《硬件全面升級 軟件如何配合? 淺談林伯特的進攻戰術大方向》

藍獅 於 14/09/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


經歷一個相當「大手筆」既轉會窗(仲未完),車路士陣中大部份位置經已進行具針對性既補充,喺硬件全面升級底下,接下來就要睇林伯特如何喺軟件方面作提升,從而將新舊兩批球員配合下發揮最大威力,哩個時候正正就係考驗哩位少帥功力既時候。

上季林伯特上任後,都因應對手而嘗試過好幾套陣式,其中最為常用既分別係4231、433以及343哩三種,單計運轉流暢度最高定必係以沙利遺漏落黎既433傳控體系最為優勝,同時林伯特試圖將蒙特加入到中場體系當中,希望藉著哩位英格蘭小將既特質加強過往欠缺既助攻力,而的確收錄到唔錯效果,但同時衍生出簡迪喺定位上既尷尬以及功能上既問題,哩位法國第一防中配合其他隊友之下喺場上既位置依然未有一個好清晰既定案。

而言隨之而來既就薛耶治、添姆雲拿以及夏弗斯等一單接一單針對前線升級既收購,哩幾位新球員連同陣中既佩利錫同蒙特都能夠至少打到兩個位置,就此特意喺下面簡短評述佢地擅長位置同特性...

  • 添姆雲拿 : 主要擔任球隊前鋒位置,同時能夠擔任左翼球員,持球時偏好於向左路發展,即使無球在腳時亦好願意喺中前場區域不斷遊走穿梭去捕捉機會,不過喺特質上需要配合多一名前場球員(前鋒/攻擊中場)於佢身邊作支援,從而為雲拿製造更多進攻空間至可以全面發揮到佢既長處(詳情可參閱球員專題文章《 如何將添姆雲拿的能力最大化 將是林伯特今季的最大課題》)。
    -
  • 夏弗斯 : 相比於添姆雲拿,夏弗斯個人就偏好於右路區域為多,球員同時能擔任前鋒攻擊中場以及右翼角色,如果單係比較哩三個位置得出既表現的話,擔任前鋒既數據最為出色,相反普偏認為佢最岩打攻擊中場位置既表現就較為一般,由於球員協防能力弱,如果以中場角色上陣的話有機會令球隊出現攻守失衡既情況,加上喺效力利華古遜既晚期時被發挖出擁有適合打中鋒既潛質,同時具備支點制空力、速度、射門觸角等要素於一身,只要將佢放喺愈前位置能夠發揮得出既能力就會愈大。
    -
  • 佩利錫 : 加盟經已一季既美國隊長主要以左翼鋒出戰居多,雖然喺效力多蒙特時期都各自平分左右兩翼角色,但相對上喺史丹福橋擔任右翼位置既表現就無咁亮眼,始終佢喺左邊走入中路推大位用右腳射門成個走位動作都會比較流暢,球員善於喺邊路利用技術以一敵二進行突破,傳射判斷快而且精準,加上樂於同隊友進行配合走位,喺新球員加盟火力已加強之下佩利錫來季將獲得更多進攻空間,更為有利於佢喺場上既發揮。
    -
  • 薛耶治 : 能夠同時擔任右翼攻中左翼以及中場位置,而近年黎較多以逆足右翼身份出戰,擁有能夠作出精準傳送同射門既左腳成為球員最具價值既地方,個人最大殺著就係喺右邊路位置利用左腳斬遠位比隊友接應,又或者走入中路進行射門,令對手防不勝防,再加上同時壇於處理死球、角球以及邊路區域既長傳,帶黎左質量上既提升。
    -
  • 蒙特 : 主要以攻中身份出戰,同時能擔任中場中以及左右兩翼角色,球員以勤力同活動覆蓋面為賣點,主力以支援前鋒為首要任務,於佢身後捕捉第二點,亦喺適當時機會嘗試施展遠射,同時亦會到邊路與隊友小組配合協助進攻,相對之下擔任左右翼鋒時表現就較為一般(詳情可參閱球員專題文章《車路士年度最佳青訓球員 - 美臣蒙特》)。

如果要組合一個陣式務求用盡以上所有球員的話,4231似乎最為理想,但其實所諗出黎既幻想都只適合於「打機用」,強行將所有攻擊球員組合成華麗陣容喺現實黎講係不切實際,反而喺方向上應以球員最壇長位置為首要選項,繼而配合陣式作選擇,前鋒方面首選會以夏弗斯以及添姆雲拿為首,後者需要雙箭頭或其他進攻球員作支援,左翼鋒主力就會交由佩利錫擔任,而同時添姆雲拿可作為次選,至於右翼鋒首選就交由薛耶治負責,而夏弗斯亦可作選擇,最後攻中位置由蒙特作首選,薛耶治亦能同時出任。

而陣式上大方向推斷都會繼續以433以及4231為主打,同時不排除三中堅以及雙前鋒陣式為次要選擇,基奧特決定留隊接受挑戰,佢喺前線伙拍添姆雲拿等人既配合實在令人期待,加上前線球員擁有質素上既提升,意味住佐真奴能夠提供更多直傳助攻機會,過往意大利人被批評為沒有助攻數字既派牌型中場,當中其實有一部份係由於隊友並未能成功把握得到破門機會而造成。

而個人認為林伯特會主力以佩利錫、夏弗斯以及添姆雲拿為重心,三人喺前線不斷走位換位穿梭中前場拉扯對手從而製造進攻機會,當箭頭拉邊時對面既翼鋒都插入到中路區域,互相補位,配合薛耶治、佐真奴為前線輸送彈藥,而高華錫以及簡迪就作為攻守平衡之選,不過磨合需時,相信季初哩段時間球隊既整體表現會較為反覆,而由於哩度既大部份球員都較易受到傷患影響,球迷們亦無需擔心其他不在名列上既球員會得唔到機會,別忘記林伯特是「奬勵足球」的先行者。
當然,以上一切都純屬推測,現實上能唔能夠實踐都要取決於林伯特既安排同球員喺場上既表現,亦係時候睇下哩位少帥想為藍軍打造既真正足球理念究竟能夠為球隊推升到去邊個高度...


文章發表時間 : 14/09/2019 12:45
文章最後更新時間 : 14/09/2019 12:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→