英超丨賽後文章 : 比賽過程緊湊但結果不如意 接下來只能抱平常心 (利物浦 1-1 熱刺)

英超季尾衝刺階段,利物浦同熱刺各有目標,同需三分。兩隊於晏菲路球場對決各一言和,兩敗俱傷。

雙方陣容 :

🔴⚪體能狀態
熱刺近個半月一周一賽,而利物浦近四個月一直維持一周雙賽。自四月開始,利記比賽場數係熱刺兩倍有多,利記體能狀態難及對手。然而從今場嚟睇,利記體能狀態比想像好,壓迫力量可以,加上熱刺好多時收縮防守,利記總算可以壓住對方。
🔴⚪防守部署
干地麾下嘅熱刺今場以防反取態應戰,球隊541嘅大巴陣,令對方難以製造明顯機會。高普今場安排步大力雄嘅中堅高拿迪繼續正選上陣,有助抵擋孫興慜衝擊,亦有助同哈利簡尼對抗,弱化其支點作用。

🔴⚪進攻表現
利記長時間於主攻陣地戰中,難以滲入熱刺嘅密集防守,只能靠狀態火熱嘅迪亞斯引球內切製造遠射機會,同以角球製造雲迪克中楣嘅頭槌。

雖然熱刺大部分時間處於被動,但其進攻效率甚高,上半場靴爾堡嘅射門只差門柱一關。下半場早段一次快攻,哈利簡尼、孫興慜同左路後上嘅薛斯隆三角配合,製造孫興慜領先嘅入球。
🔴⚪加強火力未能湊效
下半場落後之下,高普決定連換兩人,以祖達入替軒達臣,轉陣成424加強火力,亦以森美卡斯入替羅拔臣加強左路後上衝擊力。球隊多次嘗試傳中,但面對熱刺三位中堅嘅迎頂,未能湊效。除此之外,利記亦有斬到遠處攻擊對方「弱側」空間嘅攻勢,但阿諾今場狀態稍有下滑,其從右至左嘅長傳未能助森美卡斯衝擊左路。利記長時間久攻不下,除了74分鐘嘅入球,迪亞斯左路內切連過兩關再射門,皮球省中賓坦古亞入網。迪亞斯成功憑個人能力加上運氣助球隊迫和。
🔴⚪各有絕殺機會
比賽尾段,兩隊各有機會絕殺對方,但都只差二傳。泰亞高禁區頂偏左一記突破防線嘅傳球,去到右邊禁區底線,但阿諾未及調整步伐接應。熱刺尾段一輪圍攻,榮斯右路傳中,遠處嘅靴爾堡頭鎚二傳,不過皮球落點人前波後之下,哈里簡尼未能接應絕殺。

今場結果相信令兩隊球迷感到失望,但比賽過程中兩隊都有團火,而且戰況緊湊,眾將表現值得掌聲。

🔴⚪兩隊預期
曼城大炒紐卡素後,利物浦落後3分。利記要贏英超冠軍,就要曼城輸一場加上利記全勝兼追返四個得失球差,或者曼城三場之中打和兩場而利記全勝。兩種情況發生嘅可能性頗低,利記喺英超餘下三場英超比賽只能以平常心做好自己。

熱刺落後阿仙奴4分,然而下場北倫敦打吡之前,熱刺有多一日休息調整時間,加上主場優勢,球隊有望打贏呢場「6分波」。其後熱刺對般尼同諾域治不容有失,而阿仙奴面對紐卡素同愛華頓,有些微機會失分。阿仙奴仍有較大機會成功爭四,但熱刺仍有些微可能於聯賽榜反吸阿仙奴。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→