【球星講台】基奧 • 抨擊中成長

香港足球 於 08/07/2017 發表 收藏文章
【球星講台】基奧 • 抨擊中成長

基奧,原籍喀麥隆,喺香港效力超過9年,上年更取得香港護照入籍香港隊。呢位身形高大嘅前鋒曾經於14年為駿其天旭射入40球,成為甲組神射手,但近年為夢想駿其、南區上陣卻未能回復最佳狀態,更因表現不穩而被球迷取笑為「墓臭」。究竟基奧點睇自己嘅表現?對球迷嘅批評又有咩回應?

由低踢起

時間先返到20幾年前,基奧出生於一個小家庭,當時家境唔好,三餐溫飽亦成問題,自小就熱愛足球嘅佢,細個因為冇錢買波而要被逼同朋友踢橙、紙球。去到2007年,當時基奧喺家鄉喀麥隆嘅表現吸引到球探賞識,加盟葡萄牙球隊泰維倫斯,一季就射入咗27球,喺經理人說服下簽約飛馬,但因為種種問題而輾轉加盟傑志。

基奧於2007-2008年曾效力葡萄牙球隊泰維倫斯。

基奧曾短暫效力飛馬,但因為教練問題而轉投傑志。


高山低谷

2009年傑志推行西班牙化, 令佢被逼轉投大中,及後再先後加盟南區、黃大仙。2014年可謂基奧生涯高峰,於港甲為駿其天旭轟入40球,但之後一季喺港超嘅入球數字卻大大回落,基奧被問到點睇呢個改變,佢亦顯得非常無奈:「球員嘅辛酸,球迷的確好難明白,我雖然以神射手嘅身分協助駿其升班,但我發現我嘅合約中嘅薪金大減,而且當時係我成為永久居民嘅最後一年,所以我被逼繼續留喺駿其,以表現證明自己」

2009年效力大中嘅基奧

位置轉變而影響表現

「第二,當時教練要求我改踢翼鋒,令我要兼顧進攻、防守。冇錯,我深知我嘅表現未如預期,但我並冇為自己搵藉口,默默接受球迷批評,更努力訓練,希望球迷見到我嘅進步。總總嘅改變,無疑影響到我嘅表現,但球迷又點會明白我呢?」從基奧嘅口中,睇得出球員追求嘅,僅僅係球迷對球員應有嘅尊重。

基奧近年由前鋒轉為司職翼衛

季初不在狀態 到季尾入選港隊

上季中,基奧以本地球員身份簽約冠忠南區,今季初雖然上陣機會唔少,但一直未能以最佳狀態上陣,更有多次錯失黃金機會,面對球迷總總批評,基奧咁講『pre-season嘅時候我過度操練,令我非常疲勞,季初一直未能有好嘅發揮。而且今季大部分時間我都以翼衛為球隊上陣,唔少球迷都應該發覺我經常都要墮後參與防守,而進攻嘅時候我又要入到禁區嘗試入波,呢個新嘅位置令我有少少力不從心,而我亦需要更多時間適應,希望球迷能有更多耐性。』

基奧希望球迷能對佢更有耐性、尊重。

基奧默默嘅加操,加上與教練團嘅交流同體能訓練,令佢喺下半季嘅表現有明顯改善,吸引1隊印度/印尼球隊希望簽入基奧,及後更入選港隊嘅亞洲盃外圍賽名單。『當我知道入選港隊後,我非常開心同難忘,能夠為香港出戰,係我嘅榮幸,當然我知道我只係後備,所以我希望為球隊帶黎更多貢獻,贏得隊友同球迷嘅尊重!』

基奧下半季透過補選,入選香港隊嘅亞洲盃分組賽名單。

感謝教練 球迷支持

南區今季喺Ricky Sir嘅領導下成績彪炳,今季就成功殺入季後附加賽決賽,更於聯賽勇奪季軍,球隊表現咁好,基奧有咩同Ricky 講?『Ricky係一個好好嘅教練,即使我季初嘅表現唔好,佢仍然冇放棄我,不停同我溝通同改善我嘅技巧、心態。』Football is nothing without fans,基奧又有咩同一班鬧佢多過贊佢嘅Fans講?『我經常都話,作為球員,一定要尊重對球隊不離不棄嘅球迷,佢地無論球隊嘅成績如何都會入場支持,但同時我亦希望球迷對球員多啲耐心同尊重,即使世界級嘅球員亦冇可能長時間維持高水準嘅表現!』

經過一個不如意嘅賽季,基奧亦為自己定下目標。『我清楚自己嘅弱點,所以我亦經常加操以改善自己嘅控球同埋門,而我希望下季可以為南區同港隊帶黎更多貢獻,成為球隊嘅主力。』

基奧以成為球隊主力為下季目標。

入籍兵對港隊利大於弊

講完球會,就講香港隊: 港隊重用入籍兵嘅問題一直引起唔少球迷關注,而作為港隊 入籍兵嘅基奧又點睇?『國家隊並唔係一個球會,而港隊喺實力未如其他國家咁高嘅情況下,入籍兵可以對球隊有好大作用,而且如果國家隊喺利用入籍兵下取得好成績,對本土嘅球員亦有好大幫助。』

基奧認為入籍兵對港隊利大於弊。

球會趣事

最後,基奧分享咗喺南區嘅一啲趣事『話說上季火雞(陳湛羲)仍然喺南區,有次比賽正選上陣嘅佢竟然遲到,令Ricky Sir 好嬲,而佢就解釋因為要扶阿婆過馬路而遲到,令我啼笑皆非!而我每次諗起呢件事都會笑出黎!』

小結

同基奧訪問嘅幾個鐘,改變咗筆者對佢嘅睇法,曾幾何時,筆者亦曾經對佢嘅表現毫不留情咁鬧,的確,球迷往往好難理解球員所面對嘅困難。冇錯,論進攻,基奧唔係最勁,論防守,基奧亦唔係最勁。但至少,基奧有嘅係自知之明,知道自己嘅問題,不停加操,改善自己嘅表現,知道自己場上弱點,所以非常勤力回防,甚至返到禁區利用自己1.92米嘅身高優勢,協助處理高波。要一個踢咗足足9年前鋒嘅球員有咁嘅改變,絕非容易。而且,基奧永不言退嘅精神,更令自己成為年少時,於喀麥隆嘅隊友中,唯一仍然喺職業聯賽打滾嘅球員,一圓細個嘅足球夢。 球迷可以批評佢場上表現差,但我地絕對要尊重基奧嘅心態,基奧對自己表現嘅態度同執著,係唔少球員所需要學習嘅!

加油基奧!

圖片來源: 基奧 , apple daily, oncc

~~~~~~~~~~
本專欄會從不同角度,與球迷分享有關香港足球的所見所想。同時亦希望能吸引更多球迷入場欣賞本地波嘅賽事,為香港足球加油!

本專欄每月會出4-5篇文章,當中會有分析,講解或其他唔同類型嘅文章。

facebook page :香港足球

如果喜歡我們的文章,請即分享到︰

標籤: 香港足球  南區  本地波  基奧  

留言

會員
我要評論
請按此登錄後留言。未成為會員? 立即註冊
  • Siu KaLok
    Siu KaLok 於 08/07/2017 評論 NO. 1

    睇錯左基奧特

  • Kenneth Chu
    Kenneth Chu 於 08/07/2017 評論 NO. 2

    我以為係杜奧巴

  • Yee Yuen Wong
    Yee Yuen Wong 於 08/07/2017 評論 NO. 3

    扶阿婆過馬路而遲到

  • Terrence Ho Yeung
    Terrence Ho Yeung 於 08/07/2017 評論 NO. 4

    係基奥巴

  • Keith Wong
    Keith Wong 於 08/07/2017 評論 NO. 5

    識用佢 佢好好用喎👍

快捷鍵:←
快捷鍵:→