《轉會窗關閉在即 淺談收購盧卡古後車路士餘下的轉會動作》

藍獅 於 27/08/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


比起上個夏季轉會窗,今年相對上藍軍可以用「冷靜」兩個字黎形容,除左收購左盧卡古之外就只係簽入前富咸門將比堅拿利為三號門將人選,而同時間亦為球隊陣容進行縮減,將部份不合杜曹所用既球員套現或者出租,務求盡可能達至陣容平衡;轉會窗關閉在即,車路士仲會有咩轉會操作係構思或者執行當中?一齊同大家分析一下...

上季喺杜曹帶領下球隊成為左歐聯冠軍,表現備受讚賞,不過以陣容同戰術角度黎睇,喺個別位置上依然都係補充上既需要,當中包括晒前鋒、中場及中堅三個位置,而其中個人認為補充中堅既緊急程度並不下於前鋒,雖然喺陣中經已擁有泰亞高施華、魯迪加、基斯甸臣、蘇馬以及確定留隊既小將查路巴,喺數字上的確存在「量」,但喺「質」上並無因為過去果一個賽季而得到提升。

杜曹曾經喺過去既訪間有提及到四人後防會係佢個人既理想藍圖,奈何喺防線上每位中堅球員都各自有一啲弱點或者弊病令到件事尚未可以執行,繼而喺新一個賽季依然維持住三中堅作為主要陣式,而過去一季都睇到杜曹偏好選用既球員人選,當中蘇馬就被淪為第四什至第五選擇,哩名法國中堅所受到既重視程度絕對比起林伯特所執教既時候有所遞減,主要原因相信係關於球員既個人特質同專注力有關 (稍後將會有關於蘇馬既詳盡文章作交待),亦洐生出收購西維爾中堅觀迪既傳聞。

當然一切都要留待官方正式宣布至可以作實,不過如果要喺中堅位置上作出「質」既提升的話,就定必需要犧牲蘇馬而換取收購新中堅既空間,而除左後防線之外中場亦都係需要關注既地方,佐真奴、簡迪加上高華錫三人經已一同喺藍橋渡過左三個賽季,而其中簡迪喺年紀上亦正式入三,近年開始斷斷續續地出現唔同大小既傷患,球隊實在有必要考慮中場第四人既人選,你可能會話,咁點解當日唔留番基爾摩亞,你亦可能會覺得倒不如比多次機會路夫斯捷克。

要擔任第四中場從來都唔係容易既事,尤其係依加車路士既戰術體系依舊保留住雙中場作首選,要抵得住出場時間被壓縮,同時喺質素上要有即戰力可以話係難上加難,如果要基爾摩亞哩個年紀長期擔任後備什至連名單都入選唔到實在講唔通,加上佢喺能力上尚未踏入成熟之年,外借爭取更多上陣時間吸收經驗會更為合適,至於路夫斯捷克,個人對於佢傷後既個人能力存在保留,再加上本身傷患史偏多,到需要既時候能否上場仍有疑問。

近日傳出會以外借形式租借馬體會中場沙奧尼古斯(Saúl Ñíguez),人選上的確係一個唔錯既選擇,能力以及多樣性同時兼備,不過最終都要睇下杜曹同球會以及球員之間三者既取向,而唔好忘記巴克利亦都依然喺球隊之中需要為佢尋找下家,更加唔好講仲有佢既同鄉真禾特,有傳球隊都需要釋出哩兩位球員而換取新中場球員加盟既空間,距離轉會窗完結時間愈黎愈近,轉會傳聞屬真還是假好快都自有分曉。


文章發表時間 : 27/08/2021 12:55
文章最後更新時間 : 27/08/2021 12:55

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  杜曹  盧卡古  觀迪  沙奧尼古斯  

留言


請按此登錄後留言。未成為會員? 立即註冊
    快捷鍵:←
    快捷鍵:→