利物浦爭逐前四的發電機—古天奴

隨心寫足球 於 08/03/2015 發表 收藏文章
利物浦自不敵曼聯之後,已經錄得十二場英超不敗既驕人成績,將原本被視為失敗既球季扭轉過黎,而家於筆者執筆時只落後第三位阿仙奴三分既利物浦絕對係前四既有力爭奪者。利物浦強勢既基石,絕對係狀態回勇既巴西中場—古天奴。

自2015年,呢位22歲既巴西年輕進攻策劃者開始上力,新年日後,佢已經於八場英超中直接為利物浦貢獻五球,包括三個入球同兩個助攻。佢於利物浦既新戰術中光芒四射,而佢對修咸頓同曼城所射入既兩球世界波,令利物浦成功喺強敵手上取得六分,保有爭前四既希望。

古天奴於2013年據報以650萬鎊由國際米蘭轉投利物浦,至今已經兩年有多。佢於加盟後既半季內,立刻以三入球七助攻既成績令唔少人為其讚歎。佢既天賦繼續喺上季有所發揮,可惜焦點被前線蘇亞雷斯同史度列治,以及開始上位既史達寧搶去,大家都認為利物浦上季有力競逐聯賽都係因為有上述三人既爆發,而忽略左古天奴。當然,古天奴上季既表現的確比加盟初半季黎得有啲遜色,全季佢只係貢獻左五個入球同七個助攻,效率未如加盟初半季理想。

今季同利物浦整隊一樣,開季時古天奴表現同狀態都唔好,佢喺今季頭16場比賽中只係射入左一球,但自此之後,佢就開始谷底反彈,於11場比賽射入三球同交出五個助攻。佢會向防守球員方向運球以試探佢地,然後就用佢既速度扭過佢地,或者用佢既視野將皮球傳俾位置合適既隊友,有人話佢既傳球能力於利物浦陣中只比謝拉特差。最近佢於對修咸頓同曼城既比賽中甚至用入波去證明自己有改寫賽果既能力,特別喺對曼城既比賽,佢既表現完全蓋過左對面既大衛施華。

古天奴今季夥拍拉蘭拿不斷為紅軍製造機會,佢不斷走動、要波同尋找空位,佢既積極性絕對係紅軍既一支強心針。於對修咸頓既賽後訪問,羅渣士話利物浦既陣式令古天奴同拉蘭拿踢得更好,因為佢地可以喺翼衛保護邊路下,不時切入中間製造機會。呢段評論喺利物浦對曼城既比賽中得以證實,古天奴同拉蘭拿因為可以不時走入中路,加上曼城中場防守時企位有失誤,令佢地有好多機會喺曼城中場線同後防線中間拎波,製造威脅。

相比曼城既進攻策劃者大衛施華,古天奴於兩隊對戰不論於進攻上或防守上都明顯顯得更「生猛」,古天奴有四次射門,而施華只得一次;古天奴有四次成功過人,但施華只得兩次,防守方面,古天奴六次危險區域內攔截有兩次成功,而施華卻一次都冇。

古天奴若然可以於接落黎既比賽中保持如此高既狀態既話,不單止利物浦既強勢會延續,古天奴個人亦會成為歐洲炙手可熱既中場球員。古天奴已經證明左利物浦喺佢身上花既金錢係值回票價,因為佢今年會係利物浦爭逐前四的發電機。


好文推介:英國球場的古與今小測驗,你猜得對嗎?

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk

原文,經編輯

留言


請按此登錄後留言。未成為會員? 立即註冊
  • leglessbird 於 08/03/2015 評論 NO. 1

    上季已預期(期望)佢今季會大爆發 但季初真係一盤冷水淋落黎 好在依家總算無令對佢有期望嘅人失望 繼續努力 仍有大幅進步空間 特別係射門方面

快捷鍵:←
快捷鍵:→