比賽中實施社交距離 德國球隊被大炒

足球世界嘅新聞真係「獲獲新鮮獲獲甘」。德國第11級別聯賽球隊SG Ripdorf/Molzen II上個禮拜日就被大炒37-0。呢種極端比數雖然少有，但唔係未試過發生，香港嘅青年軍比賽都試過有雙位數字失波紀錄，大洋洲嗰邊嘅國際賽都有試過。不過呢支德國球隊並唔係因為技不如人而大敗，只係因為佢喺比賽途中實行社交距離！點解佢哋要咁做呢？原來佢哋該戰嘅對手，SV Holdenstedt II上場對住另一球隊Eddelstorf。而Eddelstorf賽後就有球會被驗到有武漢肺炎。雖然SV Holdenstedt II球隊上下都有去檢驗，並冇感染。但係本文主角SG Ripdorf/Molzen II就認為要隔十四日先可以確保對手身體健康，覺得即使有去檢疫，仍然有風險。
SG Ripdorf/Molzen II曾經向比賽機構申請延期，但係主辦單位都覺得對手冇人中招，所以申請遭到拒絕。如果佢哋缺席比賽就會被罰，另一方面，球員又擔心同對手接觸後會受感染。幾番思量後，最終球隊嘅決定係企埋一邊睇對手入波﹐與對手保持距離。

筆者本來認為SG Ripdorf/Molzen II有些許小題大做，過份擔心自己中招。但考慮到上面提過嘅幾支球隊都係業餘球隊，比賽後各職球員都有其他工作，擔心染疫都情有可原。唔知大家又覺得道理喺邊個度喇。

反觀香港超級聯賽，佢哋已經實施隔離政策，盡可能減低比賽中嘅染病風險。然而香港政府同足總遲遲未有復賽，去到昨日先有正式復賽安排。實在太遲。2019/20嘅港超賽季已經歷時超過一年，而家仲需時一個月先會真正結束。意味下一球季又要延遲舉行。呢啲正正因為香港政府同足總嘅保守所造成。而家諗返轉頭，只有隔離泡泡嘅做法早少少落實，就唔使搞到而家咁啦。