《雨過 天清 有一種苦苦堅持 叫基奧特》

BluexLion車迷手記 於 22/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


傳聞英超復賽在即,各隊球隊亦相繼開始恢復訓練,而車路士方面亦連續公佈兩單官方消息,分別同陣中兩位老將基奧特以及卡巴尼路續約一年,其中最為車迷樂見既定必係「銀河唯一」繼續留隊,由一月冬季轉會窗一直傳出離隊傳聞到今日續約一年,當中經歷可以話雨過天清,亦同時體會到苦苦堅持既重要性。

基奧特從來都唔係好有天賦既球員黎,無論喺阿仙奴還是車路士年代,都係一啲默默耕耘,為球隊付出所有既球員黎,尤其係喺今季一眾年青小將當中,更需要老經驗既球員以身作則,而林伯特亦多次向外界表示哩位法國中鋒喺球隊中既重要性,無論係喺日常訓練之中,還是場上場外既表現,都能夠為年輕球員樹立榜樣,分享經驗,相信曾經做過球員既林伯特最深明當中既體會。

但其實今季既基奧特係自加盟車路士以黎過得最為痛苦既一季,當日喺干地帶領下無論喺雙前鋒還是單中鋒陣式之中「銀河唯一」都能夠發揮得到自己最善長既作用,而上季改由沙利作主帥後,雖然只能擔任希古恩既後備,不過都總能夠喺歐霸戰線之中尋回自己既價值,最終更贏得歐霸奬盃,同時球會亦喺當時單方面啟動合約中既自動續約一年條款,強制基奧特要留喺史丹福橋多一季時間。

不過自林伯特執掌過後,上半季賽程之中既法國人所得到既機會可以話比起沙利年代更少,一直都只能於板凳上渡過,而由於當時既歐國盃尚未延期,時入任法國國家隊主帥迪甘斯亦多番強調,如果基奧特希望入選參賽名單之中,就有必要離開車路士,雖然球員亦正有此意,亦一度同舊主帥干地所帶領既國際米蘭行得好近,甚至經已達成有關合約細則,但由於藍軍當時並搵唔到任何合適既替代人選,令基奧特離隊既心願都只能打消念頭。

不過球員亦非常有職業操守,表示即使離隊不成亦會專注投入球會餘下比賽,而喺哩個時候受惠於艾巴咸受傷患困擾,令基奧特終於得到難得既機會上陣,戰術層面上黎睇哩位法國中鋒雖然作用單一,不過都足以為隊友製做簡單直接既機會,而對比起另一位隊友巴舒亞伊既作用就更為顯著,再加上賽季停罷等不明因素,最終亦令林伯特改變主意留任基奧特,亦係球迷們樂意見到既事黎。

希望基奧特既苦苦堅持能夠勉勵到依加既香港人,無論前路幾咁黑暗過程有幾咁困難都好,都要嘗試保持自己既信念堅持落去,至少,不應該習慣絕望下去...


文章發表時間 : 22/05/2019 11:55
文章最後更新時間 : 22/05/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  基奧特  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→