五位轉位踢之後有更好表現的現役球員

隨心寫足球 於 03/03/2015 發表 收藏文章
講起一個足球員,大家一定會聯想到佢踢既位置。儘管一個球員可能可以客串多個位置,但係其實每一個球員都有一個自己最擅長的位置,對於一個職業球員黎講,佢地入行之前應該已經揀定一個自己最擅長既位置,並且有一定既發揮,先至會被教練睇中同提拔,但係以下既現役球員例子話俾我地聽:一個球員可能會去到職業生涯中期先搵到自己既最佳位置,並且越踢越好。

1. 甘賓尼

比利時國腳甘賓尼喺當初效力安德烈治同漢堡期間,其實係以防守中場既身份上陣,佢於2008年轉至曼城後,於領隊曉士既陣容下仍然被委任為一個防守中場。直至2010年,甘賓尼迎黎一個位置上既轉變,佢開始踢落一格,成為後防中路核心,而佢既身體對抗性、速度同攔截能力都令佢成為其中一個最成功既中堅,協助曼城贏得英超等錦標。

2. 雲佩斯
呢位荷蘭射手其實係雲加球員改造計劃中其中一個成功產物,雲佩斯起初喺飛燕諾踢波既時候係出任翼位位置,佢既速度同運球能力吸引左雲加既目光,最後令雲加帶佢去阿仙奴。加盟阿仙奴之後雲佩斯開始於鋒線上出現,扛起阿仙奴既入球重任。而雲佩斯轉到曼聯之後,亦係曼聯贏得英超既一大功臣,佢以26個入球成為當季既神射手。

3. 巴爾

巴爾呢位威爾斯球員於修咸頓出道既時候係擔任一個左閘,轉會熱刺之後佢既進攻能力開始慢慢進步,熱刺最後索性讓佢轉打左翼。巴爾其中一場代表作係熱刺對國際米蘭既賽事,喺嗰場比賽入面,巴爾一個喺左路千里走單騎,瘋狂地用高速、射門能力,同運球能力去撕破國際米蘭既防線,最後巴爾於比賽中射入三球。

4. 舒韋恩史迪加

2009年既時候,拜仁係由現任曼聯主帥雲高爾出任領隊,當時雲高爾作出左一個影響非常大既變動,就係將舒韋恩史迪加由右翼任置帶入中場中路,安排佢出任防守中場。呢一個轉變非常之成功,舒韋恩史迪加成為左球隊中場中路既催化劑,佢既力量、鬥志、跑動同集中力有效咁幫助拜仁於比賽中取得成功,最後佢亦成功協助拜仁奪得歐聯。

5. 派路
派路呢位意大利球員於布雷西亞出道,擔任一個9號半或輔鋒既位置,其後轉會國際米蘭,而佢被國際米蘭外借重返布雷西亞既時候,由於當時布雷西亞陣中已經有巴治奧踢9號半或進攻中場,所以派路被改派擔當一個墮後中場。派路其後效力AC米蘭時繼續被委派成為一個墮後中場,參與攻勢既策動同組織,佢既傳球能力、視野同護球能力令佢非常成功地成為一個世界級的墮後組織核心。


呢篇文章只係提及現役球員,但係講埋退役球員,例子一定唔會咁少,例如亨利(翼變前鋒)等等。大家都不妨諗下仲有邊位球員轉左位踢後有更好既表現啦!

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
原文,經編輯

留言


請按此登錄後留言。未成為會員? 立即註冊
  • 鄭珈hei 於 06/03/2015 評論 NO. 1

    朗尼油一位拳擊手轉做前鋒

快捷鍵:←
快捷鍵:→