《外借或比留隊好 靜待琢磨的契機 - 湯姆利(上)》

BluexLion車迷手記 於 28/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


喺今季車路士既「青春風暴」之中,最耳熟能詳定必係艾巴咸以及馬臣蒙特既名字,卻遺漏了季初一同與林伯特由打比郡回歸史丹福橋既另一小將 - 湯姆利,受惠於大衛雷斯喺轉會限期前離隊,令原本外借既湯姆利得到留隊既機會,不過今季得到既上陣時間並唔多,似乎下季按原定計劃外借會比起留隊更好。

湯姆利自八歲時已經加入車路士青年梯隊,主要係踢中堅同右閘哩兩個位,而哩位英格蘭小將其實早喺今季之前經已為車路士於一隊上過陣,當時要數到15/16球季尾段對李斯特城既收咧戰時,湯姆利後備入替伊雲奴域(Ivanović)上陣三十分鐘完成英超處子戰,而佢喺效力U19期間亦以核心球員身份協助車路士青年軍連續於14/15及15/16兩個球季獲得歐洲青年聯賽冠軍,一度震撼年青球壇。

而及後湯姆利同好多年青球員一樣被車路士安排外借,希望佢地能夠喺進一步既環境下成長,相比於同為中堅既基斯甸臣,擁有加拿大以及英格蘭雙重國籍既湯姆利當時就只獲得國內球會既邀請,英格蘭人於17-18球季被外借到英冠球隊候城,而該賽季表現亦相當理想,令候城喺季尾亦希望正式將哩位英格蘭小將收歸旗下,但遭到藍軍拒絕,而其後一季被時任打比郡主帥林伯特點名外借,連同隊友蒙特以及青年軍主帥佐迪摩利斯(Jody Morris)一同到英冠,最終湯姆利於季尾更當選成為打比郡應屆年度最佳球員。

喺今季回歸史丹福橋後,其實車路士有意將湯姆利外借到英超球會效力,而藍軍喺同時回收蘇馬之下令愛華頓有意用哩位英格蘭小將填補其空缺,正喺哩個時候大衛雷斯提出轉會申請,令林伯特不得不立即叫停湯姆利既外借事宜,最後喺轉會限期前雷斯正式轉會至同市對手阿仙奴,而湯姆利就獲得留隊機會正式為車路士一隊效力。

由於季初時段有魯迪加受傷缺陣,林伯特輪流安排蘇馬、基斯甸臣以及湯姆利三位年輕球員上陣,但無論係邊對中堅組合黎講都唔太比到人安心既感覺,而喺魯迪加復出後湯姆利亦慢慢淡出正選行列,再加上冬季轉會窗後林伯特更加偏重於德國人加基斯甸臣作中堅組合,令湯姆利更加難以得到上陣機會,就連後備席上既位置都被蘇馬取代。

下回將會延續討論以及探討佢喺下季既動向應如何是好...


文章發表時間 : 28/04/2020 10:35
文章最後更新時間 : 28/04/2020 10:35

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  湯姆利  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→