偶爾發揮才華的才子 — 普巴 精選

普巴，體型高大強壯、具有速度、同時亦有出色嘅腳下功夫。能以準繩嘅長傳、一記重炮射門或者飛將軍式頭槌改變戰局。具有才華但未有經常發揮，意識不足，態度散漫，普巴總令人恨鐵不成鋼，甚至反感。
由於當年喺費格遜麾下未能得到上陣機會，普巴決意出走到意大利都靈，加盟意甲班霸祖雲達斯。普巴喺中場大師派路、防守力強嘅猛將維達爾同馬治斯奧身旁，防守負擔較少之下得以充分發揮其進攻才華。
到了法國國家隊，當年有覆蓋整片陸地嘅簡迪同強悍嘅馬杜迪在旁，普巴喺中場位置防守覆蓋較少，法國隊穩守反擊嘅戰術令球隊中後場緊密度足夠，而前場有大片反擊空間，亦適合普巴發揮。2018年世界盃，普巴剷個平頭，球風亦變得平實。當屆嘅佢專心幫助球隊先做好防守，再幫助球隊反擊，沉穩嘅表現得到一致嘅肯定。去到決賽面對克羅地亞，唔上腳貪功嘅普巴最終都迎來收獲，後上遠射入球嘅風采，比任何光鮮嘅髮型更加亮麗。從法國隊更衣室片段可見，普巴嘅講話甚具領袖氣質。
2016年夏天，普巴以當時破世界紀錄嘅8900萬鎊轉會費回歸曼聯。從前於祖記發光發亮嘅表現，同誓要證明自己嘅決心，或多或少令球迷期待普巴回歸奧脫福後，可以為曼聯帶來幾多。普巴喺曼聯偶爾會有好表現，如作客2-3反勝曼城嘅經典一仗，以及蘇斯克查作為看守領隊期間連場建功。不過，欠缺防中猛將拍檔「逗住」之下，普巴不擅回防補位同中後場組織嘅缺點表露無遺。世界盃過後，唔少人期待普巴能將國家隊嘅表現帶到曼聯。可惜現實往往係殘酷嘅，成為世界冠軍之後嘅普巴變得更加傲慢，近年連同其經紀人拉奧拿為曼聯帶來唔少麻煩，加上有時無心戀戰嘅表現，令曼迷恨不得普巴快快離開曼聯。
上個球季，蘇斯克查曾為普巴安排左翼位置，今季蘭歷克亦曾安排普巴於前線擔任「假9號」，普巴喺兩個位置嘅回防工作同中後場組織嘅負擔減少，得以更多引球推進，更多進取咁用球，期間表現唔錯，轉踢前線位置或者係其日後嘅出路。除戰術層面外，對於下一個教普巴嘅教練，更重要嘅係喚起「國家隊心態」嘅普巴，令其有動力發揮自己嘅才華。雖然上述任務相當艱巨，但若然做到，效果仍然值得期待。臨別之際，都係祝普巴下一站順利啦。

歡迎支持本文合作夥伴 @unitedfans_hk !!