大Sam金漆招牌岌岌可危？ 精選

想知道更多英超英冠消息歡迎like我地嘅page: https://www.facebook.com/leagueinengland

喺英超講護級，大Sam艾拿戴斯敢認第2冇人敢認第1，咁多年來就算情況睇落幾渺亡都好，大Sam次次都會得俾你睇。今次大Sam接手西布朗，筆者當時心諗西布朗今次應該可以輕鬆過關，不過暫時睇落表現未有太大起色，究竟大Sam嘅金漆招牌今次保唔保得住呢？

大Sam上任之後6場比賽，雖然成功迫和利物浦同埋擊敗狼隊，但其他比賽都輸曬，總計近6場只得4分，近況喺英超並列尾3，暫時未見有太大起色。後防一直係西布朗最嚴重嘅問題，大Sam接手之後，6場失咗16球，包括俾列斯聯炒5粒同俾阿仙奴炒4粒，比前任領隊比歷13場失27球比率仲差。以大Sam最在行嘅4-6-0密集式防守戰術嚟講，失咁多球實在係好誇張。
當然，西布朗後防穿曬窿嘅主因係防守球員實力不足，唔單止借走咗上季表現最好嘅中堅赫加斯(Ahmed Hegazy)，簽入嘅亦竟然係36歲嘅伊雲洛域(Branislav Ivanovic)，不過大Sam接手果陣曾經話過，今次護級嘅關鍵係1月買人，又話管理層肯放水俾佢買人，但睇返而家嘅轉會情況，暫時只係簽入咗老將史路加斯，同埋傳想簽前李斯特城前鋒穆沙，但兩位都係前線球員，後防方面暫時未有太多消息。但後防嘅問題應該一早就已經睇得好清楚，照計應該要一早揾定目標，越早簽越好，但去到而家仲有幾日就轉會窗就嚟完結，都未有乜嘢比較呼聲大選傳咗出嚟，照咁睇西布朗要喺冬季轉會窗簽到一個心水嘅中堅，可能性真係比較低。

對比大Sam前幾次成功護級，筆者覺得最難果次係幫新特蘭護級成功。果陣大Sam 10月接手，雖然頭兩個月都唔見有太大改善，但果陣新特蘭有喺冬季針對性進補，而最後亦都一如大Sam平時咁，喺最後關頭連斬幾支強隊，最後護級成功。但以目前嘅情況睇嚟，今次大Sam要用現有嘅中堅陣容，最多加上一個同而家嘅差唔多實力嘅中堅去捱埋下半季，筆者覺得就算大Sam有幾在都好，要用而家手頭上嘅後防去徹底執行佢套4-6-0戰術，真係難過登天，至少嘅緊2、3月都好難見到有返生嘅跡象。以西布朗中資管理層一貫做法，過咗冬季窗之後如果都仲係唔見有改善，炒人嘅機會幾高，大Sam都冇情講。就算大Sam可以頂住，但照目前嘅人腳睇，唔覺得球隊嘅防守可以改善得去邊，大Sam果套護級秘方要以防守為先，要好似以前咁臨尾上身，真係唔係太大可能，可能大Sam嘅護級金漆招牌今次真係保唔住啦。