《逼搶與「偽」逼搶 無組織可言的轉守為攻 拆解林伯特的防守遮醜布》

BluexLion車迷手記 於 23/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


今次哩篇文章係承接住上一篇對被修咸頓迫和既賽後分析,繼續延伸車路士對於「防守」哩個老問題,雖然由過去一季至今持續既球員個人失誤都經已令球迷們習以為常,但身為主教練既林伯特亦都難辭其咎,總唔能夠將所有失利都歸咎於個別球員既責任而立自己於不敗之地,所以今日就要試圖拆解佢哩一塊防守遮醜布!

今次並唔會集中討論任何關於中堅組合以至中堅穩定性既內容,只會針對於林伯特喺戰術體系以及防守佈置上既缺陷,始終佢都執教左一季有多既時間,但球隊喺防守上莫講話穩定發展,依加就連攻守平衡哩四隻字都未做到,即使今季進行左唔少重磅收購執靚左個陣容,而前場進攻套路上亦開始逐漸成形,但後防依舊做唔好的話,就真係前面入幾多都唔夠後面失返,如果仲唔諗辦法改善的話,車路士永遠都唔會同冠軍扯得上關係。

防守問題主要分為五大範疇,欠缺系統性逼搶單純為逼而逼、中前場與後場之間既空間同連接問題、由守轉攻既轉換缺乏組織安排、死球防守存在永遠的缺口以及臨場調動無目標性哩五部份,先由最基本既逼搶講起,逼搶哩兩字講就好容易,但實際做唔做到出黎就係兩回事,如果逼搶做得好,喺能夠為後場舒壓同時亦可以提升進攻既效率,但林伯特所謂既逼搶就明顯做唔到哩啲野出黎,單靠前場球員企位去封鎖對手單一傳球路線同遮線,除左企位之外並無作出任何攔截動作,而由於我地既球員身形實在過份單薄,基本上唔可能靠身體質素去搶贏個波,而隊友亦無緊貼住其他對手,變相對方只需透過走位跑動同快速傳球就能輕鬆破解哩套「偽」逼搶,喺毫無系統性可言既之下就只會白白浪費前場球員既體力,更延伸出中前場與後場之間既空間問題。

其實喺好多場賽事之中都唔難發現,車路士既中前場同後場之間暴露左一段唔少面積既空間,尤其係喺控球權在對方腳下時,中前場球員向前做所謂既逼搶,但後場球員並無同步跟隨住去將兩者之間既空位收窄,頓時拉長左成個陣容既縱向距離,間接將球隊喺場上分離成兩部份,而承接上一段所講當前場逼搶不成功時,對手只需輕鬆放一個過頭波就已經可以穿越晒成個中前場,由於後場球員並無同步向前壓上,令對手可以喺中前場同後場兩者之間既空檔大造文章,即使我地中堅能夠成功頭槌解圍短暫化解危機,但由於距離太遠中場球員回防需時,以至較大機會解圍不遠後第二點球權仍繼續會由對手主導。

而同樣地由守轉攻亦存在過程以及轉換之間既問題,感覺上林伯特無做太多關於由後場開始組織既計劃同訓練,只依賴球員自行判斷場上形勢而作傳球決定,佐真奴雖然作為全隊方向上既核心,但每當佢被對手針對性部署時球隊就好似無計可施咁,加上仍然未能為佢、簡迪以及高華錫三人之中尋找得到較為平衡既組合,相對上明明高華錫擁有持球突破能力能夠帶生個波為後場紓解困局,加上同時具備視野傳送可以平衡中場攻守兩端,但偏偏得到既機會就比起佐真奴同簡迪為少,而喺中場被斷截未能提供有效協助下,變相球隊轉守為攻既責任又回到防線身上。

林伯特曾經嘗試以中堅作為主導,按場上形勢許何直接將皮球長傳到兩翼進攻,奈何藍軍中堅抗壓能力實在太弱,每當被對手施加些微壓力緊逼時就會出現犯錯,而令林伯特開始將球權調整到由兩閘開始在邊路上組織,但就會衍生出另一個問題,由於喺捷維爾未加盟前兩閘所有人選既個人突破能力實在太弱,只能依靠地面戰作為進攻,喺缺乏變化之下即使兩翼經常回後嘗試配合亦好容易被對手睇通,所以喺過去一季至今都不斷出現個波於後場來回傳送,繼而被逼搶後一係無目標之下大腳斬去前場將控球權拱手相讓,一係就自爆或派醫院波為對手製造黃金機會。

跟住要講就係最令人氣憤既防守死球處理,每當對手得到死球機會進行攻門時,車迷們總係要提心吊膽好似望天打卦咁去望住個畫面,等同在賭場內押注開大定開細咁一樣,永遠見到一大群己隊球員囤於禁區內,但每次都無人會企喺近禁區頂位置進行防守,變相只要解圍不遠對手就能輕鬆地喺哩個區域施射或二傳到柱邊製造更具威脅攻勢,哩個危險鏡頭喺哩一季多時間其實出現過無數次,但林伯特同教練團好似從來都唔覺得係咩一回事咁,不斷地喺哩個位失波都唔會去做一啲針對性改善,而車迷們就只好喺球隊遭到死球時繼續食「救心」保命。

至於最後就想講埋林伯特喺臨場調動上既問題,首先經常用唔盡換人名額,明明場上某幾位球會體能下降得七七八八而後備席上有人可以替換,都唔開始換人令球隊形勢愈趨惡劣,下下都要拖到七八十分鐘先後知後覺咁,再延伸出佢判斷形勢既警覺性太低,啲換人永遠睇唔到目的所在,例如明明比數上領先緊兩球,但形勢上開始比番對手佔據主導,都唔會開始準備換入啲中後場球員鞏固番個戰局,谷同縮既定位含糊不清,最吹脹既係有時去到成九十分鐘先位換位換入進攻球員,真係當球員每一次落場猜兩下波已經可以存到經驗值咁,完全睇唔到其用意何在。

要知道失球數字的確有一部份係黎自個別球員既犯錯所造成,但身為主教練既林伯特亦同時擁有不可推卸既責任,歸立上述五大範疇,包括欠缺系統性逼搶單純為逼而逼、中前場與後場之間既空間同連接問題、由守轉攻既轉換缺乏組織安排、死球防守存在永遠的缺口以及臨場調動無目標性哩五部份,足以判定林伯特並無能力處理球隊喺防守上既結構性問題,而哩啲問題並唔係可以三言兩語或透過未來假設仲有既收購而輕易解決,必定要從戰術內容中入手,建立一套真正具系統既迫搶計劃,以及重新制定球隊由守轉攻既轉換過程以至場上球員連貫性既企位同走位,以達致實質上可行既攻守平衡,一日核心問題未除,即使繼續花上巨額轉會費亦只會徒勞無功。


文章發表時間 : 23/10/2019 13:20
文章最後更新時間 : 23/10/2019 13:20

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→