英超煞科戰丨賽後文章 : 哥帥連串調動造就逆轉 維拉充分發揮自身長處 (曼城 3-2 阿士東維拉)

英超球季煞科戰,曼城面對阿士東維拉落後兩球之下,絕地反勝成功衛冕。過程當中,兩隊各有值得欣賞嘅地方,維拉踢法見效,發揮到自身嘅長處而一度領先,曼城主帥哥迪奧拿下半場嘅調動相當關鍵,最終成功逆轉,係球隊寶貴嘅經驗。

雙方陣容 :

⛵️效果不似預期
曼城上半場面對維拉泊大巴,球員似乎相當緊張,偶有失誤令短傳滲入效果不似預期,尤其最後一傳/射處理可以更好。防守方面,老將費蘭甸奴面對屈堅斯嘅衝擊顯得吃力,上半場曾於對抗之中落在下風,讓屈堅斯得到半單刀機會,好在史東斯及時補位。

🦁發揮自身長處
維拉防守極具整體性,補位移動速度足夠,令緊張嘅曼城未能製造太多機會。進攻方面,球隊兩閘壓上快攻踢法見效,攻勢唔多但具有威脅。36分鐘,兩位具有運轉速率中場杜格拉斯雷斯同積及藍斯,先後引球推過曼城前線同中線壓迫,藍斯分俾左閘迪尼左路落底線傳中,右閘卡殊從右邊後上插入禁區沖頂入網。

下半場嘅69分鐘,屈堅斯接應門將奧臣長傳,頭鎚支點俾到古天奴,古天奴攞高空波連帶內切扣過拿樸迪再射近處,艾達臣未能作出反應。古天奴充分展現級數,發揮其腳下功夫同冷靜嘅頭腦,為維拉拉開比數。

維拉賽前休息時間少於曼城之下,能夠長時間抵擋曼城攻勢,同時進攻方面踢法見效,成功以球員嘅速率同能力爭取入球,謝拉特及其麾下嘅團隊充分發揮到自身擁有嘅東西,值得可以商榷嘅係謝帥可以更早作出調動以補充體能,不過維拉嘅整體表現值得掌聲。
⛵️關鍵調動
曼城落後之下,主帥哥迪奧拿嘅調動成為關鍵。首先半場以施真高入替費蘭甸奴,施真高擔任左閘,簡些路移到右閘位,史東斯從右閘返回熟悉嘅中堅位置,抵擋屈堅斯嘅衝擊。

曼城兩閘簡些路同施真高都係用球組織攻勢嘅人才。下半場早段,曼城較多嘗試從左路滲入,施真高狀態大勇,49分鐘曾經於左邊以一敵三推入禁區底線傳中送到門前。

哥帥其後喺56分鐘以史達寧入替馬列斯,補充前線體能同衝擊力,再於68分鐘以根度簡入替貝拿度施華。正選嘅貝拿度施華主要負責組織滲入,而後備入替嘅根度簡負責不斷於偏左位置後上插入禁區埋門,根度簡入場之後,球隊增加從右路突破傳中。

⛵️扭轉局勢
哥帥嘅三個調動成為扭轉局勢嘅關鍵。76分鐘,史達寧發揮後備入替嘅體能優勢,右路變速爆落底線傳中,根度簡遠處後上插入衝頂入網追近成1-2。兩分鐘後,狀態大勇施真高左路突破推過布安迪亞,根度簡偏左位置後上插前,吸引到對方防中道格拉斯雷斯跟入禁區,防中禁區頂嘅洛迪,得到根度簡插前所牽引嘅空位,接應施真高助攻快補位嘅藍斯一步推射入網,為曼城追平2-2。再過三分鐘,迪布尼右路招牌地波傳中,根度簡再次喺小禁區偏左位置出現,門前推射入網。六分鐘之內,原本一片寂靜嘅伊帝哈德球場陷入瘋狂狀態。

🦁體能下降
曼城嘅入球,亦同賽前休息時間較少嘅維拉球員,體能下降而出現失誤有關。如第一個失球卡殊面對傳中波跳起未能頂中皮球,第三個失球,明斯面對長距離直線,「孤寒」地未有解圍,而選擇拗腰直接短傳俾隊友,但就將球權拱手送俾其後助攻嘅迪布尼。若然體能充足嘅狀況下,相信卡殊嘅起跳高度足以作出頭槌解圍,明斯嘅「孤寒波」,或者亦可以成功傳到杜格拉斯雷斯腳下。

⛵️寶貴經驗
相隔十年,曼城再於煞科戰以3-2經典逆轉贏得英超冠軍。五年內第四個英超冠軍,十年裏面第六個英超冠軍,睇落輕而易舉,但觀乎球隊職球員以致球迷嘅反應,哥帥甚至激動落淚,可以見到球隊贏冠軍嘅過程相當艱難。一如哥帥所言,利物浦幫助到曼城成為更好嘅球隊,今仗一定要喺逆境下反勝而最終成功嘅經驗,對球隊而言相當寶貴,甚至將會係日後球隊歷史嘅底蘊。恭喜曼城!

留言


請按此登錄後留言。未成為會員? 立即註冊
    快捷鍵:←
    快捷鍵:→