343只是352既前奏?(中篇) - 後場

藍獅 於 28/04/2017 發表 收藏文章
-請支持藍獅 Facebook專頁-
<歡迎轉載 請列明出處 謝謝>

上回講到(343只是352既前奏?(上篇)),以依加車路士既人腳如果長期踢起352上黎會面對人手不足既問題。而干地亦有喺下半季一些領先緊或正選缺陣下既賽事轉用352,效果好壞參半。今回將會探討如果干地繼續以哩個陣為目標,後防會有什麼變動。
守門員,干地向來對龍門都沒有什麼特質要求,主要以球員整體質素及穩定性為先要考慮,唔似哥迪奧拿(Josep Guardiola Sala)咁因為要打控球踢法而送走祖赫特(Joe Hart)換來巴禾(Claudio Andrés Bravo Muñoz),而古圖爾斯會係干地既首選。比較可惜既係,後備門將比高域來季好大機會會離隊他投,始終球員還在當打之年,需要長期參與球賽以保持狀態,後備未免太大材小用。而第三門將伊度亞度今季來到藍橋時,簽定一年合約,暫時尚未代表車路士在英超上陣,未知今季結束後會否續約還是讓佢離開,外借名單中亦有合適替補取代第三門將位置,相信干地只需要為比高域既離開而作收購準備。
到後場部份,即使來季改踢352,後衛工作變動亦不會太多。先總括一下人員配置方面,泰利將會喺今季完結後離開球隊,蘇馬亦會喺季後與干地相商討去留,有機會以外借方式暫時離開球隊。而外借名單中有多位擔任後衛既球員,但當中似乎只有基斯甸臣較大機會回歸一隊。而言即使蘇馬最後決定下季唔離開,基斯甸臣頂替泰利既空缺,小弟認為也有機會喺後衛位置上收購一名球員。
首先,艾斯派古達不太可能長期擔任右後衛,始終其它對手開始留意到佢擔任哩個位置弱點,針對性及刻意地喺車路士既右路製造高空攻勢,在來季多線作賽底下,相信西班牙人需要在後衛與右翼衛之間遊走輪換。另外,大衛雷斯以及卡希爾速度慢既問題已經唔係什麼新鮮事,對手前鋒只要屬於速度型就能輕易挑戰車路士防線,尤其在次循環主場對陣曼聯完全表現出黎。大衛雷斯上半季有著出色既表現,干地看準佢擁有將皮球快速傳送到前線能力,因此安排中後衛位置,而下半季表現有所回落,出現不少驚險場面。至於卡希爾,今季接近九成時間都係以隊長身份落場,除左季初表現比較反覆之外,轉陣到343後也可用不過不失黎形容,但小弟認為兩者來季必需進行輪換。
雖然卡希爾同大衛雷斯在場上都互有溝通,但兩者都正正缺乏泰利那種企出黎領導防線既能力。與其係咁,倒不如輪換其中一個,讓新拍檔去彌補後防缺乏既速度元素。當然,卡希爾來季如無意外會正式成為隊長,喺仲打得既情況下干地會唔會輪換佢亦係未知知數,而戰術上不論343或352,後衛至少有一人需要擁有長傳用波能力,暫時喺車路士現有同外借既人腳底下,似乎只有大衛雷斯擁有咁既能力,兩者之間輪換何人?小弟會選擇留任後者。
相信艾基會係合適既替任人選,足總盃準決賽對陣熱刺既表現絕對令人信服,反而身為老大哥既大衛雷斯應該在場上多加提點指示,讓艾基能夠更冷靜處理防務。前者表現確實相比於蘇馬為穩定恰當,自從經過大傷過後,法國新星的確未搵番自己上季既狀態,因而來季外借鍛鍊亦係理想做法。加上基斯甸臣回歸,以上三子喺未來將會擔起陣守車路士防線既重任。

<Andreas Christensen>
在後衛外借名單當中除左基斯甸臣外,還有卡拉斯、美亞斯加、米高赫陀以及一些年輕小將。前者在當年一戰利物浦成名,可惜隨即展開外借生涯,今季在英冠球隊富咸(Fulham)效力,表示季尾會與球會商討去向,相信重返藍橋機會不大;上年冬季加盟而今季被外借到荷甲衛星球會維迪斯(Vitesse Arnhem既美亞斯加,似乎來季會繼續外借吸取經驗,到英國球會鍛煉會更為合適;而米高赫陀應該好大機會離開車路士,今季被外借到德甲球隊法蘭克福(Eintracht Frankfurt),相信佢會步迪洛保積(El Hadji Papy Mison Djilobodji)既後塵同樣成為失敗收購。

<Tomáš Kalas>

<Matt Miazga>

<Michael Hector>
相比於343,352中堅位置需要更著重位置防守,由於兩翼衛負擔會更重,導致更大機會出現邊路回防唔切既情況出現,所以中堅必須安守本份及少後上,即使角球攻勢後亦要快速回防;經驗、速度、位置感、提場能力將會係重要要素。卡希爾和大衛雷斯都已經三十出頭,艾斯派古達未係中堅既長期理想人選,蘇馬、艾基、基斯甸臣等年輕卻缺乏經驗,未有一位球員能乎合四大要素,再加年齡層上既斷層,似乎的確缺少一位屬當打之年既正中堅,當然,哩個只係一個額外建議,在蘇馬未外借離隊下球隊下季已經擁有六名可打中堅既球員。來季後防究竟會以不變應萬變,定係直接黎個青春風暴換班,你又點睇?

下回再續。

本季守門員及中堅球員名單
1 Asmir Begovic 比高域(GK)13 Thibaut Courtois 古圖爾斯(GK)37 Eduardo 伊度亞度 (GK)
5 Kurt Zouma 蘇馬(CB)6 Nathan Ake 艾基(CB/WB/DM)24 Gary Cahill 卡希爾 (CB)
26 John Terry 泰利(CB)28 Cesar Azpilicueta 艾斯派古達 (CB/WB)
30 David Luiz 大衛雷斯 (CB)
部份外借守門員及中堅球員名單
Jamal Blackman (GK)Nathan Baxter (GK)Tomáš Kalas 卡拉斯 (CB/LB)
Matt Miazga 美亞斯加 (CB)Michael Hector 米高赫陀 (CB)
Andreas Christensen 基斯甸臣 (CB)


<歡迎轉載 請列明出處 謝謝>
藍獅 每週末出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  352  343  干地  

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 29/04/2017 評論 NO. 1

    kalas已經見晒頂 踢左咁多年都無乜咩進步 美亞斯加同hector感覺就係錯嘅收購 實力一般 未能夠成為即時戰力 潛力亦無ake zouma 基斯甸臣咁高

快捷鍵:←
快捷鍵:→