上陣廿分鐘即被換走 史度爾積真係咁差?

黃足坑 於 25/10/2020 發表 收藏文章
今個星期英超首場比賽安排喺星期五晚舉行,由兩支驚喜之師維拉同列斯聯合演。賽前列斯聯方面指佢哋主力奇雲菲獵斯受傷,所以今場就冇咗呢位本來踢足每一分鐘嘅英格蘭國腳。取而代之嘅就係荷蘭小將史度爾積(Pascal Struijk) 。史度爾積唔係第一次喺英超上陣,但之前都係以中堅身份上陣,未知到佢可唔可以勝任防中一職。今場比賽,佢只係踢咗21分鐘就被比爾沙換離場,可見佢唔太適合打呢個位。香港評述員丘建威認為,史度爾積被換出係因為佢早段領黃,但筆者唔認為原因唔止係咁。

首先要講返史度爾積領黃嘅一次犯規,佢遲咗落腳,令到自己踢中基亞利殊,呢張黃牌俾得合理。同時反映到史度爾積截波反應唔快。事實上,喺呢個犯規之後冇耐,史度爾積又一次犯規,同樣係遲落腳踩到杜格拉斯路爾斯,不過球證冇再俾牌。接二連三嘅犯規唔單止反映史度爾積反應慢,而且球隊亦會有打少一個嘅風險。因為列斯聯用人盯人嘅防守。打少一個對佢哋嘅影響係好大,比爾沙承受唔起呢個風險,所以唯有早早將佢換出。

不過,就算撇除犯規,史度爾積嘅防守數據係特別差劣,佢攔截成功率同施壓成功率都係0,又冇作出任何爭頂,喺20分鐘入面,佢只係作出1個Interception。而佢亦有一次被成功扭過,喺對方半場被查斯古特輕鬆推過,呢下見到佢轉身唔快,所打防中會好蝕底。

最後就係喺球隊後場組織時嘅發揮。講解之前,引用自己季初所寫,列斯聯對利物浦嘅分析,奇雲菲獵斯係會不停喺對方前線後面現位,為中堅提供短傳選擇,同時令列斯聯後場形成一個菱形,有利佢哋互傳。

史度爾積唔係經常現到位,感覺上,佢成日被維拉前鋒屈堅斯牽制,被截然不同傳波路線,後防俾唔到波佢,選擇少咗,只可以向前長傳,一係就傳俾其他後防球員,但最後都係要長傳上前。史度爾積無法現位,就唔單止少咗傳波選擇,更加令到列斯聯較難控制比賽節奏。雖然佢哋一向都係長傳急攻,好少經中場。但當奇雲菲獵斯喺度,佢哋唔一定要下下長傳,可以先喺後場猜住,睇準時機先踢上去,而當史度爾積打防中就相反。

今場比賽更加出現一次少有情況:一向列斯聯兩位較前嘅中場都會壓到好前,同三箭頭一齊等接應長傳。今次由於史度爾積現唔到位,中堅艾寧又搵唔到長傳選擇,最後焗住要中場基歷希回後攞波,算係喺列斯聯較少見到嘅畫面。
總結
再睇返Whoscored.com嘅賽後評分,今場史度爾積只係得6.4分,係列斯聯正選入面最低分一位,問到史度爾積係咪真係咁差,簡單答案係:佢真係踢得差。佢好多方面嘅能力都未足夠喺英超立足。喺換走史度爾積後,比爾沙將基歷希拉落一格打防中,效果尚可,但就浪費咗佢嘅進攻能力。奇雲菲獵斯據指要抖一個月,睇嚟比爾沙要搵定一個可以勝任防中一職嘅替工。

如果喜歡我們的文章,請即分享到︰

標籤: 史度爾積  英超  列斯聯  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→