冬季轉會丨路爾斯迪亞斯或成利物浦關鍵奇兵 精選

冬季轉會窗倒數第二日，利物浦宣佈從波圖簽入來自哥倫比亞嘅翼鋒路爾斯迪亞斯。
🔴利迷驚喜
今次轉會消息事出突然，為利物浦球迷帶來驚喜，尤其球隊喺過去嘅夏天轉會窗未有引入進攻球員。

利迷獲得呢份驚喜，亦同熱刺有關。原本利物浦打算今季過後先買入迪亞斯，不過由於熱刺加入競爭，使利物浦提早作出收購。

🔴特點與文尼相似
迪亞斯過去主要擔任左翼/左中場位置，其特點同利物浦嘅文尼相似，能利用變速同爆發力，加上帶球節奏嘅變化擺脫對手。不論從中/中後場引球向前，抑或到前場突破左路，落底線或者內切入中路製造機會，迪亞斯同文尼嘅動作同推進路線亦係相似。而兩人嘅分別在於，迪亞斯比文尼更靈巧，而文尼則相對更強壯。🔴數據同戰績
迪亞斯於去年夏天嘅美洲盃助哥倫比亞殺入四強，自己成為神射手，打響名堂。今季，迪亞斯於葡超為波圖上陣18場，射入14球交出4個助攻，平均每場製造一個入球，效率甚高。而葡超之中每場平均射門次數、關鍵傳送同盤扭次數，迪亞斯三項數據都係隊中最高。

去到歐聯賽場，迪亞斯每場平均盤扭次數依然係全隊最高，而射門次數同關鍵傳送兩項數據均排隊中第二。小組賽之中，波圖處於「死亡之組」，球隊班底實力而言，實在難以同利物浦馬體會力爭出線，但迪亞斯兩次面對AC米蘭入球，令球隊得以壓過對方，取得歐霸席位。🔴有力成為關鍵奇兵
從上述嘅數據同戰績，可見迪亞斯喺波圖嘅角色相當重要。去到利物浦，相信迪亞斯有足夠能力分擔文尼同沙拿嘅上陣時間 (沙拿後備時文尼可擔任右翼) ，舒緩兩翼甚至體力下滑嘅情況，令球隊喺球季嘅長跑中得以維持進攻火力。

加盟初期，迪亞斯未必會係對手主要嘅看管對象 (畢竟今季嘅沙拿實在太強)，而迪亞斯具備速度同活力，結合個人突破嘅技術，或能殺對方一個措手不及，成為球隊關鍵嘅奇兵，尤其喺大戰之中兩隊對攻嘅時候。
最後，祝迪亞斯順利融入高普嘅體系，發揮實力，短期能助球隊維持進攻火力，將來能成為三叉戟接班人之一。