《老將的決擇 韋利安、柏度、基奧特應何去何從?》

藍獅 於 22/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


正所謂家有一老如有一寶,具經驗既球員除左能夠喺場內場外以身作則之外,亦可以作為一班年輕小將既參考對象,尤其係今季大打「青春風暴」既車路士,喺平均年齡大大推低之下,更需要陣中一班老將提攜,不過哩三名老將韋利安、柏度以及基奧特既合約將於黎緊夏天到期,黎緊應何去何從?

喺三位球員之中,韋利安係最受林伯特重用既一個,今季巴西人接收夏薩特遺下既十號球衣,而自季初傷癒復出後,一直維持穩定表現博得林伯特以及部份球迷改觀,戰術配置上利用韋利安強勁既向前推進能力,於邊線上將球由中後場推到對手禁區邊位置,雖然無論喺最後一傳還是最後一射方面依然有受挑剔既地方,不過喺今季簡迪經常受傷之下,球隊喺場上既推進力係非常要依賴韋利安,哩一點係無容置疑。

但巴西人喺新合約期上與球會爭持不下,喺雙方未有讓步空間之下似乎韋利安最終會選擇離隊他投,亦衍生出柏度續約既機會,其實由開季至今一直未有傳出任何車路士有意與柏度續約既消息,相信好大程度係取決於球會偏向與韋利安續約,而喺黎緊下季仲有由阿積士加盟既薛耶治(Hakim Ziyech)底下,藍軍無論喺陣容還是薪酬上亦有需要騰出空間,如今與韋利安既續約談判告終,變相好大機會會將空間轉移到柏度身上。

柏度雖然喺戰術效益上未及韋利安大,而且狀態亦較為起伏不定,不過哩位西班牙翼鋒依然都仲有貨賣,始終巴塞出身既球員技術底子優厚,即使年紀漸大亦無影響到佢喺持球突破或者能傳善射既特質,再加上球員喺續約年期上未有太多意見,上季柏度經已以一年短約方式同車路士續約,而早前佢亦表示外界曲解佢回歸西甲球壇既消息,相信如果車路士再開出新合約的話,柏度好大機會會繼續留效。

至於基奧特方面,相信黎緊夏天轉會窗車路士會繼續喺前鋒位置既補充上努力,由於歐國盃被受武漢肺炎影響而延後一季,「銀河唯一」既首選定必繼係續能夠提供穩定上陣機會既球隊,即使自冬季轉會窗結束後基奧特重新獲得上陣機會,但預計如果下季車路士能夠成功於前鋒位置上得到補充的話,哩位法國柱躉式中鋒就只會繼續淪為次選,既然係咁的話完約離隊尋找新球將會更合適。

韋利安與柏度兩者留一,而基奧特忍痛地完約離隊,無論係對球隊以至球員都會係較好選擇,改朝換代係勢在必行既事,只要循序漸進式唔好一下子急於換班,咁對球隊既長遠發展都係起到正面作用。


文章發表時間 : 24/04/2019 11:25
文章最後更新時間 : 24/04/2019 11:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  韋利安  柏度  基奧特  

留言


請按此登錄後留言。未成為會員? 立即註冊
    快捷鍵:←
    快捷鍵:→