愛華頓距離滿分轉會嘅兩步之遙

黃足坑 於 28/09/2020 發表 收藏文章
愛華頓今季接連簽入占士洛迪古斯丶阿倫以及杜哥利,中場線煥然一新。唔少球迷同友好專欄都十分睇好佢哋今季表現,又認為佢哋喺今年轉會窗展現好大野心。以上講法我都係同意嘅。不過人人都想精益求精,我就認為佢哋轉會動作可以做得更好,以下就係佢哋接下來嘅兩大目標。

首先佢哋要清理陣中冗員。佢哋而家一隊球員有32個,比出名多冗員嘅曼聯仲要多出兩個。就算唔計長期傷兵杜辛(Cenk Tosun同葛班文(Jean Philippe Gbamin),球員人數仍然偏多。加上愛華頓今年冇歐戰,比賽較少,其實唔需要太多人腳。我認為所謂冗員係指一啲連後備都冇得坐,亦唔係陣容入面第二選擇嘅人,唔講都未必記得佢哋仲同愛華頓有約。
由前鋒線講起,辛度拉美利斯(Sandro Ramírez)係需要清走嘅球員之一。呢位前巴塞球員已經踢唔起,上年外借到馬略卡,只係射入三球,再上季喺皇家蘇斯達更加係冇波入。更加難以寄望佢喺英超有咩作為。拖肥正選前鋒卡華利雲係安察洛提「契仔」。更難得嘅係今年表現更有進步。兩場英超已經有四個入波,更加比預計入波多出1.7。射門中目標訊高達七成,如果維持到嘅話,會係一個好理想嘅數據。唔計卡華利雲,愛華頓都有堅恩,甚至係今年會復出嘅杜辛喺後備,用李察利臣踢最前又得。筆者難以預視辛度拉美利斯嘅出場機會。

另一位情況類似嘅係翼鋒保拿斯(Yannick Bolasie),大家可能會記得佢幾年前踢水晶宮嘅表現,而有打開Fifa嘅朋友或去都會呢位有速度又扭得嘅球員。不過現實中嘅佢喺愛華頓首季就受重傷,要休息超過一年,復出後佢先後借到去安德烈治,未升班嘅嘅維拉,同埋士砵亭。去到外借球會有出場機會,表現不過不失。不過就難以重返愛華頓嘅主力入面。如果講翼鋒囓話,禾確特,伊禾比同貝蘭特都會排保拿斯之前。三位球員都要爭坐後備席。佢哋當中都有人要作壁上觀,盃賽又有小將哥頓等住上位,又點會排到保拿斯呢?

中場方面,比鍚(Muhamed Besic)係其中一位要提到嘅球員。佢上季外借到錫菲聯。要知道鍚菲聯主帥韋達唔鍾意作出輪換。所以比錫上陣時間唔多。尤其當錫菲聯喺冬天簽入挪威中場貝治後,比錫連後備都冇得坐,更加被錫菲聯「彈鐘」,復賽期已經返到愛華頓,同樣冇後備。今季愛華頓主要增兵都係中場位置,本來踢開正選嘅都位置難保。如果留喺愛華頓,比鍚會係安帥心目中較後嘅選擇。


正如剛才所指,部份上季經常有得踢嘅愛華頓球員,今年連後備都要爭。所指嘅就係中場德夫。
上年安達高美斯被熱刺嘅孫興民收山,當時愛華頓中場選擇唔多,令德夫獲得唔少出場機會。全季上陣16次,當中有13次正選,達1190分鐘。不過安達高美斯早已復出,歸隊後德夫已經冇再為拖肥上陣。德夫喺去年展現出佢嘅有用一面,例如佢喺場均傳波同接波數據出色,可以睇到佢作為中場樞紐嘅作用;佢嘅盤扭成功率都係咁多位中場之中最高。不過從上年可見,佢唔係安帥嘅理想人選,喺多名中場加盟下,佢更加冇份踢。拖肥後備中場有施古臣同湯戴維斯,一攻一守,而德夫只會位列呢兩位後備之後。其實我認為德夫水準唔差,足以喺英超中下游立足。應該係幾位之中比較易放走嘅一位。

討論完隊中冗員後,係時候講下要補強嘅位置。長話短說,拖肥最需要補強嘅係中堅同龍門位置。現時愛華頓中堅賀基治有傷在身,預計要抖多至少兩個月。主力中堅之係得返米高堅尼同耶利文拿,佢哋有咩「冬瓜豆腐」,都會令安帥好煩惱。而耶利文拿都係「神經刀」一類中堅,間中會派膠。兩點加埋令愛華頓需要增添一名中堅。早前佢哋有意向車路士借入杜莫利,但最終唔成事,要再搵其他選擇。不過講到派膠,拖肥球迷可能會覺得門將碧福特犯錯較多,英超對西布朗同聯賽盃對費列活特嘅比賽,愛華頓共失四球,當中兩球碧福特都有責任,主要係解圍唔到出迎唔決斷。如果可以喺以上位置補充,必定會對愛華頓防守有好大幫助。

如果喜歡我們的文章,請即分享到︰

標籤: 愛華頓  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→