《將士用命 絕對得來不易的這一分 利物浦對車路士賽後分析》

藍獅 於 30/08/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


作客晏菲路從來唔係易事,更何況半場經已打少個,如果就咁睇番球隊喺賽事中既進程同最後結果,得到一分相信都係令車迷們滿意既賽果,而最重要既係見到球隊並沒有因為打少一人而自亂陣腳,反而喺大部份時間捱打下依然維持堅韌既心態同強大既紀律性,更嘗試透過零聲反擊製造反撲機會,將士用命之下總算無令到作客既球迷失望。

杜曹喺賽前安排並無作出太多變動,防線依然維持住艾斯派古達、基斯甸臣以及魯迪加組成三中堅,左右翼衛繼續係馬高斯阿朗素同列斯占士,而中場換入簡迪伙拍佐真奴為正選,前線三個攻擊點就保留盧卡古作最前點,而蒙特同夏維斯繼續從旁支援,自盧卡古加盟以黎杜曹並未有喺陣式同打法上作出太多改變,不過明顯既係盧卡古所提供到既野係藍軍一直都缺乏的,哩位比利時中鋒能夠獨力於前線停波再轉身,整個動作一氣呵成加上成功率高,大大提升左後場直接長傳上前場突擊既效果,同時加大左整個進攻效率,而前線隊友亦多左更多空間可以運用,將過往面對對手中堅作身體對抗既任務都交由盧卡古負責。

比賽初段利物浦食住主場氣勢主動搶佔進攻,頭十分鐘車路士一度被壓抑於後半場內,紅軍更成功製造左幾個入球機會只係欠運射高,而車路士喺企穩陣腳之後亦開始搶佔部份傳球率,不過客隊都主要以防反為主,同時嘗時於後場猜傳引領紅衫球員主動向前撲,再直接將球快速運上前場製造進攻空間,利用兩邊翼衛加上前面三位攻擊球員合共五個進攻點去參與攻勢,賽前一度預計馬高斯阿朗素會被針對性部署,不過喺魯迪加同簡迪佐真奴聯防底下,阿朗素亦總算仲應付得到。

今場波雙方節奏可以話相當明快,無乜太多拖泥帶水既猜傳,兩邊球隊都希望以一個射門去完成整個進攻,可以話喺深夜哩個時間都有一場觀賞性極高既賽事可以睇到,而藍軍亦透過夏維斯一個相當乖巧既頭槌先開紀錄,同時睇到佢連同蒙特仲有盧卡古喺一啲主動進攻或者反擊之中既配合都開始慢慢成型,不過不幸既係出現果一張紅牌,令杜曹迫於無奈喺半場收起一位進攻球員,亦被迫轉為嚴密防守主打穩守突擊。

果張紅牌值唔值得比,每個球迷心目中都自有答案,個人認為比係合理,亦唔想花太多篇幅去講點解合理,相信坊間經已有唔少相應文章作專業評論,所以唔多講繼續講集中番場波,杜曹喺半場抽起左夏維斯同受傷既簡迪,換入泰亞高施華同高華錫,將艾斯派古達移到右翼衛,繼而基斯甸臣亦順應地移到右中堅,禁區中間區域留番比施華負責,杜曹用意明顯希望利用哩位巴西老將去協調防線加強防守力度,亦睇得到成效非常明顯,無論喺執漏抑或防守抗壓方面施華既表現都相當稱職。

雖然話就話捱打,不過講真要守足半場都唔係易事,除左堅韌既力量之外球員們既心態亦相當重要,而艾斯派古達同文迪亦可以話盡顯關鍵作用,前者喺防線包左唔少波,而文迪亦帶到相當穩健既表現守住最後一道防線,即使比紅軍襟住砌,車路士都製造到零星反擊機會比到壓力對方,畫面亦都相當入肉,最終喺咁既情況下奪得一分,表現絕對係合格有餘。

黎緊到國際賽週期可以話比到一個短擊休息既機會杜曹同部份球員,别忘記距離轉會窗完結仲有少量時間,仲有冇球員離開還是加盟都會為哩個球季出現變數。


文章發表時間 : 30/08/2021 11:50
文章最後更新時間 : 30/08/2021 11:50

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  杜曹  利物浦  

留言


請按此登錄後留言。未成為會員? 立即註冊
    快捷鍵:←
    快捷鍵:→