《賽後分析》x《深入淺出》由三分變零分 再由零分變一分 干地是賺了還是蝕了?

BluexLion車迷手記 於 20/10/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

第一輪既歐聯分組賽經已完成,位於死亡之組既車路士以7分站立榜首,相信總算令各位藍軍球迷鬆一口氣。今場主場迎戰羅馬既賽當中,車路士其實在上半段已經取得比數上既優勢,但好快被對手收復失地並係下半段反超前,最終都成功追和各得一分,究竟哩一分對干地黎講係賺還是蝕?一齊分析一下。
.圖片來源 : Evening Standard

干地先排出352陣式應戰,由於簡迪繼續因傷缺陣,繼聯賽對陣熱刺後再一次將大衛雷斯調任防守中場,伙拍巴卡約高及法比加斯,而中後衛位置由基斯甸臣頂上,左邊繼續係加利卡希爾而右邊係艾斯拍古達,至於翼位方面,由於摩西斯上場傷出需養傷四星期,位置上由薩柏哥斯達出任正選,左邊為馬高斯阿朗素,攻堅方面由及時復出既莫拉達再加上夏薩特繼續合作。
.圖片來源 : CalcioMercato.com

單單係睇哩個陣式同人腳配置,其實干地可以話已經將車路士既最好人腳編排哂出黎,如果真係要斟酌的話,可能稍稍將卡希爾既位置換成魯迪加,始終隊長上場對水晶宮經已正選上陣踢足九十分鐘,而魯迪加該場係未有上陣,體力上定必比前者優勝,而結果出到黎卡希爾係三名後衛中得分最高既一位。
.圖片來源 : The Pride of London

開波初段首都狼明顯取態更比主場既車路士為積極進取,可能見到同組另一場馬體會比卡拉巴克守和,今場取得分數就能將差距拉遠,反客為主既踢法令羅馬取得控球上既優勢,車路士只能一直在等待防守反擊機會,結果喺11分鐘就由大衛雷斯既世界波先開記錄,可以話為球隊打下一支強心針。今場巴西人既表現相當不俗,至少比上一場對水晶宮時穩定無乜點唔追波失位,更成功封鎖得到尼恩高蘭,傷出後車路士防守上明顯出現多次漏洞,就睇得出佢當中既重要性。
.圖片來源 : Daily Mirror

即使藍軍係先開記錄既一隊,但並無因為咁而喺形勢上有任何異轉,羅馬繼續保持著控球而車路士則等待下一個機會,直到37分鐘機會再次出現,今次就由兩位攻堅擔任主角,夏薩特先傳比靠左路既莫拉達,西班牙人推到入禁區後吊一個高波比番夏薩特射入,慢鏡睇番其實莫拉達起腳後個波係省中對手隻腳,所以唔計佢助攻,不過佢兩個既化學作用同埋哩兩個入波,可以話令車路士球迷瘋狂起來。
.圖片來源 : Skysports.com

比較意想不到既係車路士並唔能夠將兩球差距既優勢帶番入更衣室,前曼城球員高拉洛夫單人匹馬喺左路進行爆破及射門,哩個入球其實只係單純個人突破並無配合其他隊友,而場面上羅馬亦唔係打緊反擊,車路士既中後場球員亦喺番自己既半場,哩球失波最大責任必定係艾斯派古達,幫口講句干地可能安排佢負責分擔右路既防務,始終薩柏哥斯達主打攻強守弱,場上亦見到多次失位被對手在邊路進攻,但明顯艾斯派古達喺哩球企位上出錯,導致佢與基斯甸臣既連接出現空間,比高拉洛夫硬爆。
.圖片來源 : Corriere dello Sport

亦探討番依個問題,其實高拉洛夫既速度偏慢都唔係今日既事,佢竟然可以爆得過後生過佢既艾斯派古達,反映出過往既「穩定先生」近期都開始穩定地唔穩地,係體能上出現問題?定係因為全勤四線作賽而導致狀態上出現起伏?相信干地有機會要諗一諗輪換會唔會較為合適。而打出2比1既比數入更衣室可以話係今場既轉捩點,相差一球對羅馬球員黎講係重燃追和什至反勝既希望。
.圖片來源 : Eurosport

下半場57分鐘,干地換出負傷既大衛雷斯,巴西人傷後一直堅持作賽,但意大利人不願再作風險,安排柏度入替,哩個部署其實亦係值得斟酌既地方,後備席上的確無一名具實力既中場替補,但係場上既基斯甸臣外借慕遜加柏期間其實都有出任過防守中場,而賽前佢亦有表示干地要求佢喺訓練中擔當其它位置作備用,何解唔將佢臨場調任而換入魯迪加?唯一解得通既就係中後衛哩個位置隊中就只有雷斯及基斯甸臣能夠擔當,干地情願換入一名進攻球員變陣亦不願受著一個唔適合打中後衛既球員上場接替既風險。
.圖片來源 : Complete Sports Nigeria

到64分鐘,又係前曼城球員,今次係前鋒迪斯高接應長傳窩利抽入追平,成個過程可以話相當輕鬆,而負責守著迪斯高既基斯甸臣可以話需要負全責,轉身跟唔切迪斯高走位,提供足夠空間比佢完成整個攻門。當然,年輕球員難免偶有失誤,係睇基斯甸臣自己能唔能夠喺今次既失誤中學習。
.圖片來源 : Goal

過多6分鐘,到羅馬一次自由球攻門,今次二傳入禁區同樣搵到迪斯高,亦都係無人看管之下頂入,其實自前傳奇隊長泰利不再領導防線以後,好多時對手處理一啲自由球二傳入禁區既攻勢都能製造出危險畫面什至入球,觸動唔少迷既心臟。到75分鐘今次到夏薩特乖巧頂入,先叫幫車路士保住一分未有在主場之下輸波收場。
.圖片來源 : Sports Illustrated

干地贏左賽前部署,但敵不過球員臨場受傷,過於大膽既變陣調動,令車路士所得到既優勢通通都嘔番哂出黎。傷兵名單之中新增大衛雷斯及巴卡約高,再一次縮減意大利人手上既選擇,恩喜既係見到夏薩特回勇,但喺人手捉襟見肘之下黎緊更要面對聯賽排名高一位既屈福特,能否破釜沉舟,還是錄得聯賽三連敗,就要睇干地既造化了。

文章最後更新時間 : 20/10/2017 15:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 干地  車路士  歐聯  羅馬  

留言


請按此登錄後留言。未成為會員? 立即註冊
  • Wai Kei Chan 於 20/10/2017 評論 NO. 1



    傷兵多,因為干地少輪換, 下過受傷好大機會係艾朗素同apz

快捷鍵:←
快捷鍵:→