歐聯決賽丨賽前文章加心水 : 全能利物浦手法豐富 皇馬「超級後手」能否帶來冠軍?


歐洲三大盃賽之中,歐霸同歐協聯先後落下帷幕,恭喜法蘭克福同羅馬。接下來嘅週六晚上,將會迎來歐聯決賽,利物浦同皇家馬德里嘅對決。兩隊相隔四年再次喺決賽相遇,最終會由利記登上歐洲球壇嘅巔峰,成為盃賽三冠王,抑或係皇馬歐聯「動漫」故事嘅完美結局 ? 各位期待今次巔峰對決嘅球迷朋友們,睇波之前不妨先睇以下小弟嘅預測同心水。

🔴👑體能狀態
利物浦季尾馬不停蹄,足總杯決賽同車路士鬥到加時,英超同曼城鬥到最後,體能消耗巨大。好在歐聯決賽賽前得到久逢嘅一星期休息調整時間,高普安排球員先放假叉叉電再備戰,相信令球員體能狀態有所回復。皇馬四月尾已鎖定西甲冠軍,自從5月4號面對曼城嘅歐聯四強次回合之後,一直喺剩下嘅西甲聯賽進行輪換,養精蓄銳準備歐聯決賽,相信體能狀態會比利記更加優勝,有條件同利記踢持久戰。若比賽去到加時階段,可睇高皇馬一線。
🔴👑一貫陣容同踢法
雖說有體能優勢,但相信皇馬唔會因而不斷大舉壓迫,始終正選三位年紀較大嘅中場卻奧斯、摩迪同卡斯米路,維持壓迫嘅時間有限,而利記嘅文尼同迪亞斯狀態良好,有力以快攻/反擊令皇馬後防風聲鶴唳。

皇馬預計首先以於歐聯淘汰賽一貫嘅陣容同踢法應戰,上半場以穩為先,其中有十幾分鐘會增加向前壓迫。相信華維迪將會擔任右翼,以其覆蓋範圍幫助三位中場防守同對抗對方。利記相信會以球隊一貫進取嘅踢法應戰,預計上半場會有較多主攻陣地戰時間。

🔴手法豐富
利記爭取入球手法豐富,球隊今季短傳組織滲透能力大有進步,而兩邊嘅轉移拉扯再滲入/傳中相信亦能帶來唔少威脅。除此之外,角球/死球攻勢亦係利記嘅一大武器,球隊同德國科技公司嘅Neuro11 團隊合作,令球隊死球表現進一步提升。利記於聯賽杯同足總杯兩次互射十二碼擊敗車路士,高普亦有歸功於Neuro11 嘅團隊,若然歐聯決賽去到互射十二碼階段,利記雖有跡可尋,但有神經科技幫助之下仍可被睇高一線。
🔴憂慮之處
利記令人擔心嘅,相信係兩位早前受傷嘅中場大將堤亞高同法賓奴。兩人如今已經復操,決賽亦可以出場,但狀態成疑。另外,除看管對方王牌賓施馬以外,亦不容忽視對方左翼雲尼素斯。利記右閘阿諾經常上前到右翼/偏右中場位置,未必時時能夠趕及回防,必須有人幫手補位,防中法賓奴剛剛復出難有最佳狀態之下,高普或會安排速度較快而覆蓋範圍較大嘅干拿迪正選「逗住」阿諾。

👑「超級後手」
今屆皇馬最可怕嘅地方,莫過於其「主角光環」,一次又一次逆轉對手而晉級。不論面對巴黎聖日耳門、車路士定係曼城,皇馬三次逆轉前安察洛堤都有換入洛迪高同卡馬雲加,而華維迪三次都有返到中場中位置。安察洛堤連串嘅調動效果極其明顯,因為:
⚽️華維迪、洛迪高同卡馬雲加三位年輕球員極具活力
⚽️華維迪同卡馬雲加運轉速率勝過正選三人組卻奧斯、摩迪同卡斯米路之中任何兩人
⚽️卡馬雲加同洛迪高擁有後備入替嘅體能優勢
⚽️洛迪高進攻能力更勝原本嘅右翼華維迪
上述四點令皇馬嘅壓迫力、對抗能力、進攻速率同鋭利度大幅飆升,加上少許運氣,足以殺巴黎、車仔同曼城三支強隊措手不及。
🔴利記應對
皇馬嘅「超級後手」能否帶來歐聯冠軍?還看利記後備球員發揮。若祖達後備上陣,相信能為球隊提速。如費明奴後備上陣,相信能進一步加強球隊控制節奏嘅能力。中場方面,米拿雖然經驗老到,而身體對抗亦毋庸置疑,但其速率未必足以對抗皇馬調動過後嘅中場球員,除非其狀態非常之好。除米拿以外,高普及其團隊可以考慮可攻可守嘅基達,甚至同對方卡馬雲加年齡相近嘅鍾斯或者艾利洛,後備入替支撐中場。

👑並非無敵
不過值得留意嘅係,「超級後手」並非無敵,皇馬調動後嘅默契難免不及正選組合,或更易出現破綻。

🔴👑賽前心水
上月英超天王山大戰嘅賽前文章,小弟分享過自己嘅心水,而最後真係估中曼城主場2-2同利記握手言和。今次小弟會估利記喺90分鐘內以2-1險勝皇馬。原因如下:
⚽️利記進攻可謂全能,皇馬取態往往以穩為先,防線不穩之下,利記有望攻入兩球
⚽️皇馬「超級後手」雖然厲害,但首席射手賓斯馬將要面對雲迪克,係今屆前所未有嘅考驗
⚽️皇馬多次逆轉取勝眾人皆知,相信利記就算領先超過一球亦唔會掉以輕心
最後,希望各位球迷好好享受今個歐洲球季嘅巔峰對決,香港時間5月29號凌晨三點,一齊拭目以待!

留言


請按此登錄後留言。未成為會員? 立即註冊
    快捷鍵:←
    快捷鍵:→