轉會文章丨列強骨幹去邊好？ 精選

隨二月來臨，冬季轉會窗關閉。適逢農曆新年，小弟祝大家身體健康，心想事成！希望大家都可以努力做自己鍾意嘅事情！
今次冬季轉會窗雖然有唔少轉會交易，但仍有唔少今年完約嘅球員未有轉會，包括歐洲列強嘅骨幹球員。今篇先講其中兩位：

🗼麥巴比
麥巴比夢想加盟皇馬早就已經係公開嘅秘密，儘管PSG多番挽留，仍難以說服麥巴比回心轉意，多間媒體報道，麥巴比今季完約後將以自由身加盟皇馬。

麥巴比加盟皇馬，有望同法國師兄賓斯馬以及巴西新星雲尼素斯組成強大嘅鋒線。賓斯馬嘅支點作用加上卻奧斯或摩迪從後供應，相信足以令麥巴比充分發揮其速度。

擁有麥巴比，就如擁有一把尖刀，麥巴比能令皇馬進攻更加銳利，尤其喺大戰打快攻/反擊嘅時候，相信麥巴比嘅加盟會令球隊喺歐聯嘅競爭力大大提升。

⚪⚫迪巴拿
祖雲達斯同迪巴拿喺冬季轉會窗關閉後，仍有持續談判，同一時間亦有球隊向迪巴拿招手，包括曼城、利物浦以及國際米蘭。

曼城簽入了祖利安艾華斯，加上本身進攻球員，球隊前線班底雄厚。球隊對迪巴拿嘅興趣，或許在於佢能夠擔任唔同位置，包括內切入型翼鋒、「假9號」同進攻中場，相信係曼城，進攻時球員位置輪轉較多嘅體系中，迪巴拿係適合嘅人選。

不過，曼城進攻人員同體系本身已相當完整，迪巴拿去到曼城，預計難以一如以往喺祖雲達斯，擔任球隊核心，甚至未必能經常正選上陣。

另一支英超勁旅利物浦，早前曾接觸過迪巴拿。利物浦先後簽入祖達同迪亞斯，兩人或者係長遠接班三叉戟嘅人選。28歲既迪巴拿年紀唔細，更似係比較「即食」既替代者。
事關利物浦未肯打破薪酬框架同沙拿續約，沙拿同球隊嘅合約將於2023年完結，球隊可能於今夏將其賣出，爭取收回一筆轉會費。三叉戟另一員大將，費明奴可能於今夏轉會巴塞。能擔任翼鋒同「假9號」兩個位置嘅，就係迪巴拿。利物浦提早接觸呢位阿根廷進攻手，似乎係預備緊沙拿或者費明奴喺今季之後離隊。

除英超兩強外，國際米蘭亦係迪巴拿嘅選擇。比起轉戰英超，留喺意甲轉會國米所需嘅適應較少，不論比賽節奏抑或生活環境。