歐聯決賽丨賽後文章+來季預期 : 皇馬養精畜銳後發揮全部能力 比起「雙冠王」,「兩冠兩亞」更適合歸納利物浦

歐聯決賽於法蘭西體育場上演,皇家馬德里以1-0擊敗利物浦,奪得隊史第十四座歐聯冠軍。今場利記一貫地進取,多次嘗試入球但無功而返。皇馬養精畜銳過後,各球員再次令球迷大跌眼鏡。歐洲球季隨歐聯決賽完結,來季兩隊各自嘅競爭環境都將會有所轉變。

雙方陣容 :

🔴嘗試滲入
比賽延遲開波,球員身心需要再次適應。入局之後,利記面對皇馬收縮防守,多次嘗試以右路配合滲入禁區,曾製造到沙拿小禁區前嘅機會。左路迪亞斯受制於卡華積同華維迪硬淨嘅防守,威脅不足。文尼曾於偏左位置以一敵二入禁區射門。利記上述兩次攻門,加上其餘3次中龍射門都被高圖爾斯一一化解。
👑以穩為先但暗藏殺機
皇馬上半場以穩為先,無球時盡量收縮隊形,控球時拖慢節奏嘗試消耗利記球員體能。雖然皇馬數據上處於劣勢,但其快攻/反擊其實暗藏殺機。雲尼素斯上半場受干拿迪限制而難以推進,仲有艾拉巴一腳長傳俾到賓斯馬入禁區控球,制造混戰後射入越位嘅入球。至於越位判決,主要考慮攔截華維迪嘅法賓奴同干拿迪無法控制皮球方向,兩人嘅動作屬於「save」,皮球到返賓斯馬腳下時依然係同一個「play」,所以最終形成越位。

👑向前壓迫
下半場安察洛堤安排皇馬增加向前壓迫,令處於體能劣勢嘅利記用波顯得吃力。第59分鐘,摩迪回後引羅拔臣壓前,卡華積同卡斯米路聯手突破堤亞高同法賓奴嘅壓迫,俾到華維迪利用右路空間推進再以迪布尼式傳中助攻雲尼素斯射入。
🔴👑加強火力被拒之門外
利記落後之下,高普決定轉陣成424加強火力,曾經制造幾次機會,包括沙拿射門祖達後上加多一腳、祖達頭鎚二傳俾沙拿門前撞射、法賓奴長傳俾沙拿擺脫文迪射門,加上一次又一次嘅高空轟炸,利記嘅進攻都一一被高圖爾斯拒之門外。高圖爾斯力挽狂瀾嘅表現,令皇馬守住勝局,最終捧盃。9次撲救打破決賽記錄,MVP毫無疑問。

⚽️後記+下季預期

👑Class
皇馬養精畜銳近一個月,今場決賽得以發揮自己全部能力。利記傳奇領隊辛奇利曾講過 “Form is temporary class is permanent”,或者可以用嚟形容皇馬嘅中場三寶摩迪、卻奧斯、卡斯米路。回望淘汰賽,三人於季中體能狀態一般時,需要換入卡馬雲加同將華維迪移回中場,球隊先逆轉到巴黎、車路士同曼城。嚟到決賽狀態得到回復,今季亦無後顧之憂時,三人今場充分發揮其「Class」,表現不輸當年。不得不提賓斯馬今季寶刀未老,35歲高齡仍能長時間維持頂級表現,相當難得,如無意外應該會係今季嘅金球獎得主。

👑來季壓力更大
皇馬喺今季西甲競爭未算激烈,但下季就未必了,因沙維麾下,擁有年輕班底嘅巴塞隆拿大有進步,或多或少會帶來更大壓力,加上世冠盃賽程亦會增加體能負擔。皇馬正追求摩納哥嘅22歲中場祖亞曼尼,若成功收購,將會係皇馬中場年輕化嘅一大步,下季新老交替維持輪換之下,中場三寶摩迪、卻奧斯、卡斯米路喺關鍵時刻相信仍能發揮其「Class」。
🔴兩冠兩亞
利記經歷四條戰線嘅所有比賽,去到第63場比賽,狀態難及皇馬之下,球隊決賽表現進取並制造唔少機會,值得掌聲。比起「雙冠王」,「兩冠兩亞」更適合歸納今季嘅利記。兩個亞軍都係得來不易,總結成績時不應被忽略。決賽落敗嘅第二日,球隊返到利物浦市即刻巡遊慶祝看似矛盾,軒達臣同羅拔臣喺巴士上面接受訪問時坦言,落敗之後唔知點樣面對球迷。可幸利迷係知足嘅,巡遊當日紛紛上街支持球隊,氣氛同三年前歐聯冠軍巡遊無異。球迷當日嘅支持同鼓勵,相信令球隊士氣回升唔少。
🔴對手消耗自己叉電
今季非洲雙翼沙拿同文尼,因季中嘅非洲盃消耗大量體能,影響到下半季嘅發揮。下一季嘅季中,當列強猛將參與世界盃時,利記兩翼沙拿同迪亞斯就可以休息叉電,來季球隊前線體能流放會比對手容易,下半季相信比眾多對手更能夠維持進攻火力。不過,奧歷治將會離隊,文尼相信亦會離隊,令球隊前線輪換空間減少,球隊要尋找到替代人選,先可以顯現上述下半季嘅體能優勢。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→