僅僅中柱,只可以怪里昂把握力未到一線,佢哋攻門機會唔多,浪費咗未必有下次。果然,托高伊甘比中柱之後,輪到拜仁反擊,基拿比內切,梅拿移去右路為佢拉開空位。格拿比勝在夠快,身後里昂球員根本追唔到,餘三位後防球員又有防守冇標,唔可以胡亂標出嚟。就係咁拜仁就領先。


至於第二球,基拿比搶到哥列特波後,都係內切,今次由利雲移去右邊。里昂中場球員都係追佢唔到,比列錫成功走甩迪尼亞,接應傳送再傳中,由基拿比把握門前混亂射入第二球。可以話兩球入波方法好似。其實拜仁唔止呢兩下攻勢,唔係梅拿同哥列斯卡突破防線後射門撻Q,呢場波可能半場已經放得入雪櫃。


面對拜仁嘅逼搶,里昂就算被逼進攻,都唔容易保持控球在腳,只可以靠長傳搵迪比以及托高伊甘比。雖然落後,戰術都係冇乜變動空間。換邊後拜仁兩閘明顯減少上前助攻,加上用蘇利換走速度較慢嘅保定,里昂靠快打破防線嘅效率越嚟越細。57分鐘,襯蘇利失誤,托高伊甘比都有個直接面對紐亞嘅機會,可惜都係唔入。就算拜仁防線返齊嚟,里昂下半場都偶有攻勢,奈何都係差一點點,去到88分鐘罰球傳中再輸一球,利雲被兩個守衛夾住都成功頂入,咪就係把握力分野囉。

里昂戰術上已經冇乜差錯,成功針對拜仁踢法防守,但球員質素被比下去。回想成場比賽,如果里昂初段把握到,入到一球,場波結局就好唔同喇!不過無論如何,里昂今季絕對係超額完成。決賽將會係巴黎對拜仁,究竟巴黎對住如日方中嘅拜仁會選擇鬥攻定反擊,速度同射術更勝一籌嘅麥巴比又可唔可以打破高位防線嘅缺口呢?

如果喜歡我們的文章,請即分享到︰

標籤: 歐聯  里昂  拜仁  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→