淺談西波 精選

西波達人自介

FB: https://www.facebook.com/westballmaster/IG: https://www.instagram.com/westball_master/
大家好，我地係西波達人。若果大家有留意，今次並唔係西達第一次係網路世界出文。之前都寫過兩篇關於香港隊戰術既分析文，但都係透過好友《香港講波仔》既專頁去出。今次係第一次以西波達人既專頁同大家見面。

言歸正傳，其實何謂西波呢？

"西波"，簡單啲講，就係技術水平無咁高既比賽。好多人眼中既足球世界，就係英超、西甲、歐國盃、世界盃呢啲高水平既賽事。呢啲賽事好唔好睇？咁梗係好睇啦，球星又靚仔又有型又好波，比賽節奏明快，技術水平高，講得簡單啲插花都多啲啦。但其實足球世界並唔係單單得呢堆頂級賽事，係佢地下面，重有好多好多唔同既足球聯賽。要數呢啲西波真係可以數到出年，歐洲既話葡萄牙超級聯賽、比利時甲組聯賽、荷蘭甲組聯賽；再次一等可能係土耳其超級聯賽、俄羅斯超級聯賽；再落就可能係近少少既亞洲聯賽，例如日本職業聯賽、韓國職業聯賽，重有屬於我地既香港超級聯賽。好老實咁講，技術水平上，呢啲次級聯賽/非主流聯賽都真係幾西下。無壓力下控失，單刀飛機，基本上係每場既例牌動作。但呢啲西波又係咪真係一啲睇既價值都無呢？足球比賽除左球技比拼之外，重有咩吸引人既地方?
其實睇波就同食野一樣，食塊幾百蚊既靚牛扒有欣賞佢既一種評價同方法；同樣食碗幾十蚊既車仔麵都有覺得佢好食既方法。西達有去過奧脫福睇曼聯對車路士既英超大戰，夠高水平啦？又試過去廣州天河睇廣州恆大對北京國安既中超大戰，落狗屎個上蓋仲要漏水，夠痴線啦？又試過去睇加拿大超級足球聯賽，York9對FC Edmonton，未聽過呢？甚至最近本地賽事閉門作賽，拎張櫈仔坐喺山坡睇波，後面就係環保大道車路，夠誇張啦？其實講咁多都係想帶出睇唔同既波都有唔同既樂趣，差在你肯唔肯去感受同體會。我敢寫包單，呢啲感受係畢生難忘，嚴重既甚至會上癮，我地而家都不知幾想去甘巴爾看台睇波呀。

廣州天河體育場(上蓋漏水)

甘巴爾看台(將軍澳運動場外環保大道旁一處小山坡)


西達曾經出席過一個有關足球既讀書會。當中有位講者既分享令筆者印象深刻。佢話“如果睇波係單純睇球技，咁呢個世界上得一場波值得睇，個場就係歐聯決賽。無比賽比得上歐聯決賽。但點解我地都會睇其他波？係因為我地係當中搵到一啲球技以外既吸引力。”無錯，因為足球唔單單係一種運動，更加係一種文化﹑一種宗教﹑一種世界性語言，背後所牽涉既遠遠超出球場上既競技。西達曾經係歐洲exchange，當著住當地球隊波衫出街個陣，就好易會受到當地人既熱情款待。又試過因為著左死敵既波衫﹝係Edinburgh著Celtic既波衫﹞，係巴士比人用粗口鬧。呢啲經歷，正正代表住足球好多時唔單單係比賽，可能係代表緊一種外來人對當地人既尊重﹑又可能係代表緊一個地方既歷史。正如你唔入旺角場，你永遠唔會知道五﹑六千人一齊講DLLM係咩一回事。唔單止係生活文化，足球更加可以反映一個社會政治現況。遠至歐洲，西班牙國家打吡皇馬對巴塞，代表住加泰隆尼亞同西班牙皇室既對決。意甲既拉素，到依家都重含有濃厚既法西斯味道；近至香港，南華對愉園，都代表住右派對左派。而早幾年的港中大戰，當中所蘊合既意義，亦遠超球場上既勝負。走訪同體驗唔同地方既足球比賽，都會令人更深刻咁去感受到唔同地方既文化﹑歷史同社會現況。而呢啲體驗，其實無分西定唔西，只視乎你有無興趣去了解。
旺角大球場

當大家睇英超、西甲睇得如痴如醉既同時，希望大家唔好遺忘世界上唔止呢啲咁高水平既賽事，仲有一啲其他冇咁多人留意既西波。藉著呢個專頁，我地希望帶大家進入呢一個另類既足球國度。

最後，作為一個本地既足球page，我地都有責任去推廣本地聯賽。而且本地聯賽都應該係最容易接觸到既西波。香港既足球聯賽係世界上其中一個歷史最悠久既聯賽，亦係亞洲第一個職業足球聯賽。經歷過七、八十年代粒星光熠熠，二十一世紀初既冰河時期，而家又要面對武漢肺炎令球季中斷，本地足球走到今日，絕對唔容易。其實睇本地波比大家想像中有趣，而且又貼地，你喺看台嗌“射呀嘛”、“屌比波啦”，球員會聽到，重有可能場入面大聲屌返你轉頭。完場想搵球員互動下傾兩句影下相又唔難，星期六、日晚安坐家中睇英超之餘，不如下午都試下入場睇下港超呀？
同時都想呼籲一下，作為一個香港人，特別喺政治鬧得最熾熱既同時，我地更加應該認清自己既身分。身為香港人，撐香港隊，買波衫、睇直播、入場打氣，各種方法都好，其實都係好簡單既事，同時亦係最有力既表態。想用一句好老土既說話去講：唔撐香港隊，你可以有一百個藉口；但撐香港隊，你只有一個理由，因為你係香港人。

We love you Hong Kong we do.

攝於12月西達跟隨港隊作客釜山東亞盃決賽週