迷一樣的波衫──阿爾及利亞18/19主場

各位粉絲大家好,西波達人早前受食波問題困擾,所以心情唔好,好耐都冇出過文,相信大家都等左好耐,咁今日想同大家分享一件好有趣既事,一件迷一樣既波衫。
話說早兩日西達行過一間連鎖體育用品鋪,見到有兩件係阿爾及利亞國家隊既波衫,竟然係賣$199兩件既超級離譜價錢,喂講真$99.5,買件組隊淨衫都要唔止呢個價啦,咁貴為西波達人,見到西波衫又點能夠錯過呢?於是二話不說就買左白色主場同綠色作客各一啦。
買左件衫之後,就當然唔少得要印埋字著出街先夠型架嘛!一百萬既問題,請喺三秒內講出兩個阿爾及利亞國家隊球員,唔准講馬列斯。

三秒話咁快就過,我星波都食左兩啖啦,有邊個係真係講得出架呢?講唔出唔緊要既,因為我西達都講唔出,不過呢個時候又可以塞錢落大家個袋度,阿爾及利亞國家隊出名既球員其實仲有曾經代表法國U18同U21、效力過華倫西亞、韋斯咸,現時效力加拉塔沙雷既中場費古利﹝Sofiane Feghouli﹞、現時效力艾雷恩既中場巴謙美﹝Yacine Brahimi﹞、現時效力AC米蘭既年輕中場伊斯美賓拿沙﹝Ismaël Bennacer﹞同埋效力李斯特城但而家比人外借緊既施利文尼﹝Islam Slimani﹞。
費古利﹝Sofiane Feghouli﹞
巴謙美﹝Yacine Brahimi﹞
伊斯美賓拿沙﹝Ismaël Bennacer﹞
施利文尼﹝Islam Slimani﹞

講左咁耐究竟件波衫有幾咁迷呢?呢件波衫迷就迷在原來阿爾及利亞國家隊係冇喺任何比賽上面著過架,咁究竟呢件野係想點呢?為左尋求真相,西達查左成晚,搵到幾樣野:
上圖係阿爾及利亞16/17主場波衫,但根據紀錄,阿爾及利亞最後一次著呢件衫係2019年3月26號友賽突尼西亞;
上圖係阿爾及利亞19/20主場波衫,阿爾及利亞第一次著呢件衫係2019年6月11號友賽蒲隆地。

西達翻查左多個外國波衫網站,都稱我地入手嗰兩件係18/19主客場波衫,咁究竟點解有新波衫出左都唔著,要繼續沿用16/17波衫至2019年呢?

我地又嘗試從波衫設計上去了解下,眾所周知,兩大品牌每逢世界盃、歐國盃等大賽出既國家隊波衫都唔難發現其實似模似樣,我地嘗試將呢件所謂18/19主場波衫同2018年世界盃同樣由adidas出品既阿根廷同日本件比較一下,就會發現領口、同剪裁等細節位都係同出一徹,令西達有理由相信呢件真係18/19既波衫,其實係應該造黎踢世界盃決賽週。但係如果睇番2018年世界盃決賽週資格賽既成績,阿爾及利亞係排小組包尾出局,又好似冇整既必要喎。
呢件事其實都真係幾有趣,不過點都好啦,一舊水唔洗有件波衫著下,又夠哂冷門,都抵玩既,如果大家有興趣不妨又整返件玩下呀!


留言


請按此登錄後留言。未成為會員? 立即註冊
  • 北方巨龍 於 15/08/2020 評論 NO. 1

    阿哥,巴謙美走咗好耐啦……

  • 西波達人 於 17/08/2020 評論 NO. 2

    多謝提醒,已改,THX!

快捷鍵:←
快捷鍵:→