紐卡素唯有等運到?用艾殊利思維分析點解唔炒布魯士

非Big6看英超 於 22/03/2021 發表 收藏文章
想知道更多英超英冠消息歡迎like同follow我地嘅page: https://www.facebook.com/leagueinengland

原本今季紐卡素到季中時仍然係一隊中游球隊,不過而家已經滑落至離降班區只有2分距離。順理成章地,要求炒領隊布魯士(Steve Bruce)嘅聲音越嚟越大,尤其是球隊剛剛極之難睇地俾護級對手白禮頓炒3粒,球迷對護級嘅憂慮越嚟越大。不過,Sky Sports News有消息指紐卡素班主艾殊利(Mike Ashley)仍然支持布魯士,消息對紐卡素球迷來講應該係壞多於好。當然,唔炒布魯士理論上應該係一個錯誤嘅決定,但又係唔係一個合理嘅決定呢?又好似係喎。

首先要諗下紐卡素班主係邊個,係艾殊利,一個出曬名孤寒到極致嘅班主。從佢孤寒嘅思維出發,炒領隊已經要賠錢,仲要喺而家仲有2個月就完季嘅時候炒領隊,要揾個似樣嘅領隊絕對唔易,就算有都會屈佢俾高d人工,如此一來艾殊利一定即刻縮沙。如果佢肯俾高d人工嘅話,當年就會一早同肥賓賓尼迪斯(Rafa Benitez)續約,唔洗而家同布魯士苦苦糾纏。加上而家球會嘅財政問題更加嚴重,艾殊利只會更加鐸叔,炒完布魯士之後嘅budget紛紛中只可以請到英甲領隊都唔定,結果唯有升U23個領隊上嚟教到季尾,不過昵招好多球隊試過都係唔得,睇下上季屈福特就知。如果係咁嘅話,唔炒布魯士雖然係個唔好嘅選擇,但起碼唔勁差嘅選擇。

甚至對於艾殊利嚟講,降班都未至於係壞事,只要博得中就唔會有問題。正如開頭所講,紐卡素去到季中都不至於要護級,如果最後真係護失敗的話,好自然布魯士要承擔大部分責任。如此一來艾殊利就可以博佢自己辭職,咁又可以慳返一筆。你可能會話,布魯士筆賠償金慳埋都唔夠跌落英冠蝕得多,其實,跌落英冠一季嘅問題都唔算太大,只係喺降落傘嘅3年限期內升唔返上去先會有大大問題,而通常降落英冠嘅球隊第1年有最大嘅升班機會,過咗第1年冇咗道氣難度就會大好多。所以艾殊利就可以博,博隊波下季即刻升返上英超,過程中仲可以送走部分高薪球員慳返一筆。當然,對於我地嚟講,會覺得咁樣實在博唔過,只會自己揾自己笨,不過對於艾殊利嘅生意思維,為咗有最大利益而乜都博一餐絕對唔奇,而且佢亦都有上一次降班之後即刻上返英超嘅往例支持,更何況佢又唔係紐卡素球迷,隊波衰咗對佢嚟講都冇乜所謂,如果博唔到最多咪放棄隊波,橫掂佢一早都想賣盤,只係賣唔成咁解。

其實換邊個教都好,都冇可能喺9場之內改變到隊波嘅打法,所以點炒都只可以繼續縮後打防反,如是者祖連頓都係繼續咁廢,前鋒都係繼續唔識入波,最多只可以加強下士氣守和對面攞下1分。只可以講而家先講炒布魯士實在太遲啦/而家仲講炒布魯士已經冇用啦,如果艾殊利真係肯炒布魯士,1月輸俾未贏過嘅錫菲聯果陣就已經落咗手,見佢而家不但止唔打算炒人,仲讚佢對班主忠誠同對球會熱情,擺明就係唔想洗錢炒佢先咁講。當年肥賓肯隨隊降落英冠,論忠誠同熱誠肥賓肯定大過布魯士多多聲,結果艾殊利咪又係衰孤寒唔肯同人地續約,所以當見到艾殊利咁樣讚布魯士,筆者真係得啖笑。悲觀咁講,紐卡素要護級真係唯有等運到,希望富咸唔會無啦啦上身連贏幾場,同埋希望煞科戰對富咸醒醒定定唔好輸,始終隊波近20場竟只贏得2場,冇任何改變的話真係唔見得有咩方法會改善返狀態,唔係嘅話真係可以疊埋心水下季英冠見。不過過往好多尾三降班嘅球隊都因為冇預到自己會降班而冇做足準備,結果冇辦法即刻升返上嚟。如果紐卡素真係頂唔住嘅話,睇怕下季艾殊利要花多少少心思先可以俾人博中曬啦。

Sky Sports News 報導: https://www.skysports.com/football/news/11678/12252298/steve-bruce-says-he-wont-quit-newcastle-while-graeme-souness-questions-if-they-will-win-again-this-season
標籤: 紐卡素  艾殊利  布魯士  護級  

留言


請按此登錄後留言。未成為會員? 立即註冊
    快捷鍵:←
    快捷鍵:→