《悶局的大勝 卡斯洛達對車路士歐聯賽後分析》

藍獅 於 29/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


一個令人興奮既賽果,更延續不失球紀錄,車路士終於喺今季既歐聯分組賽之中取得第一場勝仗全取三分,作客擊敗俄羅斯球會卡斯洛達,除放寛部份球迷入場令場面更為熱鬧之外,座上亦出現一面久違既面孔,自前季歐霸決賽後油王艾巴莫域治終於再次成為現場觀眾,令一眾車迷們重回熟悉的感覺。

由於賽程緊密,林伯特並無安排到堤亞高施華隨隊遠征俄羅斯,陣容上個別位置亦有作出輪換,前場繼續由添姆雲拿擔任箭頭以及夏弗斯為輔鋒,同時安排早兩場傷癒復出有後備上陣既薛耶治作右翼正選,左翼就由奧岱擔任,雙中場就收起左簡迪終於比番出場機會高華錫伙拍佐真奴,而防線上魯迪加亦正式解凍,同蘇馬合組中堅二人,左右兩閘就依舊源用捷維爾及艾斯派古達。

如果你單純睇精華或結果的話當然會對全取三分表示滿意,但事實就正正相反,其實成場波既內容同進程都相當悶局,亮點亦都唔係特別多,攻勢上甚至可以話係對手佔多數,卡斯洛達由開賽到完場都一直非常主動進行壓迫,並無因為雙方實力差距而作出退讓,如果唔係後防及門將既個別個人犯錯,加上前線射門欠運的話,比數上更有可能會以和氣收場,亦變相洐生出車路士近期一直存在既弊病,其中三線連接同距離既問題就最為明顯。

相關文章傳送門 : 《逼搶與「偽」逼搶 無組織可言的轉守為攻 拆解林伯特的防守遮醜布》

中前場同後場之間既距離過闊,引致對手能夠於後防線到中場之間大造文章,每當中堅受壓時而短傳路線被封鎖時,別無退路之下就只能盲斬上前場解圍,亦即係將控球權拱手相讓,林伯特依然無特別調整球員與球員之間既距離,同時喺轉守之攻既轉換過程無乜太多方向上既構思,如果唔係對手質素有限同運氣欠佳,加上文迪表現神勇,球隊依加理應已破金身,問題實在有必要作出改善。

至於個別球員方面就想講一講奧岱,雖然今場波哩位英格蘭翼鋒取得一個入球,但明顯見得到球員仍然未能跟得上球隊節奏,幾下個人突破或者近禁區邊進行緊既攻勢短傳都失敗,難聽啲講可以話成為左進攻終結者,而喺佢身後既捷維爾喺上半場亦多次揮手示意叫奧岱回後幫波,但後者好似總係要企死喺對手條後防線上等機會到咁,就連添姆雲拿既跑動活躍程度都比佢好,老實講黎緊可以比到奧岱既機會已經唔多,再唔好好自己把握的話就真係係咁先。

最後就想講陣式同臨場調動既問題,林伯特喺下半場中段一口氣換入蒙特、簡迪以及佩利錫三位,同時將陣式由4231轉為一個類近433陣式,由簡迪墜後擔任防中角色而蒙特同夏弗斯偏向中前場發展,唔少球迷認為哩個陣式會比起4231更為順暢,但其實問題依舊持續,只係喺領先底下加上對手氣勢已過,引致到場面上令人錯覺球隊運作暢順左,實質既問題依然都係存在無改變。



文章發表時間 : 29/10/2019 16:30
文章最後更新時間 : 29/10/2019 16:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  卡斯洛達  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→