《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-
上回傳送門 : 《令車迷們「瘋狂」的一個暑假 淺談藍軍大灑金錢的一個轉會窗 - 後場篇》
承接上回講完後場新收購包括堤亞高施華、捷維爾、沙亞以及文迪過後，今次講既下半部份就將會移師到中前場區域，相對起防線不穩既後場，感覺上前場既問題好似細得多，不過睇返上一季車路士喺進攻火力方面，其實經常出現前線啞火既情況，尤其喺面對住主打防守既對手時，球隊攻力方面既輸出就更為顯得力不從心，再加上適逢韋利安、柏度兩位上一代翼鋒既離開，亦正係藍軍前線改朝換代既時機。
自夏薩特離隊後，林伯特嘗試利用戰術體系去攤分比利時人既入球數字，但效果其實並不顯著，上季初透過個別年輕球員既爆發的確能夠為球隊帶黎一個唔錯既成績，但每當被對手針對性部署時進攻方面就會遇上阻滯，尤其係面對住鐵桶死守既對手時，球隊進攻乏力既問題就表露無遺，前場球員欠缺靈活同機動性既走動配合互相製造空間，同時陣中亦缺乏一位傾向前線發展而且具備視野能夠為隊友創造機會既助攻手，反之亦然缺乏整體組織下變相只能側重於個別球員既單一個人能力。
過去一季林伯特其實非常倚重韋利安喺邊線上既推進力，利用佢簡單直接既打法從而省卻左唔少由守轉攻既轉換細節，奈何巴西人從來都唔係擅於處理最後一傳或射既能手，入球既工作就要交由佩利錫等人負責，而後者自加盟後表現一直漸入佳境，傳射皆精既佩利錫亦相當願意同隊友進行小組配合，加上技術精湛能夠以一敵數進行持球突破，但始終受制於自身傷患較多所影響，一個賽季總會因傷缺席至少三份一段賽程，同時來自青訓奧岱亦未成氣候，亦令球隊喺進攻層面上相當依靠韋利安同佩利錫兩者，尤其喺復賽後果段賽程表現得更為明顯。
其實早有預料球隊係會有收購新翼鋒既計劃，主要斟酌於人選以及價錢上既考量，直到上季藍軍終於鎖定阿積士既薛耶治為頭號目標，哩位摩洛哥翼鋒喺上半季歐聯兩回合對車路士交出相當高水準表現，亦推斷為球隊決定出手既主要原因，而藍軍亦最終喺季中轉會窗過後正式完成收購並且落實於今季加盟；薛耶治能夠同時擔任右翼、攻中、左翼以及中場位置，擁有一隻可以作出精準妙傳同射門既左腳，而個人最大殺著就係喺右邊路區域斬遠位盲眼位比隊友接應，又或者自己走入中路進行射門，特質上的確能夠彌補車路士近年黎都較為缺乏既元素喺度，為前線隊友不斷供應助攻創造機會，加上擁有高質素既死球同角球處理，罰球質素甚至比起陣中既蒙特同阿朗素為好，不過要留意既係薛耶治既身體質素較差，加季初經已經歷一段傷患後需要加把勁提升狀態以及同球隊體系融合時間。
至於前鋒位置上，上季艾巴咸同基奧特各自於上下半季承接正選角色，雖然交出既表現總算不過不失，但兩者都存在一定程度既不足，如果球隊真係想拉近自己同曼城、利物浦兩支冠軍級強隊距離的話，收購更具實力既新前鋒實屬必要，添姆雲拿令人意外地由傳言成為紅軍一員變成轉投車路士，過去喺RB萊比錫以至國家隊德國人既表現可以話相當具說服力，能夠同時勝任前鋒同左翼既添姆雲拿擅長於在中前場區域不斷遊走穿梭去捕捉機會，亦變相更容易同薛耶治、佩利錫等人在場上進行距離連接，同時佢既速度同突破能力亦能提升球隊喺反擊時候既力度同命中率，不過近幾場波留意得到德國人既First touch實在有好大既進步空間，有必要加強哩方面既訓練從而提升把握力，將佢既前鋒特性推到更為完美同全能化。
最後想講既就係收購名單之中既第七單收購，亦都係轉會窗中最後一單收購，由利華古遜重金禮聘返黎既球壇觸目新星夏弗斯，雖然建基於創造力上經已收購左薛耶治為補充人選，不過預期摩洛哥人會偏向於翼鋒位置發展居多，而夏弗斯除左喺位置上能夠同時擔任前場同中場角色之外，多變既個人特質亦可以豐富到球隊既戰術變化，佢既能作為步兵上前線殺敵，亦能以支援兵身份為前線隊友輸送彈藥助攻，將臨場調動既上限額外提高，雖然林伯特經已為夏弗斯安排左一個較為合適既身份以攻中位置作賽，不過似乎仍然未能將哩位德國新星既全面性完整地套用在依加既戰術體系之中，相信對於林伯特黎講會係一個與時間對賽既考驗。
令人喜出望外既轉會窗過後，同時帶黎球迷們將今季目標既下限提升，同大家分兩篇講左關於後場同中前場既收購過後，下次將會變一變由買人變成賣人，將會同大家總結今個「瘋狂」轉會窗之下球隊喺出售球員既情況，下回再續...
文章發表時間 : 28/10/2019 10:25
文章最後更新時間 : 28/10/2019 10:25
《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
-請支持Bluexlion車迷手記 Facebook專頁-
上回傳送門 : 《令車迷們「瘋狂」的一個暑假 淺談藍軍大灑金錢的一個轉會窗 - 後場篇》
承接上回講完後場新收購包括堤亞高施華、捷維爾、沙亞以及文迪過後，今次講既下半部份就將會移師到中前場區域，相對起防線不穩既後場，感覺上前場既問題好似細得多，不過睇返上一季車路士喺進攻火力方面，其實經常出現前線啞火既情況，尤其喺面對住主打防守既對手時，球隊攻力方面既輸出就更為顯得力不從心，再加上適逢韋利安、柏度兩位上一代翼鋒既離開，亦正係藍軍前線改朝換代既時機。
自夏薩特離隊後，林伯特嘗試利用戰術體系去攤分比利時人既入球數字，但效果其實並不顯著，上季初透過個別年輕球員既爆發的確能夠為球隊帶黎一個唔錯既成績，但每當被對手針對性部署時進攻方面就會遇上阻滯，尤其係面對住鐵桶死守既對手時，球隊進攻乏力既問題就表露無遺，前場球員欠缺靈活同機動性既走動配合互相製造空間，同時陣中亦缺乏一位傾向前線發展而且具備視野能夠為隊友創造機會既助攻手，反之亦然缺乏整體組織下變相只能側重於個別球員既單一個人能力。
過去一季林伯特其實非常倚重韋利安喺邊線上既推進力，利用佢簡單直接既打法從而省卻左唔少由守轉攻既轉換細節，奈何巴西人從來都唔係擅於處理最後一傳或射既能手，入球既工作就要交由佩利錫等人負責，而後者自加盟後表現一直漸入佳境，傳射皆精既佩利錫亦相當願意同隊友進行小組配合，加上技術精湛能夠以一敵數進行持球突破，但始終受制於自身傷患較多所影響，一個賽季總會因傷缺席至少三份一段賽程，同時來自青訓奧岱亦未成氣候，亦令球隊喺進攻層面上相當依靠韋利安同佩利錫兩者，尤其喺復賽後果段賽程表現得更為明顯。
其實早有預料球隊係會有收購新翼鋒既計劃，主要斟酌於人選以及價錢上既考量，直到上季藍軍終於鎖定阿積士既薛耶治為頭號目標，哩位摩洛哥翼鋒喺上半季歐聯兩回合對車路士交出相當高水準表現，亦推斷為球隊決定出手既主要原因，而藍軍亦最終喺季中轉會窗過後正式完成收購並且落實於今季加盟；薛耶治能夠同時擔任右翼、攻中、左翼以及中場位置，擁有一隻可以作出精準妙傳同射門既左腳，而個人最大殺著就係喺右邊路區域斬遠位盲眼位比隊友接應，又或者自己走入中路進行射門，特質上的確能夠彌補車路士近年黎都較為缺乏既元素喺度，為前線隊友不斷供應助攻創造機會，加上擁有高質素既死球同角球處理，罰球質素甚至比起陣中既蒙特同阿朗素為好，不過要留意既係薛耶治既身體質素較差，加季初經已經歷一段傷患後需要加把勁提升狀態以及同球隊體系融合時間。
至於前鋒位置上，上季艾巴咸同基奧特各自於上下半季承接正選角色，雖然交出既表現總算不過不失，但兩者都存在一定程度既不足，如果球隊真係想拉近自己同曼城、利物浦兩支冠軍級強隊距離的話，收購更具實力既新前鋒實屬必要，添姆雲拿令人意外地由傳言成為紅軍一員變成轉投車路士，過去喺RB萊比錫以至國家隊德國人既表現可以話相當具說服力，能夠同時勝任前鋒同左翼既添姆雲拿擅長於在中前場區域不斷遊走穿梭去捕捉機會，亦變相更容易同薛耶治、佩利錫等人在場上進行距離連接，同時佢既速度同突破能力亦能提升球隊喺反擊時候既力度同命中率，不過近幾場波留意得到德國人既First touch實在有好大既進步空間，有必要加強哩方面既訓練從而提升把握力，將佢既前鋒特性推到更為完美同全能化。
最後想講既就係收購名單之中既第七單收購，亦都係轉會窗中最後一單收購，由利華古遜重金禮聘返黎既球壇觸目新星夏弗斯，雖然建基於創造力上經已收購左薛耶治為補充人選，不過預期摩洛哥人會偏向於翼鋒位置發展居多，而夏弗斯除左喺位置上能夠同時擔任前場同中場角色之外，多變既個人特質亦可以豐富到球隊既戰術變化，佢既能作為步兵上前線殺敵，亦能以支援兵身份為前線隊友輸送彈藥助攻，將臨場調動既上限額外提高，雖然林伯特經已為夏弗斯安排左一個較為合適既身份以攻中位置作賽，不過似乎仍然未能將哩位德國新星既全面性完整地套用在依加既戰術體系之中，相信對於林伯特黎講會係一個與時間對賽既考驗。
令人喜出望外既轉會窗過後，同時帶黎球迷們將今季目標既下限提升，同大家分兩篇講左關於後場同中前場既收購過後，下次將會變一變由買人變成賣人，將會同大家總結今個「瘋狂」轉會窗之下球隊喺出售球員既情況，下回再續...
文章發表時間 : 28/10/2019 10:25
文章最後更新時間 : 28/10/2019 10:25
《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
請按此登錄後留言。未成為會員? 立即註冊