《關於收購盧卡古 我想說的是...》

藍獅 於 09/08/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


還記得年頭時候杜曹走馬上任成為車路士新主帥時,出過一篇《關於杜曹 我想說的是...》 既文章分享自己對哩個接替既睇法,當時指出杜曹會係一個唔錯既理想接任人選,但果陣外界絕大部份人並唔太睇好哩位德國主帥,結果佢用行動証明一切,將車路士帶回正軌,更成為應屆歐聯冠軍,當日反對杜曹的聲音經已消聲匿跡;直到近日開始傳出收購盧卡古既消息,難以服侍既車迷又再出現那張令人難堪的嘴臉,早已在球員未回歸前經已打定輸數,總是遺忘及分不清球隊的需求、現實與時機,難道總不能認清事實撇除自己過去所殘存的「印象流」嗎?

先講需求,自上季季尾時段一直傳出藍軍有意收購新前鋒既消息,可見得杜曹仍然對陣容上既提升充滿野心,添姆雲拿、夏維斯似乎都被定性為翼鋒位置為主,而艾巴咸亦離隊在即,最重要既係球隊喺攻擊線缺少左入球數字既保証,難得前鋒收購行動有管理層於背後大力支持,當然有更大空間可以在巿場上物色合適人選。車路士既候選名單主要圍繞住夏蘭特、盧卡古以及哈利簡尼三人,操作上喺哩三名球員之中都一直都以夏蘭特為收購首選。

可惜既係「神女有心,襄王無夢」,哩位妖人前鋒多番表明並不急於喺哩個轉會窗離隊,顯然車路士並唔係球員心目中既第一選擇,同時多蒙特亦係標價上令藍軍管理層卻步,衡量過付出太大代價之下車路士亦暫緩左有關收購行動。至於哈利簡利既情況就相對簡單,熱刺主席利維從來都唔會同車路士有任何生意上既往來,都經已成為最大障礙唔需要再傾落去,變相令車路士大力推動收購盧卡古既計劃。

現實話你知盧卡古會係唯一可行方案,但你可能會話與其將佢帶回家,倒不如等下季夏蘭特既解約金條款啟動後再作出收購,喺度真係好希望哩一眾球迷認清現實別再痴心妄想,今個轉會窗車路士喺歐聯冠軍作襯托底下加上為唯一一支主動作出收購夏蘭特既球隊,球員都依然無動於衷,到下季其他列強喺財政資金開始有所恢復後,說實話藍軍仲有咩本錢去同人競爭?

再講就係時機問題,巿場上具級數能力再加上已受認証既前鋒選擇經已少之又少,而同時利雲、賓斯馬等人都已經三十開外依然非常當打,再要車路士去玩「擦擦咭」高價收購一名未受驗証既前鋒潛力新星?巴舒亞伊哩個惡夢都已經有板你睇;你亦可能會話與其要盧卡古的話情願唔作出任何新收購,其實唔知你有冇睇到球隊季前集訓既賽事,跟上季一樣創造到唔少入球機會,但依舊都係把握唔到將個波送入網既場面,既然身為主教練既杜曹都認為前線需要一啲新衝擊,如果喺哩一刻有資源既情況下都唔作出改變之下,加上其他列強球會都有作出針對性收購去改善自己既陣容,喺依加既環境就只會不進則退,矛頭首先就會指向杜曹。

不過同為由意甲加盟既佐真奴都用左三個球季去改變一眾車迷對佢既目光,相信大家對盧卡古既準則會更為嚴厲苛刻,當然一切都未成定案,等待官方真正確實轉會後,再同大家分析杜曹究竟需要盧卡古邊啲特質去深化攻擊線,下回待續...


文章發表時間 : 09/08/2021 13:00
文章最後更新時間 : 09/08/2021 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  盧卡古  國際米蘭  

留言


請按此登錄後留言。未成為會員? 立即註冊
    快捷鍵:←
    快捷鍵:→