歐聯丨賽後文章 : 皇馬全軍退守見效 麥巴比絕殺勢令次回合更精彩 (巴黎聖日耳門 1-0 皇家馬德里)

歐聯十六強首回合,巴黎聖日耳門於主場以1-0小勝皇家馬德里。

雙方陣容:

🗼體能優勢
巴黎主場出擊,加上賽前比皇馬有多一日休息時間,巴黎擁有體能優勢,有條件喺互相抗衡之中搶到更多控球及機會,因此球隊今場比較進取。

👑全軍退守
皇馬體能狀態處於下風,加上需要防範極具衝擊力嘅麥巴比以及兩閘文迪斯同夏基美,亦要包夾美斯,防守任務艱巨。今季嘅歐聯去除了作客入球優惠嘅進攻誘因,或令主帥安察洛堤更放心地安排球隊全軍退守,盡量減少對方嘅推進空間。雖然早段曾俾到對方迪馬利亞喺小禁區前射門,但皇馬企穩陣腳後兩翼雲尼素斯同艾辛斯奧頻繁回防,451企位嘅防守,中路固然密集,而邊路包夾亦見效用,成功限制而對方右路進攻,對方左路嘅麥巴比同文迪斯亦未有嚐到太多甜頭。上半場中段,麥巴比開始嘗試更多進入中路,第16分鐘,美斯放高波繞過皇馬防線,麥巴比受壓於卡華積,射門被對方門將高圖爾斯救出。

👑嘗試向前
上半場,巴黎大部份時間掌握控球但少有明顯機會,皇馬使用非常保守嘅踢法,隊形長時間停留喺後場之下,控球比率只有38.1%,球隊攻勢甚少。皇馬完半場前嘗試向前壓迫擴張,輾轉製造上半場唯一嘅攻門,卡斯米路頭槌攻門僅僅斜出。

下半場,皇馬繼續嘗試向前壓迫,但巴黎嘅防守亦不遜色,改善了防守整體性不足嘅問題,未有俾到皇馬機會。皇馬增加壓迫之下隊形擴張,球隊三線之間嘅空位增加,而翼鋒向前壓迫之下,回後協防包夾嘅距離亦都增加,加上因球隊控球在腳時間較少,球員體能下降速度比對手快,種種原因令皇馬俾到巴黎一次又一次嘅機會,包括麥巴比搏到嘅十二碼以及美斯幾次引領攻勢所製造嘅威脅。其中麥巴比搏到嘅十二碼,就係來自面對卡華積單對單突破,所引致對方嘅犯規,可見皇馬缺少兩人包夾嘅後果。

🗼美斯表現其實唔錯
美斯操刀十二碼角度不足被高圖爾斯救出,比較可惜。美斯呢次射失十二碼成為今場其中一個焦點,對比同一時間C朗喺英超打破入球荒,美斯顯得尤其失色。其實美斯今場表現唔錯,4次關鍵傳送,5五次成功盤扭嘅數據並唔失禮。曾突破卡斯米路後於包夾之中找到空位將波送到門前,尾段兩次引領反擊,為後備入替嘅尼馬製造兩次近門機會,亦係美斯發揮影響力嘅例子。

🗼改變戰局
比賽去到最後,眼見握手言和之際,麥巴比於左邊突破包夾,再射穿古圖爾斯大細龍門絕殺對手,可見其改變戰局嘅能力。最後巴黎於首回合以一球優勢領先。

🗼👑次回合預期
接下來兩隊喺次回合之前,三場比賽嘅日子相同。巴黎因要飛往馬德里作戰,休息時間會稍比皇馬少,皇馬會有體能優勢。返到主場嘅皇馬想必會更加進取,巴黎或因此可以發揮強大嘅快攻或反擊能力。皇馬主帥安察洛堤或可以考慮以年輕而覆蓋範圍較大嘅華維迪取代比較年長嘅摩迪,藉此加強中場防守同抗衡能力,令球隊搶到更多進攻機會。相信巴黎喺首回合入球打開局面後,次回合嘅比賽將會更加精彩。

留言


請按此登錄後留言。未成為會員? 立即註冊
    快捷鍵:←
    快捷鍵:→