[轉載英譯繁]加歷查專訪馬甸尼 --- 伊斯坦布爾之夜 , 曾有機會加盟曼聯 , 現時最強中堅......

藍斯有波講波 於 23/05/2015 發表 收藏文章
馬甸尼絕對是意大利足球史上的一個傳奇 , 在他職業生涯的球隊 , 也是唯一一支球隊 , 他為AC米蘭出場超過900場 , 收獲26個重要獎杯 , 包括5個歐洲冠軍 , 他也為意大利國家隊出戰超過120場。

這次的專訪 , 在馬甸尼家中舉行 , 當時伊斯坦布爾之夜兩位重要主角加歷查和馬甸尼 , 將會盡訴當年情 , 而馬甸尼也會說出心目中現時世界最佳的中堅,和當年傳聞加盟曼聯一事。



加歷查: 離我地上次決賽之戰已十年 , 同當時2005年比現在咩都變哂 , 包括我同你所屬的球隊(利物浦,AC米蘭) , 同樣身處低潮期,踢左令人失望的一季。 每次利記輸波我都會好心痛 , 唔知你又會唔會身同感受的 ?

馬甸尼 : 呢D野唔洗講啦 , 我10歲細路時就開始係AC踢波,踢到41歲,人生幾十年都是AC陪住我大。連我老豆同而家個仔都係踢AC , AC對我黎已經唔係一支球隊咁簡單 , 係我生命的一部份。連我屋企人都鐘意紅黑。

但咁又點?

當你見到而家呢隊AC , 幕後高官得返巴里斯一個 , 新個班對於AC的傳統同歷史已經拋諸腦後哂 。現在隊AC同以前比已經唔同哂。
加歷查: 你會不會有種想施以援手的想法呢 ?

馬甸尼 : 我好樂意 , 我都收過好多來自AC米蘭的邀請 , 但我真係老到行唔到了 , 哈哈

我會樂意教返佢地(現在AC米蘭球員)我以前的經驗 , 我地個代有D野點都會有D可以用係新呢班球員身上。

而家呢班球員其實唔差 , 不過佢地需要一個正確的人帶領佢地行正確的路。

但我睇唔到現在佢地係行緊。

加歷查: 我做靚仔時 , AC係我經常係電視睇的一隊波 , 有薩基同卡比路呢兩位領隊 , 上星期 , 我先係馬德里見到薩基 , 佢都有講起你同AC , 你有冇受過呢位領隊的影響呢 ?

馬甸尼: 佢係一個好強硬的領隊 , 他的訓練方式可以講有少少魔鬼式 , 他會好嚴格磨練你。 不只你的身體,還有你的心理同團隊精神。 由其對於後衛們, 他有時會不斷叫你重覆又重覆做同一樣野 。

每一日我地都係練同一樣野 , 所以而家要我同巴里斯 , 哥士達古達,泰索迪合作返,我地都仲合作到 , 因為有D野已練到你刻骨銘心。呢點可能係我地當時成功的一個因素。

呢樣野幫到AC傳奇的延續 , 令佢地可以長時間係世界最高水平的聯賽和歐冠競賽。 我89年幫AC攞到第一個歐冠 , 而家的AC ? 只能講遺憾。


加歷查: 喂大佬 , 可唔可以同你傾下當年的伊斯坦堡爾之夜?

馬甸尼: 當然得啦 , 呢場波搞到我三個月無覺好訓。 有咩想講即管講啦。

加歷查: 呢場波對AC米蘭有冇咩啟示?
馬甸尼 : 當然有 , 有時當你睇返上半場 .... 有咩可能下場會輸先得啊 , 但有D人有時可能忘記。我同你都仲記得因為當時我同你都在場。 呢場我地其實唔止上半場踢得好。


但就係個瘋狂的6分鐘...我地隊波心理上係個6分鐘摧毀哂 , 6鐘後我地又要由頭黎過 , 我地都曾經有機會再領先。 我仲記得個時謝拉特踢埋後衛。

加歷查:我89年歐冠睇你同AC4:0大勝羅馬里亞的STEAUA , 當時你的表現是否完勝伊斯坦堡爾之夜的上半場呢?

馬甸尼 : 當時我地的表現係超乎預期 , 好到唔能夠再好 , 一切都好順好順。仲記得贏波之後飛返意大利 , 班FANS係機場等我地 , 大叫問我地:‘What have you done?!’

呢場可能係我地表現最好的一場決賽。 94年大勝巴塞4:0係例外。 個場波又係痴線 , D波係咁入。


加歷查: 在伊斯坦堡夜的中場休息時 , 你地領先3:0 , 你有冇覺得你地係贏硬呢?

馬甸尼 : 半場時我地入更衣室時已HIGH哂 , 慶祝的慶祝,大叫的大叫,個時真係以為贏硬。因為我地3比0領先緊。

班友仔慶祝狂叫 , 直到肥仔安入黎。 "嘈夠未? 我唔想聽到你地講野 , 比5分鐘我講幾句"

我地咪收聲囉 , 我地開始討論下半場應點踢,上半場有邊樣野唔好,而在下半場可以改善同做到更好。

個時我心入邊都同自已講 , "仲有45分鐘,我地好大機會會贏的了" 但我無講到出來

加歷查 : 你地曾經兩次歐冠決賽4:0大勝對手 , 對利記時上半場就3:0 , 下半場可能贏5球同6球。 你覺得下半場你地有咩改變呢?

馬甸尼: 當時其實已有警告 , 我地班FANS唱 , 場波FANS係50比50(利迷同AC迷) , 但呢度係75比25 , 我地有D球迷自已飛比利迷。


我仲記得第一球。 旁邊係謝拉特同史譚。 我應該大叫"小心啊,佢黎緊了" 句野都未講出口 , 謝生就入左波。我當時好嬲自已 , 做咩唔早D講出黎?


加歷查: 你認為史米沙的入波(下半場幫利記追回3:2)係咪成場波的轉折點?

馬甸尼: 係 , 呢球令個勢有好大轉變。 全部都好突然 , 之後再追到3比3 , 我地心理上已好大轉變。 個時可能唔止我一個想 , 我地會唔會輸埋。

加歷查: 你覺得個場波謝拉特表現點呢 ? 他踢左3個位置 , 係意大利仲有冇人會講佢?

馬甸尼 : 我仲記得佢個時踢到抽哂筋 , 有幾痛苦真係係塊面度見哂。 但佢呢邊痛完轉頭又去攻又去守。無一分無一秒係放棄過的 , 對於現在的意大利年青球員 , 他係一個好好的榜樣。


加歷查: 我估你最後見到我地慶祝應該好痛苦 , 呢度有一張相係你當時恭喜我的。 呢場波後 , 我見你係其他比賽贏後都無物表情。

馬甸尼: 勝者為王 , 敗者為寇 , 就算係幾慘幾痛, 輸就係輸 , 你都要接受。正如2年後我地都好幸運咁報仇番。個場波其實我地踢得唔好,機會都唔多 , 但最後都贏左。


加歷查: 如果可以 , 你會唔會想再重新同利記比賽多一次呢?

馬甸尼: 咪搞了。 個場決賽我地踢得唔好 ...... 應該咁講我地成季都踢得唔好。個場波如果輸埋真係咩都無 , 但有時比賽就係咁 , 你無得選你鐘意的對手。

比賽前我室頭哥痛到好似已經唔再屬於我。 我成三個月冇踢過波,肥仔安都知。他都知我踢唔踢得個場波 我食左都唔知幾多粒止痛藥。可能食得藥多 , 我都唔太記得個場波啦。

加歷查:無了,我都無返睇呢場波,個場波真係..

馬甸尼: 我最有印象係拎起獎杯個下。 我地慶祝左成36個鐘。 慶祝完後 , 我就即刻飛左去比利時做手術,個時我覺得我隻腳已無左室頭哥了。

我應該訓左成日 , 我記得我手術起身後 , 個腦仲呆下呆下 , 我係度惗...我係唔係贏左? 贏左場波?

十秒後我個腦終於清醒返...

我已經贏左啦!

加歷查:你踢過8場歐冠決賽,呢次係你第5次勝利,你心目中最經典的勝利係邊場呢?

馬甸尼: Francisco Gento都幫皇馬踢過8次決賽。 但他贏左成6次。 當然我的紀錄都唔錯,但每一場勝利比我的感覺都係唔同。

第一次點都係最難忘。 係90,000個AC迷前戰勝巴塞 , 直到而家我都仲記得個場波 , 就算係第一下入球場見到的一人一物我都記得。 個場波對我黎講 , 就如你的伊斯坦堡之夜。


加歷查: 踢左咁多年AC , 你覺得邊一年的AC係最勁的呢? 89年有雲巴士頓同古列治 ?定係5年後的個隊AC呢?

馬甸尼: 應該係薩基的個幾年,黎左三個荷蘭球員,但之後卡比路令AC米蘭更強,有更強球員,我地應該係91-94年世界上最強的球隊。 每年我地都有一個星級球員加盟。 我地有古烈治踢右邊 , 仲有泰索迪拍住佢。

仲有雲巴士頓 , 柏賓 , 巴班 , 沙維斯域 , 而家想起都正。


加歷查: 雲巴士頓係唔係你拍擋過同防守過最勁的前鋒?

馬甸尼: 係 , 佢右邊又得,左腳又得,頂波又得,又快又大隻,又射得又傳得。佢係最勁的。 直到而家都有唔少前鋒都係度模仿佢。 不過佢唔好彩 , 28歲就因傷提早退役,算係一個遺憾。


加歷查:咁呢另一位最佳後衛--- 巴里斯又點呢? 他對你有幾大影響 ? 他好似係你當時隊中的大佬 , 你講唔講到點解佢咁勁?

馬甸尼: 可以咁講 , 他係特別的,生得唔高,但又可以跳得好高 , 佢肉唔多但又好鬼大隻。

他多做野少講野 , 他當時踢波的方式,對年青一輩黎講係一本活生生的教科書。

他唔似史譚, 又大舊又快 , 雖然佢得70KG , 但我可以同你講 , 當佢守你 , 攔截你一腳時。你就會知佢腳力有幾勁。

對我黎講 , 佢係一個好榜樣。我都有模仿佢。 他對波的技術同運用都好純熟 , 非常好。 而家要搵一個後衛防守好 , 球技又好 , 其實好難。

加歷查 : 係英格蘭 , 當我細個時 , 好多朋友想踢中堅個陣 , 都會提到你個名 , 另外仲有一位就係巴里斯 , 之後仲有杜林,迪西里,簡拿華路 , 對於當時的後衛標準同而家 , 你會點睇呢?

馬甸尼: 當時太多好後衛了 , 當時好的後衛比好的前鋒多 , 當時我係踢左後衛 , 但而家呢一班(左後衛)同我個時比已好唔同。 佢地好少會想點樣防守,點樣令自已係防守方面做到更好 , 佢地只想到進攻 。點樣入波點樣助攻。

但我知防守的重要 , 因為薩基的球隊入邊 , 從龍門到前鋒都要防守。 而且呢樣野係WORK。

係意大利 , 我地一直有優秀後衛的傳統 , 但去到今時今日 , 我數下手指 , 意大利真係無物邊個了。 你問我我都唔知點解 , 我覺得現時巴西的施華係最勁的。

加歷查 : 曾經你有一個機會去英超踢波 , 但最後都無去到 , 你有冇後悔呢? 我惗唔少人都希望你可以在英超上陣。

馬甸尼: 無錯,曾經我有機會加盟曼聯 , 但我無直接同曼聯傾過 。

個時係96年 , 維亞利仲係車路士做領隊 , 佢係我朋友。 都有叫過我去車仔。 個年他們過了令人失望的一季 , 仲有阿仙奴... 唔多講啦 , 仲之我都冇直接同佢地傾過


加歷查: 你好似有機會加盟教車路士 , 對嗎?

馬甸尼: 個年我剛踢完係AC最後的一場賽事 , 一星期後車仔方面就搵左我 , 但我未準備好 , 同埋我都唔想我屋企人咁趕搬到倫敦 , 我有去過倫敦,同阿布傾過 , 同我曾經的隊友韋健士傾過 ..... 最後我都係決定拒絕。

加歷查: 你點睇而家的英超足球呢? 能唔能夠好似90年代的意甲波咁雄霸球壇呢?

馬甸尼: 我有睇 , 某部分仲係同舊時好似 , 仲係注重球員間身體對抗 , 一個聯賽入邊有好似曼城咁的新貴,也有如利物浦的老球會 , 英超同世界其他地方的聯賽真係好唔同。

你地有好多優秀的球員 , 但比賽的緊湊令他們都唔可以太多比賽 , 因體能可能都應付唔到。

但係意甲 , 有D情況同現在英超好唔同 , 例如球隊無咩錢,但個球場又鬼咁大。 又例如會因球迷暴動而令球隊之後閉門作賽。

曾經有人講AC會起新球場 , 但我都唔知係真定係得個傳。 但我想信AC需要一個最少坐到60,000人的新球場 , 容納到45,000人我覺得係最低要求。 由其當你想 返返去以前係足壇的成就時。 雖然而家聖西路球場仲好靚,但已好殘舊了。

(***已落實AC米蘭新球場興建 , 2018至2019年左右完工,可容納48,000人左右)

加歷查: 我都想利記可以返去舊時 (足壇的成就)

馬甸尼: 我都想 , 唔怕同你講 , 睇番當年AC史上的宿敵 , 巴塞,皇馬,利記等,再睇返AC , 真係好傷心見到佢淪落到咁。

加歷查: 如果連你都唔知未來AC會發展成點 , 你自己的未來又會發展成點呢? 聽講你有一個計劃係美國,你係唔係會出任做領隊?

馬甸尼: 唔啦,我真係唔鐘意做領隊。 我有時仲係美國同朋友踢下衛生波。 同AC可以講無咩合作了, 係現階段 , 我比較注重家庭 , 做一個稱職的老豆。 但未來會否同AC合作真係唔知。 可能會合作但從事其他野呢。





原文 : http://www.dailymail.co.uk/sport/football/article-3093184/Paolo-Maldini-talks-Jamie-Carragher-night-Istanbul-reveals-close-joining-Manchester-United.html


***譯得唔好 , 希望你唔好介意 , 但至少我地都可以有自已的翻譯文章 , 唔洗從內地網站抄黎抄去

FANPIECE不是繁體版GOALHI !***

留言


請按此登錄後留言。未成為會員? 立即註冊
快捷鍵:←
快捷鍵:→