《車路士年度最佳青訓球員 - 美臣蒙特》

BluexLion車迷手記 於 18/08/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


青春風暴下,林伯特今季一共提升五位青訓球員於一隊之中,如果要選出當中一人為賽季最佳青訓球員,美臣蒙特可以話係筆者既不二之選,雖然哩位英格蘭新星被冠名為林伯特「契仔」,被指狀態不佳或者表現失準時仍會繼續留於場內,不過以全個賽季整體咁黎睇,美臣蒙特既表現的確係喺被提拔既五位之中最為亮眼既一人。

雖則蒙特自少已經加入車路士青訓系統,不過其父親並唔睇好佢能夠晉升成為藍軍一隊成員,主要原因係球隊過往咁多年以黎都只係成功出產傳奇隊長泰利一人為自家青訓,不過蒙特並無因而聽從父親既建議離開兒時至今既愛隊,反而更加推動自己尋求進步努力向上游,先後經歷過外借到荷甲衛星球會維迪斯(Vitesse)以及英冠打比郡之後,今季適逢恩師林伯特上任成為車路士主教練後終於得到晉身一隊既機會。

上季兩者經已喺打比郡合作過一季,林伯特以至教練團對於蒙特既運用及個人特質可以話相當熟悉,賦予佢喺戰術中既核心地位,球員除左能勝任熟悉既攻中以及中場中位置之外,亦同時可以擔任左右兩翼,而林伯特正正留意得到藍軍現有既中場球員當中,普遍都缺乏禁區後上連同遠射哩兩項元素喺裏面,上季作為主力既簡迪、佐真奴以及高華錫並唔具備哩啲特質,令到球隊喺面對住一啲嚴密防守既對手時欠缺哩一道「冷箭」板斧。

開季初段林伯特主力將蒙特配合艾巴咸為中路進攻組合,希望利用後者既速度突破以及搶點能力為攻堅推進第一點,而蒙特就負責喺佢身後執第二點,同時前者亦善於走到邊路同隊友打小組配合,加上活動覆蓋範圍廣闊,配合戰術上利用佢同隊友之間互相兩三腳短傳猜鬆對手後再立即塞個直線打突擊,可以話係林伯特既慣用套路手法,蒙特的確能夠為藍軍中場提升活力之餘同時加入以往缺少既新元素喺度,而陣中亦未有其他球員可以取代其角色特質。

不過年輕球員往往都因為缺少經驗,尤其係喺體力留放方面處理得比較差,較容易唔識收放而自我chur乾,蒙特喺季初爆發一段之後好快力有不繼而狀態逐步回落,到賽季中段亦相對明顯無季初時期表現得咁活躍,相反喺受疫情影響停賽時得到休息機會,復賽後狀態又再度回勇,哩一點下季實在有必要多加留意;另一方面蒙特喺場內決策上仍有唔少進步空間,喺拿捏傳或射既時機同決定方面實在有待改善,尤其係面對住強隊時由於車路士攻力並非十分雄厚,能夠製造出黎既埋門機會更會顯得珍貴,當然蒙特依加都仲係相當年青,相信透過不同形式既訓練同比賽經驗可以令佢一步步成長。

能夠與佩利錫一同入圍英超年度最佳年青球員候選名單,亦証明左佢地喺英超打既第一季擁有高水平表現,雖然兩人最終未能獲奬不過對於一眾車路士球迷黎講都經已給予眼前一亮既感覺,而黎緊球會將會繼續喺個別位置上進行收購以提升整體戰鬥力,希望蒙特哩幾位青訓們能夠喺哩個更具挑戰性以及競爭力既環境下繼續進步成長,為車路士打造新黃金一代而努力。

註 : 車路士官方尚未公怖任何球員個人奬項得主 標題只作虛構

文章發表時間 : 18/08/2020 11:40
文章最後更新時間 : 18/08/2020 13:30

延伸文章 :
《「尚有」不足 卻比下有餘 林伯特的第一季成績表》

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  美臣蒙特  蒙特  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→