《被車路士摧毀一生 昔日的不萊梅雙子星 - 馬高馬連》

藍獅 於 26/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


其實車路士過往都唔算收購好多德國藉球員,除左依加喺隊中既魯迪加之外,對上一個能夠喺史丹福橋除得成功既就可以數到中場既波歷克,繼上次介紹完一位高開低走既舒爾尼之外,其實仲有一位既足球旅途比起後者更為慘淡,佢就係當日響遍德甲既「不萊梅雙子星」之一 - 馬高馬連。

馬高馬連曾被喻為「德國版美斯」,除左一樣係低盤扭型攻擊球員之外,亦善於技術性突破過人以及高速推進,可以話係一名能傳善射既翼鋒球員,早年經已成名於德甲既雲達不萊梅,與當日同為隊友既奧斯爾齊名,兩者亦被德國視為未來既潛力球員,而同時亦都因為咁好快引起各國勁旅既注視,前者轉投皇家馬德里,而後者及後就選擇加盟應屆歐聯冠軍既車路士。

藍軍喺贏得「大耳朵盃」一改過往務實足球作風,希望大打技術型足球,於各大聯賽開始尋覓目標,先後收購夏薩特、奧斯卡等名氣大潛力優厚既前場球員,而其中馬高馬連亦係其中之一,但哩位德國翼鋒對比起其他新球員喺適應英超方面就真係無咁理想,長期於冷板凳上作後備,即使有機會上場都交唔出佢喺雲達不萊梅嘅高水準表現,加上傷患一直斷斷續續未能根治,更一度要落到藍軍U-21作賽。

而即使車路士喺其後更換過唔少主帥,但一直無任何一位選擇將馬高馬連留在隊中,風格唔合適之下車路士唯有將佢外借,德國人亦就咁開展左佢嘅「人球」生涯,先後外借到西維爾、費倫天拿、安德列治及特拉布宗,但始終因為傷患影響,表現一直都浮浮沉沉,亦因為咁無球隊肯喺外借之後出價買斷佢,直到去差唔多完約之時奧林比亞高斯先至出手向車路士提出收購,而其後亦轉會至貝爾格萊德紅星,更喺上季歐聯分組賽一度交出助攻協助球隊擊敗利物浦。

當日既德國天之驕子,今日都經已三十有一,亦喺今年年頭亦選擇轉投沙特聯賽掘金,離開大眾所注視既球壇之中,無疑當日選擇轉投車路士係佢人生之中最錯既一個決定,再加上傷患既加持,摧毀左馬高馬連既足球生涯,踩入黃昏之年,只希望佢能夠繼續享受足球既快樂時光。


文章發表時間 : 26/04/2019 11:20
文章最後更新時間 : 26/04/2019 11:20

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→