明明數據勢均力敵 修頓點解會大敗收場?

黃足坑 於 22/09/2020 發表 收藏文章
上週英超有好多場大手交易,包括修咸頓主場對熱刺呢場。比賽結果係2:5。但係從各項數據睇嚟,修咸頓其實不落下風:傳球數量362對336;射門13對9;預計入球2.47對2.24。咁樣睇嚟修咸頓其實唔應該輸波。而大敗原因除咗因為孫興民把握力高外,聖人後防亦多番出錯。
首先講下熱刺陣容。牌面上排出4-3-3陣式哈利簡尼任正前鋒,孫興民同盧卡斯出任兩翼。但實際上,熱刺大軍企得最前嘅唔係簡尼,而係孫興民。簡尼企後半格,比賽可見佢做二傳,俾波孫興民為主。因此可見熱刺主要攻勢嚟自左邊。但係孫興民企位偏向中間,反映佢雖然牌面上係左翼,但活動範圍唔局限於左邊。

熱刺第一個入波係由簡尼拉到左邊,孫興民再喺中間接應傳中射入。呢球波當然要讚簡尼傳中恰到好處,加上修咸頓中堅碧拿歷克同左閘貝查特又追唔到孫興民。不過最應該要怪責嘅係右閘獲加彼特斯同另一中堅史提芬斯,本身獲加彼特斯想跟住孫興民,但孫興民走到中間後佢冇跟落去。簡尼走到左邊應該由獲加彼特斯看管,就算佢走前咗,史提芬斯理應要補位,冇理由無人看管簡尼呢啲高質素球員。最後俾佢睇定嚟傳,實屬此兩人責任。

第二個入波:孫興民走到右邊,位於盧卡斯附近。導致熱刺右路有人數優勢。貝查特要睇住盧卡斯,雙拳難敵四手,無法兼顧孫興民。兩位中堅一直睇住哈利簡尼,冇留意孫興民無人看管。碧拿歷克遮線失敗,加上孫興民速度快,史提芬斯包唔切就被孫興民推順射入。如果修咸頓球員睇得清事情發展,應該由碧拿歷克跟返孫興文,冇防務在身嘅獲加彼特斯移入中間補位,即使熱刺左閘賓戴維斯空晒,長傳俾佢都可以有時間調整,減低失波威脅。

第三個入波:拉美拿同孫興民喺最前;哈利簡尼返到中場線攞波,禾特包斯見狀走去攔截,問題不大。但史提芬斯企位出錯,走到自己左邊想包圍拉美拿,連同碧拿歷克同貝查特,四人防線有三位喺左邊,相反右邊只有獲加彼特斯一人。哈利簡尼一個過頭波後,已經冇人追到孫興民。加上拉美拿走到右邊空位,為孫興民提供射門以外嘅其他選擇。就算獲加彼特斯追得返,呢個攻勢好難入唔到波。

第四個入波:哈利簡尼拉到右邊,左閘貝查特遲遲唔見人。第一個埋哈利簡尼身嘅竟然係丹尼京斯,另一邊孫興民移到中間,不論右閘定中堅都仲未汲取教訓,冇緊貼孫興民,最終被佢輕鬆攞低個波射入。

第五個入波:反擊時,孫興民將個波帶到右路,獲加彼特斯都跟實,成功拖慢進攻,但係走到左邊嘅拉美拿無人防守。較遲返嚟回防嘅碧拿歷克即使面向自己龍門跑,都冇留意到拉美拿。直晒嘅佢射中柱後由簡尼補中。呢球可以睇到修咸頓後防各自為政,大家都只係專心自己職責,冇留意隊友需要,所以經常曝露空位。


總結
摩連奴一如以往進攻直接,以長傳作為進攻主要方法。前線球員不停互換位置令修咸頓無所適從。反觀修咸頓如剛才所指,後防自己顧自己。加上今場佢哋防線較高,令孫興民有好多空間走動。不過佢哋唔係真係踢得咁差,前線對熱刺帶來唔少威脅。除咗兩個入波外,亦有一個入波被判手球在先無效。丹尼京斯睇嚟能夠保持上季水準,所以今季對佢哋表現都係正面嘅。

如果喜歡我們的文章,請即分享到︰

標籤: 英超  熱刺  修咸頓  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→