利物浦欠缺兩員大將下贏波,奈何英超爭冠難敵曼城,不如......

隨非洲盃開鑼,利物浦三位主將沙拿、文尼同基達分別為國家隊出戰。利物浦欠缺三人之下,於英超三球淨勝賓福特。

🔴控制戰局
相比首循環嘅對決,賓福特經過近半季嘅消耗,壓迫力相對下降,利記因此得以控制戰局。

🔴兩閘出波
沙拿文尼兩翼缺陣之下,前場組織力難免下降,面對密集嘅時候,較多以兩閘傳中嘅方式侵襲對方防線。上半場尾段角球攻勢,法賓奴頭鎚打開記錄。下半場一次快攻,羅拔臣early cross助攻張伯倫俯身頭鎚頂入靚波。

🔴提升信心
比賽尾段,南野拓實同費明奴合作壓迫搶到機會,費明奴助攻南野拓實入球埋齋。希望呢個入球能幫助上場喺聯賽盃對阿仙奴尾段空門失機嘅南野拓實提升信心。

🔴聯賽形勢
今場過後,利物浦喺聯賽榜升上第二位,踢少一場之下,落後榜首嘅曼城11分,同時領先身後嘅車路士兩分,同第四位嘅韋斯咸8分。

🔴不如改變策略?
觀乎聯賽榜分數同板凳深度嘅差距,利記喺英超嘅長途比賽之中,實在難以追趕曼城。然而從好嘅方面想考,利記前四位置算係安全,有一定嘅「失分空間」。高普及其團隊或可/或會改變策略,將用兵重心轉移至較大機會贏得咁標嘅杯賽,包括聯賽盃、足總盃同歐聯 (相信利記正選陣容實力加上本身已經成熟嘅戰術體系,足以同任何一支強隊決一高下,問題在於體能狀態足夠與否)。英超聯賽方面,可以用應對歐聯分組賽嘅用兵方式,依照對手實力適量輪換,一來可以讓主力有更多時間養精畜銳,準備淘汰賽,二來其實可以拉近同冇歐聯賽壓力嘅英超對手嘅體能差距。

留言


請按此登錄後留言。未成為會員? 立即註冊
    快捷鍵:←
    快捷鍵:→