《佩利錫正式繼承藍軍十號 美國隊長能否成為夏薩特完美接班人?》

藍獅 於 12/09/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


令唔少車迷萬眾期待既來季號碼分配名單終於出爐,其中最為大家關注既10號球衣最終得嘗所願落入佩利錫手中,雖然加盟短短一季,不過美國隊長經歷季初一段適應期過後表現愈戰愈勇,喺唔少關鍵時刻都挺身而出為球隊奪取分數,而自加盟消息一出後外界都一直認為佢能夠成為夏薩特既理想接班人,事實又係咪咁?可以一齊討論一下...

當日以5800萬鎊既買斷價由多蒙特轉投史丹福橋,佩利錫既加盟明顯係為藍軍翼鋒接班而鋪路,始終過去接近八年時間哩個位置主力都係由夏薩特、韋利安以及柏度三人支撐,後兩者已到三十之年,而夏薩特本意上亦一心轉投皇馬,車路士需要添購新翼鋒都並唔係啲咩秘密黎,而佩利錫早已在德甲成名,無論年齡、現有能力還是未來潛力都的確係藍軍理想既改朝換代人選。

以外借身份繼續效力多蒙特多半季後,美國隊長於上季季初正式加盟車路士,雖然喺季前熱身賽獲得到唔少上陣時間,不過去到正式開季後得到既機會就大大縮減,主要原因係佩利錫果段時期對於英超賽場明顯存在著一定未適應,尤其係喺持球背身果下既對抗性非常之弱,令到佢基本上都未控定個波都經已比身後對手boom走,更莫講話可以做到其他野,而林伯特亦選擇先將球員收於後備席上,等待加強背身能力後至再一步步遞增佢既上陣時間。

經歷一段訓練過後,佩利錫亦逐漸開始拿捏得到英超賽場既生存之道,信心與此同時有所提升,背住對手接應後轉身高速持球推進、由左邊線入中路推大位射以及推左走右突破等畫面時常出現,亦奠定左佢喺左翼鋒既正選位置,更喺復賽後連續為球隊取得關鍵分數,以入球同助攻協助車路士最終以第四名完成賽季,而球員本人亦以11個入球以及10個助攻完成首個英超賽季,數據上可以話相當耀目。

不過佩利錫亦要面對住另一個敵人,就係「傷患」,脆弱既體質令到佢基本一個賽季有至少四份一既賽程唔能夠上陣,短則缺陣一至兩場,長則就座底五場賽事以上,而有近半既傷患係佢喺操練時或者賽場上自己整傷,亦好多時都係喺球員狀態最好既時候出現,感覺好似循環不息咁;以天份同潛力黎講佩利錫絕不下於當年既夏薩特,不過如果佢要達到後者既高度,就有必要搵方法減少自己應負受傷既時間,至可以維持到高水平既狀態交出相對既表現。

再加上今季有添姆雲拿、夏弗斯等人既加盟,相信喺配合上佩利錫可以發揮既能力將會再有進一步提升,背負著標誌性既10號有一份壓力,亦同時可以係一份推動力,希望能夠帶動佢成為車路士陣中真正既「美國隊長」。

文章發表時間 : 12/09/2019 15:45
文章最後更新時間 : 12/09/2019 15:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  佩利錫  夏薩特  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→