屈福特忠臣決定留隊,呢個入波仲記唔記得?

黃足坑 於 21/08/2020 發表 收藏文章
屈福特今季雖然大破利記金身嘅代表作,但係最終都係降班收場。其實佢哋陣中絕對有唔少好波之人,例如杜哥利,沙亞,迪路菲奧,韋曉士等,據聞佢哋都有同唔同球隊扯上關係。隊長甸尼(Troy Deeney)作為隊中神射手,相信其他都會有興趣。但係呢位32歲前鋒就話:我會留隊!
圖:屈福特前鋒甸尼

佢喺尋日接受英國傳媒訪問嘅時候話,自己已經喺屈福特效力咗十年,當中曾經有球隊有意羅致佢,當中甚至有當時攞完英超,有歐聯踢嘅李斯特城!當年有歐聯都唔走,點會而家先走呢?換言之甸尼來季除非被屈福特放棄,否則都唔會離開。


十年前,屈福特從英甲華素爾簽下22歲嘅甸尼,當時屈福特只係英冠中游。曾經有次完季排第三,點知升班附加賽都係出局。兩季後終於成功衝超,去到今年又要落返去。甸尼見證住屈福特起起跌跌,又將起碼半個職業生涯都交比屈福特,甚至可以喺屈福特史冊上留名。而屈福特都十分愛鍚甸尼, 甸尼曾經因為打鬥要坐監,屈福特都冇同佢解約,反而出獄後仍然器重佢。甸尼陪伴屈福特打足五年英超,相信英超球迷唔會對佢陌生,雖然射術一般,但係憑住佢強壯身體,加上衝撞形跑法,佢絕對唔係一個容易應付嘅中鋒;雖然筆者唔係屈福特球迷,但成日見佢入波都會衝向球迷方向,鏟草慶祝。每次睇親都非常熱血,五年前如是,今年亦如是。唔難想像佢對屈福特嘅愛。你同我講佢會喺屈福特踢到退休我都信!


但要數到甸尼十年以來最印象深刻嘅一球,我就覺得唔係佢喺英超入嘅某一球,而係12-13球季英冠附加賽四強所入嘅一球。當時對住李斯特城,90分鐘時仲係1比1,喺即將進入加時嘅時候,李城諾卡特搏得一個疑始插水嘅十二碼,當大家以為李城可以晉級時,諾卡特十二碼射失。鏡頭仲影住屈福特門將艾蒙尼亞之際,屈福特已經開始反撃。最終由莊拿芬賀治(Jonathan Hogg)助攻俾甸尼,令屈福特來回地獄後折返人間。絕殺之後甸尼立即激動到除衫衝向球迷,上演一次更加激烈嘅熱血慶祝。去到附加賽決賽都係輸波完場,但呢球波就成為屈福特球迷嘅佳話。如果想睇返呢球金球,可以去呢度:https://youtu.be/6TnKvlQ2h7s

近代足球界莫講係One Club Man,忠臣都越嚟越少見。甸尼唔係屈福特自家產品,但佢可以話同張飛一樣忠心。雖然佢踢法同形象難以受所有人愛戴,但係呢種「你輸我陪你東山再起」嘅態度,絕對值得我哋尊重。

如果喜歡我們的文章,請即分享到︰

標籤: 屈福特  甸尼  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→