沙拿續約問題丨利物浦如放走沙拿係非常可惜 但有利於球隊管理 精選

記者 Fabrizio Romano 報導，沙拿希望留喺利物浦，但未接受球隊嘅續約條款。
今季係沙拿加盟利記嘅第五個球季，直到此刻，佢已經連續五季入超過20球。今季沙拿表現更加有突破，佢一改以往獨食嘅陋習，更多同隊友配合，令自己嘅球路更加變幻莫測。沙拿亦更多拉邊為隊友創造組織空間，幫助整體表現。一向出眾嘅個人能力加上思想上變得成熟，可能佢嘅巔峰其實啱啱先開始。小弟認為沙拿絕對值得四十萬甚至五十萬鎊嘅週薪。

利記遲遲未肯滿足沙拿嘅薪金要求，一來因為唔希望打破薪酬框架，增加引發更衣室管理、集體要求加薪等問題嘅風險，二來可能係為未來打算。

事關沙拿今年將會踏入30歲，難以保證其高峰期能維持一段長時間，而此刻其身價達到一億歐元。以利物浦管理層FSG量入為出嘅轉會取態，或會考慮賣走沙拿套現，再買入多於一個年輕人才以進行陣容接班工作，同時加強陣容深度。四年前，利記賣走古天奴後收購雲迪克同艾利臣嘅成功經驗，好可能會推動到FSG「重施故技」。
賣走沙拿係傾向可持續發展嘅打算，如果上述嘅算盤打得響，賣出沙拿後所收購嘅球員能成為球隊未來幾年嘅骨幹主力，令球隊未來嘅班底有著落，的確係好事。利記要持續維持穩定嘅競爭力，的確需要事半功倍嘅接班過程，先可以避免高峰過後，主力平均地年華老去導致整體表現下滑嘅陣痛期。

不過，從另一角度而言，沙拿金球獎級嘅表現同影響力係可遇不可求嘅，加上其良好嘅身體保養同更加成熟而減少依賴速度嘅踢法，相信沙拿仍有兩三年嘅高峰期，此刻賣走呢位埃及之王，甚為可惜。而接班方面，利記大部分位置已擁有較年輕嘅人選如祖達、迪亞斯、鐘斯、艾利洛、高拿迪等可供日後接班，未急切到要賣走一個王牌球員套現以收購年輕球員。

話雖如此，但上述題到嘅薪酬框架同管理問題，的確難以解決，而賣走沙拿亦的確能加速球員接班。放走沙拿，可以話係一個方便球隊管理嘅做法，如果沙拿企硬，相信FSG真係唔介意咁做。
無論沙拿最終何去何從，小弟希望利物浦今季能夠持續有好表現，而沙拿可以喺自己嘅巔峰時期，為球隊贏得更多獎盃，製造美好嘅回憶。