《當車路士舊帥遇上車路士新將時 傳賓尼迪斯回歸喜鵲欲求巴克利加盟》

藍獅 於 26/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


岩岩早兩日先出完篇講巴克利既文章 - 《駕馭不起傳奇8號的8號 - 巴克利》,估唔到哩位英格蘭人又再次成為主角,外界傳出即將賣盤既紐卡素有意搵返前主帥賓尼迪斯回歸執教,而肥賓既構建藍圖當中亦將會以車路士既巴克利以及曼城後衛史東斯作為頭號目標,如果最終真係成事成為另一支富豪球會的話,相信為競爭激烈既英超再增添多一份刺激。

集中於討論巴克利,相信唔少車路士球迷亦會舉腳贊成賣走佢,尤其係係路夫斯捷克經已傷癒復出後,前者既上陣時間亦將會被進一步遞減,再加上依加既藍軍經已不乏本土球員存在於大軍之中,而當日由愛華頓將巴克利帶到史丹福橋既主因除左喺英人名額外亦因為價錢上既低廉,1500萬鎊對於果時黎講可以話係一個超值既價錢,同時相信如果紐卡素決定真係提出收購的話車路士喺哩單交易之中係可以成機賺番一筆。

有唔少人對賓尼迪斯究竟欣賞巴克利啲乜存在疑問,當然,英格蘭喺車路士陣中無論以能力同星味黎講都不屬於高水準球員,但對於如果要重新構建既紐卡素黎講,肥賓亦唔能喺一開頭就已經吸引到過量世界級球星加盟,亦有需要循序漸進地引入相當水平既球員,而對於巴克利黎講生存於列強之中的確係有啲「雞肋」既味道,不過如果去番一啲英超中游球隊擔當核心身份的話相信以佢能力黎講就絕對勝任有餘。

再加上巴克利亦要為自己既前程打算一下,除左喺人工方面之外亦關乎到自己喺國家隊生涯既層面,歐國盃因武漢肺炎而延期一年,意味住修夫基會以下季球員既狀態同成績作為入選既標準,而巴克利喺車路士既處境經已被一眾後輩蓋過風頭,同時英格蘭近年黎都從不缺乏同樣位置既中場球員,而功能同特性上亦有好多選擇,除左隊友既蒙特以外亦有效力李城既麥迪臣(James Daniel Maddison)以及維拉既基亞利殊(Jack Peter Grealish),單計今季表現同狀態的話巴克利拍埋去都已經高下立見。

而喺車路士既角度,早前都探討過有關於中場線未來方向 - 《只求重質不求重量 淺談車路士中場線的重組與方向》,如果要騰出更多空間比到林伯特再收購新既心儀球員的話,賣走巴克利或者外借蒙特會係最為可行既選擇,既然肥賓經已主動為車路士作出決擇,藍軍亦可以作一個順水人情幫助哩位前歐霸功勳教頭一把。


文章發表時間 : 26/05/2019 12:00
文章最後更新時間 : 26/05/2019 12:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→